Nlatane amvôé wo sili na bi yeme ngul; mba’alane amvôé wo sili na bi yeme ngul. Ngul ése wo ve na ô bo a tabe mvôé Zambe j’aye so wo bibotan. Yésus a nga jô bôt ba buni nye na: “Benya mejôô b’aye télé mia beti.” (Jean 8:32) Jam te d’atinan aya?

Ô ne tabe éto nti éyoñ ji. Ô ne kôlô ngata bivus miñye’elan a minsos Satan a nga mias mi bili bôt. Ô ne kôlô été abui bôt é tele, teke ndi nlem amu be nji yem Yéhova. (Beromain 8:22) Bemvôé be Zambe be nji fe “ko awu woñ.”​—Behébreu 2:14, 15.

Ô ne tabe éto nti mfefé nta’an mam Zambe. Za aka’a éto nti ô ne tabe melu ma zu! E Paradis, si j’aye bo teke fe bita, akon, a nwôan bôt. Azoé a zaé bi aye man. Nnôm ba awu bi aye bo momo. Woñ, étibela a ékotekot bi aye man. Kalate Zambe a jô Zambe na: “Wo kui wo wôé a jalé nkômban ya jôm ése é ve.”​—Besam 145:16.

 Bemvôé be Zambe b’aye nyiñe nnôm éto. Ényiñ ya nnôm éto é ne édima mvean Zambe a ve bôt bese ba jeñ amvôé a nye. (Beromain 6:23) Tame ve’ele simesan jôm ényiñ ya nnôm éto ja tinan asu dôé!

Wo ye bi éyoñ ya bo abui mam. Éyoñ éziñ ô ne kômbô yé’é mboman mezik nge ésaé éfe. Ô ne fe kômbô yé’é nkañan biôm nge nlôñan menda. Ô ne kômbô yé’é mam ma fombô betit a bilé. Éyoñ éziñ ô ne kômbô wulu ô, ke wo yen mesi mefe a bôt befe. Enyiñ ya nnôm éto, wo ye bi éyoñ ya bo mam mete mese.

Wo ye bi éyoñ ya bo abui memvôé. Ényiñe ya nnôm éto, wo ye bo ngule ya yem abui bôt befe be ne bemvôé be Zambe. Wo ye kui na ô yen nté atyeñ wop a mefulu map mevok, ane be fe ba bo bemvôé bôé. Mia be be mi nye’esan. (1 Becorinthien 13:8) Ényiñe ya nnôm éto j’aye ve éyoñ ya yemban bôt bese ya si! Jam é ne angôndô ya mfi é ne na amvôé dôé a Yéhova d’aye yeme ngul aval mimbu mi lôte. Ngo’oé nge ô ne bo mvôé Zambe nnôm éto!