Kele vôm ô ne lañe de

Kele sous-menu

Kele tep

Bengaa be Yéhôva

Bulu

Ye’ele bone bôé

 ÑYE’ELANE 1

Nsolan ajô bia wô’ô mvaé ya yem

Nsolan ajô bia wô’ô mvaé ya yem

Ye môt éziñ a kateya wo nsolan ajô? — * Kalate Zambe a kobô ajô ngum avale “jam é ne asoé” da so be Zambe. Jam éte é mbe nsolan amu bôte be mbe teke de yem. Beéngele fe be mbe be kômbô’ô yeme jam éte. Ye wo kômbô yem nsolan ajô te?—

Jé beéngele be mbe be kômbô’ô yem?

Yéhôva a nga té fam ôsu a minga ôsu den a ntoo abui mimbu. Be mbe môé na Adam ba Eve. Zambe a nga ve be abeñe vôme ya tabe, afube y’Éden. Nge Adam ba Eve be nga ye bo Zambe mewôk, ba be bone bap, be nga ye bo na si se é bo Paradis ane afube y’Éden. Be nga ye fe nyiñe nnôm éto e Paradis. Ve ye wo yeme jôm Adam ba Eve be nga bo?—

Adam ba Eve be nga bo Zambe melo, jôme te nje bia nyiñe ke e Paradis den. Ve Zambe a nga jô na a ye bo na si ése é bo abeñe vôme ya tabe, a na bôte bese bé tabe été, bé nyiñe nnôm éto e meva’a été. Aval avé a nga ye bo jamete? Abui éyoñ é nga lôt môt teke yem éyalane ya nsili ôte. Jam éte é nga be nsolan.

Éyoñe Yésus a nga zu si, a nga kate bôt mam ma fombô jam éte. A nga jô na jam éte é mbe é lat a Ejôé Zambe. Yésus a nga ye’ele bôte na be ye’elan asu na Éjôé te é so.

Ye wo wô’ô mvaé ya yeme nsolan ajô te?— Ba’ale nleme wôé na, fo’o ve ba ba bo Yéhôva mewôk mbe bé nyiñ e Paradis. Kalate Zambe a bili abui minlañe befam a binga be nga bo Yéhôva mewôk. Ye wo kômbô yeme minlañe mi bôte bete?— Bia zu yene za bôte bete be mbe, a aval avé bi ne vu be.

LAÑE BIFUSE BI

  • Marc 4:11

  • 1 Pierre 1:12

  • Metata’a 1:26-28; 2:8, 9; 3:6, 23

  • Matthieu 6:9, 10

  • Besam 37:11, 29

^ É.N. 3 Nge ô yene ndeme nyi (—) e vôme minsili miziñe mi ne, tebe mon éyoñ asu na mone wôé a ve éyalan.