Kele vôm ô ne lañe de

Kele sous-menu

Kele tep

Bengaa be Yéhôva

Bulu

Kalate Zambe—Foé jé é ne aya?

 ÉFAS 7

Zambe a vaa bone be Israël éto belo

Zambe a vaa bone be Israël éto belo

Yéhova a lôme bibubua si ya Égypte, a Moïse a tebele bone be Israël asu na be kôlô nlame te. Zambe a ve bone be Israël metiñe a zene ya be Moïse

BONE be Israël be nga nyiñe si ya Égypte abui mimbu, akekui be nga fôé a bi akum abui. Ve jame da, mfefé Pharaon ô nga nyoñ éjôé. Njôô ate a nji be a yeme Joseph. Amu bone be Israël be nga fôé abui, nde ñyôyo’ njô bôte te ô nga ko woñ. Ane a nga futi be éto belo a ve atiñe na nge mone fam a bialé, be ke wua nye Ôsôé ya Nil. Ve nkange minga ô nga ba’ale mone wé; a nga futi nye ékat été a ke suu ékate te ôsoé akôé a mon ase. Nde ngone Pharaon é nga some nkeñelé mon ôte, a yôlé wô na Moïse. Ane a nga yalé nye nda bôte Pharaon été.

Éyoñe Moïse a biya mimbu 40, a nga tôbane minjuk amu a nga yi na a kaman ôlô wua ya Israël mo me mone Égyptien. Ane Moïse nga tube nlam ôfe, vôm a nga ke tabe ane nneñ. Éyoñe Moïse a biya mimbu 80, nde Yéhova a nga jô nye na a bulane si ya Égypte asu na a ke kate Pharaon na a suu ayoñe Zambe a nga top.

Pharaon a nga ben a ngul ése. Zambe a nga belane bibubua awôm na a fonosô Égypte. Pharaon a nga biasé Moïse a Zambe wé Yéhova éyoñ ése Moïse a nga tebe nye mise na a ve nye fane ya sa’ale ébubua évok. Ébubua awômô j’asu’ulan é nga wôé mintôle mi bone mise ya Égypte​—fo’o ve mi ya Israël mi nji wu amu be nga bo Yéhova mewôk a du’u metyi me ntômba mimbé menda miap. Éngele Zambe a nga zu bo jamete a nga to a dañe mimbé mise mi ne nwo’ane metyi. Bone ya Israël be nga bo be simesa’ane jamete éyoñe jia mbu, be mbe be loene de na Pâque.

Éyoñe ntôle mone Pharaon ô wuya, ane a nga titane Moïse a bone be Israël si ya Égypte. Été été ane be nga bo ngômôtô ése na jama bôte ya Israël ase a kôlô Égypte nsamba. Ve Pharaon a nga jôban amu jé a nga suu bone be Israël na be ke. Ane a nga nyoñe nkane bita wé ôse a tôñe be. Éyoñ Évele Mañ é nto bone be Israël ôsu, nde Pharaon a nga kui be mvus ne bup. Nde be nga buni na be a zu bili. Ve Yéhova a nga kandé Évele Mañ ngap ébaé. Éyoñe te bone be Israël be nga lôte nkôte nselek, e zañe mimfine mendime mibaé! Éyoñe Pharaon a nkane bita wé be nga bumekan a toñe be. Ane Zambe a nga bu’u mimfine mendim, nde bese be nga mane jañe mendime si.

Mvuse ya été, ane bone be Israël be nga lame menda bindélé Nkôle Sinaï. Nde Yéhova a nga bo élat a be vôm ate. Zambe nga belane Moïse ane nkoñ ékalane mam, asu na a ve ayoñ Israël metiñ. Metiñ mete me nga liti be mame b’ayiane bo. Me nga ba’ale fe be mezene mese ya ényiñe jap. Yéhova a nga tabe fo’o a ayoñ Israël, a noo be bibotan a dañe meyoñe mese mevok, nté ôse be nga kañese na be awulu ane metiñe me Zambe me né.

Akusa bo mame mese Yéhova a nga bo asu dap, bone be Israël abui be nga bo melo a liti na be nji buni nkobô wé. Ane Yéhova a nga bo na miaé bôt ôte ôse ô mane wu nkôte si tañe mimbu 40. Ajô te ôsusua na a wu, Moïse a nga tobe zôsôa môt a to jôé na Josué a nyoñ éto jé. Mvuse ya été, ayoñ Israël é mbe é nto nkômesane na be a nyine si Zambe a nga ka’ale émvame jap Abraham.

—Nkañete ôte wo so kalate Nkôlan; Lévitique; Nlañane bôt; Deutéronome; Besam 136:10-15; Mam minlôman 7:17-36.