1. Ye Zambe a vô’ôlô meye’elane mese?

Zambe a jô kane bôt ése na, be subu nye bebé, a zene ya meye’elan. (Besam 65:2) Ve jame da, a nji wôk nge kañese avale meye’elane ése. Éve’an é ne na, Zambe a kañese ki meye’elane me môt a tibili ngal. (1 Pierre 3:7) Avale da da, Yéhôva a mbe te vô’ôlô meye’elane me bone be Israël, amu be nga be, ve ke ôsu a bo abé. Ve jame da, Zambe a wô’ô meye’elane me mbo mam abé, nge a tyendé mefulu. Bi lôô valé na, meye’elane me ne nya édima jam.​—Lañe Ésaïe 1:15; 55:7.

2. Aval avé bia yiane ye’elan?

Meye’elane me ne ngap ya ékaña’a, bia ve Zambe. Nde, bia yiane ye’elane ve nyô a nga té bia étame, Yéhôva. (Matthieu 4:​10; 6:9) Mbôle bi ne bebo mam abé, bia yiane ye’elan a zene ya éyôlé Yésus, amu Yésus a nga wu asu minseme miangan. (Jean 14:6) Yéhôva a yi ke na bi kobô meye’elane nlô, nge lañe meye’elane me ne ntilan. A yi na meye’elane mangan me so bia nlem.​—Lañe Matthieu 6:7; Bephilippien 4:6, 7.

Nyô a nga té bia a bili ngule ya wôk, to’o meye’elane bia bo nlem été. (1 Samuel 1:​12, 13) A jô bia na, bi ye’elane éyoñ ése: to’o mam me tyé, to’o mam me ngô’é, to’o éyoñ bia di, a éyoñe bi bili minjuk.​—Lañe Besam 55:22; Matthieu 15:36.

3. Amu jé bekristene ba tôkan?

Abui bôte be ne te mbunan, ba bevok ba nyoñe ngaka’a Zambe na, si j’aye bo ne mieññ, a ne fianga. Jome te nde,  é nji bo tyi’ibi na, bi subu Zambe bebé. (2 Timothée 3:​1, 4; 2 Pierre 3:​3, 13) Nde d’asili na, bi bi mewoso ma ve bia ngule nyôl. Bekristene bevok fe ba yi na, bi ve be ngule nyôl.​—Lañe Behébreu 10:24, 25.

Ntôkan a bôte ba nye’e Zambe, wo volô bia na, bi subu Zambe bebé. Eyoñe bia tabe bisulane Bengaa be Yéhôva, mbunane bôte bevok wo yemete mbunane wongan.​—Lañe Beromain 1:11, 12.

4. Aval avé ô ne subu Zambe bebé?

Ô ne subu Zambe bebé, éyoñe wo fas nlem été, mam wo te yé’é e Kalate Zambe été. Fas nlem été, mam ô ne yé’é mfa’a ya mimboane mié, melep mé, a mam a ka’a bia. Meye’elan a mfasane nlem été, bia volô na, bi tu’a yeme nye’ane Zambe, a fek jé.​—Lañe Josué 1:8; Besam 1:1-3.

Ô ne subu Zambe bebé, fo’o ve nge ô bili mbunane be nye. Ve mbunan ô ne ane ngatane keka. Ngatan éte, ja sili na ô sôé je mendim éyoñ ése. Avale te fe, wo yiane yemete mbunane wôé, éyoñ ése. Wo yemete wô, éyoñe wo fase nleme wé été amu jé wo buni na, mam ô nga yé’é me ne fo’o benya mejô.​—Lañe Matthieu 4:4; Behébreu 11:1, 6.

5. Mfi ôvé wo ye bi éyoñe wo ke ôsu a subu Zambe bebé?

Yéhôva a nyoñe bôte ba nye’e nye ngap. A ve be ngule ya sa’ale jôm ése é ne te’elane mbunane wop, a ndi nleme be bili mfa’a ya ényiñe ya melu mese. (Besam 91:​1, 2, 7-​10) A bemene bia avale mimboane é ne ndamane mvo’é jangan ya minsôn, a meva’a mangan. Yéhôva a ye’ele bia aval ényiñe j’adañe mvo’é.​—Lañe Besam 73:27, 28; Jacques 4:4, 8.