Kele vôm ô ne lañe de

Kele sous-menu

Kele tep

Bengaa be Yéhôva

Bulu

Kalate Zambe—Foé jé é ne aya?

 ÉFAS 14

Zambe a kobô a zene ya bekulu mejô

Zambe a kobô a zene ya bekulu mejô

Yéhova a tobe bekulu mejô na be kañete foé ya ntyi’ane mejô wé, a mfuban ékaña’a, a nzuane Messie

MELU bejô bôt ayoñ Israël a Juda, ngum avale bôt ô nga to ô kate foé Zambe, b’ aloene be na bekulu mejô. Mbunane bôte bete ô nga to ngul abui. Mbe bete be nga to be kañete’e mintyi’ane mejô mi Zambe teke ko woñ. Bi tame ñhe zu yene beta minlô mejô minyine bekulu mejô be Zambe be nga kañete.

1. Ntyamane Jérusalem. Ayap éyoñ ôsusua, bekulu mejô be Zambe​—a dañe dañ Isaïe ba Jérémie—​be nga taté kate na Jérusalem a ye tyameban. Be nga jô bôsa na Jérusalem a nga dutu émien ayaa Zambe. Njôane be mbe be jô’ô na be ne bebo bisaé be Yéhova ô nga bo momo, amu bôte ya Jérusalem be nga jalé étison a évuse nkañan, mvô a njet.​—2 Bejô bôt 21:10-15; Ésaïe 3:1-8, 16-26; Jérémie 2:1-3:13.

2. Mfubane ékaña’a wo beta kômeban. Ayoñe Zambe é nga kôlô minkôme Babylone mvuse mimbu 70. Be nga bulane si ya Jérusalem a beta lôñe temple Yéhova. (Jérémie 46:27; Amos 9:13-15). Mimbu 200 ôsusua, Ésaïe a nga ve éyôlé môt​—Cyrus​—a nga nyoñe Babylone a kañese na ayoñ Israël é bulane a kôme ékaña’a é ne mfubane mise me Zambe. Ésaïe a nga liti fe aval avé Cyrus a nga nyoñ étisone Babylone.​—Ésaïe 44:24–45:3.

3. Nzuane Messie a mam a nga bo. É nga be ntilane na Messie a ye bialé Bethléhem. (Michée 5:2) É nga to fe ntilane na a ye sulu émiene si; a ye zu Jérusalem a bete éjakase yôp. (Zacharie 9:9) Bôte be nga bene nye akôsa bo mbamba nleme wé a ôsesa. (Ésaie 42:1-3; 53:1, 3) É mbe fe ntilane na a ye tôbane angôndô ya njet awu. Ve ye awu dé é nga be memane ya ényiñe jé? Momo, a zene ya metuna’a Messie a nga ve, minseme ya abui bôte mi aye jaméban. (Ésaïe 53:4, 5, 9-12) Fo’o ve mwômane wé ñwô ô nga bo na jamete é tôban.

4. Mam éjôé Messie j’ aye bo si se. Môt a binam ase ngule ya bo na bôte bese a jôô be, be nyiñ évôvoé été. Ve jame da, Njô Messie a ye loenebane na Njô ya Mvo’é. (Ésaïe 9:6, 7; Jérémie 10:23) Éjôé jé si, bôte bese b’ aye tabe évôvoé été zañe jap a zañe betite bese. (Ésaie 11:3-7) Ôkon wo ye fe beta bo. (Ésaïe 33:24). To’o awu d’ aye man éyoñe jia ya biyoñe bise. (Ésaïe 25:8). Nté ôse Messie a ye jôé, bôte bese be nga wu b’ aye wômô a nyiñe si va.​—Daniel 12:13.

​—Nkañete ôte wo so kalate Ésaïe, Jérémie, Daniel, Amos, Mika, a Zacharie.