Kele vôm ô ne lañe de

Kele sous-menu

Kele tep

Bengaa be Yéhôva

Bulu

Kalate Zambe—Foé jé é ne aya?

 ÉFAS 5

Zambe a botan Abraham a nda bôte jé

Zambe a botan Abraham a nda bôte jé

Mvoñe bôt Abraham je a bu’uban. Zambe a ba’ale Joseph Égypte

YÉHOVA a nga yeme na môs éziñe wo zu, Mone wé a dañe nye’e aye tôbane minjuk akekui aye wu. Nkulan ajô ô ne ntilane kalate Metata’a 3:15 ô nga ve’ele kpwalé jame te. Jé Zambe a nga bo asu na a liti abime dia avé metuna’a me mone wé me aye bo? Kalate Zambe a kañete bia nlañe ya jam éziñ é nga lôtane zañe mone ba ésa. Zambe a nga jô Abraham na a ve nye Isaac, mone wé a mbe a dañe nye’e metuna’a.

Abraham a mbe a bili beta mbunan. Mi simesa’ane na Zambe a nga ka’ale nye na Nyii bôt, nge Mvoñ, nyô minkulane mejô mi a jô je, j’aye so be Isaac. Abraham a nga bo mewôk, ane a nga ke ve nye metuna’a; a mbe fe a yeme na Zambe a bili ngule ya wômôlô mone miñwuane nge a kômbô. Ve éyoñ Abraham a beteya ôtyeñe yôp, ane éngele Zambe a nga zu a jô nye na a jô’é. Zambe a nga se’e Abraham abui amu beta mbunane wé. Ane a nga beta ba’alane ngaka’a a nga tame ve nye ôsusua.

Mvuse ya valé, Isaac a nga biaé bone bebaé Esaü ba Jacob. Jacob a nga to a semé’é mame ya nsisim, Esaü ke momo. Zambe a nga tyendé jôé Jacob na Israël. Bone 12 be Israël, môt ase ya été a nga bo ntebe ôsu ya nda bôte jé. Ve aval avé nda bôt éte é nga bo beta ayoñ?

Nkañete ôte wo ataté éyoñe bobenyañe be mvendé be Joseph be nga bo nye éviele. Nde be nga ke nye Égypte. Ve Zambe a nga botane mbamba ndôman ate. Akôsa bo bibubua, nde Pharaon, njô ya Égypte a nga ve Joseph abui éjôé. Nté ôte ôse, mfumbane ya zaé a nga bo na Jacob a lôme bone bé be ke kuse bidi Égypte​—a vôme ate, Joseph a mbe a kuane bôte bidi! Éyoñe Joseph a bobenyañe bé be yenaneya, nde a nga yene na be kôñelaneya minlem a jamé be. A nga bo ngômôtô ése na nda bôte jé ése é ke tabe Égypte. Pharaon ke ve be’e be beta mbamba mfôla si ya tabe. Nde be nga fôé été a fu’ulu akum. Joseph a nga su’ulane yene na Zambe émien nye a nga kôme jamete na ngaka’a jé é tôéban.

Jacob a nga tabe si ya Égypte akekui éyoñ a nga wu. A nga to a nda bôte jé ése. Éyoñ awu dé é nto bebé, a nga ve nkulan ajô a lat a Mvoñe be nga ka’ale, nge Nyii bôt. Nyii bôt ate aye bo ngule Njô, a ye bialé ézezañe nda bôte mone wé Juda. Ôsusua na a zu wu Joseph émien a nga kate na môse wo zu, Zambe aye va nda bôte Jacob si ya Égypte.

—Nkañete ôte wo so kalate Metata’a kabetôlô 20 akekui 50; Behébreu 11:17-22.