Kele vôm ô ne lañe de

Kele sous-menu

Kele tep

Bengaa be Yéhôva

Bulu

Ye’ele bone bôé

 ÑYE’ELANE 2

Rébécca a nga kômbô ve Yéhôva nleme mvaé

Rébécca a nga kômbô ve Yéhôva nleme mvaé

Minga be mbe be loone na Rébécca a mbe a nye’e Yéhôva. Nnôme wé a mbe éyôlé na Isaac. Nye’ fe, a mbe a nye’e Yéhôva. Rébécca ba Isaac be nga tôban aya? Aval avé Rébécca a nga liti na a kômbô ve Yéhôva nleme mvaé? Bi tame jeñe na bi fas ajô dé.

Ésa Isaac a mbe a too jôé na Abraham, nyia wé ki Sara. Be mbe be nyiñe nlame ba loone na Canaan; bôte ya nlam ôte be mbe te kañe Yéhôva. Ve Abraham a nga be a yi na mone wé a lu’u minga a kañe Yéhôva. Nde a nga lôme mbo ésaé wé, éko éziñ Eliézer, na a ke jeñ Isaac minga nlame ba loone na Haran. Bivuvumane bi Abraham bi mbe bi nyiñ e nlam ôte.

Rébécca a nga wô’ô mvaé ya ke labe bechameau mendime ya nyu

Nde Eliézer ba bebo bésaé be Abraham béziñe be nga té na ba ke. Dulu te é mbe mbia y’ayap. Be nga ke a bechameau awôm be be’e bidi a abui metôm. Nde jé é nga ye volô Eliézer na a yeme na minga ya top asu Isaac nyi? Éyoñe be kuiya Haran, be nga tebe anjeñ amu Eliézer a mbe a yeme na bôte be mbeme zu labe mendim. Nde a nga ye’elane Yéhôva a jô’ô nye na: ‘Nge me sili ngone minga mendime ya nyu, nge a nyuu ma, a nyuu fe bechameau bam, mé yeme na nye ô tobeya.’

Ane Rébécca a nga zu anjeñ. Kalate Zambe a jô na a mbe nya nya abeñe minga. Éyoñ Eliézer a nga sili nye mendime ya nyu, a  nga yalane na: ‘Ma ye nyuu wo mendim, a ma ye fe lape bechameau bôé akekui b’aye mane nyu.’ Tame fas! Éyoñe bechameau ba wô’ô évé, ba nyu angôndô ya abui mendim; ajô te Rébécca a nga ke avôl anjeñ, abui biyoñ, na a labe mendim. Ye ô lôô ane a bo ésaé te e fôtô nyi?— Eliézer a nga kam éyoñ a nga yen aval avé Yéhôva a nga yalane nye.

Eliézer a nga ve Rébécca abui metôm. Ane Rébécca a nga bañete Eliézer a bebo bésaé bevok nda ésa. Nde Eliézer a nga kat amu jé Abraham a nga lôme nye, a aval avé Yéhôva a nga yalane meye’elane mé. Nda bôte Rébécca é nga kañese a meva’a mese na Isaac a lu’u Rébécca.

Rébécca a nga ke Canaan ba Eliézer; ane ba Isaac be nga lu’an

Ve, ye wo buni na Rébécca a mbe a kômbô lu’u Isaac?— Rébécca a mbe a yeme na Yéhôva nye a nga lôm Eliézer. Nde éyoñe bôte ya nda bôte jé be nga sili nye nge a kômbô ke Canaan, a nge a kômbô bo minga Isaac, a nga yalane na: ‘Ôwé, ma kômbô.’ Nde ba Eliézer be nga bulane nsamba. Éyoñe be kiya kui Canaan, ane ba Isaac be nga lu’an.

Yéhôva a nga botane Rébécca amu a nga bo mame ma ve Yéhôva nleme mvaé. Éyoñ abui mimbu é lôteya, Yésus a nga bialé nda bôte Rébécca! Yéhôva é botane fe wo, nge wo bo mame ma ve nye nleme mvaé ane Rébécca.

LAÑE BIFUSE BI

  • Metata’a 12:4, 5; 24:1-58, 67