Kele vôm ô ne lañe de

Kele sous-menu

Kele tep

Bengaa be Yéhôva

Bulu

Kalate Zambe—Foé jé é ne aya?

 ÉFAS 4

Zambe a bo élat a Abraham

Zambe a bo élat a Abraham

Amu mbunan, Abraham a bo Zambe mewôk. Yéhova a ka’ale nye bibotan, a bo na mvoñe bôte jé é fôé

MIMBU 350 mi lôteya nté ane Ndône mendime Noé é nga bo. Nya môtô Abraham a nga to a nyiñ étisone be a loene na Our. Ve den, vôm ate a loenebane na Irak. Abraham a nga to a bili angôndô ya ngule mbunan. Ve éyoñe te, mbunane wé ô nga tôbane meve’ele.

Yéhova a nga jô Abraham na a kôlô vôm a nga bialé, a ke tabe nneñe si ya Canaan. Teke fet, nde Abraham a nga taté dulu. Nde a nga nyoñe minga wé Sara a monekale wé Lot a bebo bisaé bé bese. Éyoñe be wuluya ayap, nde be nga ke tabe menda bindélé e si ya Canaan. Abraham ba Yéhova be nga bo élat. Nde Yéhova a nga ka’ale nye na a ye bo ésa ya beta ayoñ. A menda me bôte mese ya si m’ aye bi bibotan amu nye. Nda bôte jé j’aye nyoñe si ya Canaan.

Éyoñe be nto Canaan, Abraham ba Lot be nga fôé. Be mbili mbame mintômba a benyak. Nde Abraham a nga jô’é na Lôt a top éfase si a yi na a tabe. Lot a nga tobe si é mbe mfôme Ôsôé Jourdain. Bôte ya Sodom be mbe be bo’o mbia mvite minkômbane ya minsôn. Be mbe be bo’o abé mise me Yéhova.

Yéhova Zambe a nga beta ba’alane ngaka’a a nga ve Abraham na mvoñe bôte jé j’ aye bo abui aval ane atété ya yôp. Abraham a nga futi ndi nleme jé ngaka’ éte. Ve nkpwe’e minga Abraham, Sara, a mbe nkôkôm. Éyoñ Abraham a ntô mimbu 99, Sara ki mimbu bebé 90, Zambe a nga kat Abraham na ba Sarah b’ aye biaé mon. Avale Zambe a nga ka’ale, Sara ve biaé mone be nga yôlé na Isaac. Mvuse ya été, Abraham a nga bi bone befe. Ve, ngaka’a Zambe ya afup Éden, a lat a Nyii bôt, é nga tôébane a zene ya be Isaac.

Melu mete, Lot a nda bôte jé be mbe be nyiñe ngbwa’ étisone Sodom. Ve zôsôa môte Lot a nji fulan a bôte ya Sodom a mvite mboane mame ya minsône jap. Yéhova a nga tyi’i na aye zu ntyi’ane mejô wé étisone Sodom. Ane a nga lôme beéngele ôsusua be zu kate Lot na étisone j’azu tyameban. Beéngele be nga tindi nye a nda bôte jé na be kui Sodom avôl avôl, be ke ve mbil ôsu teke fombô mvus. Eyoñe be kuiya, ane Zambe a nga noo nduan a soufre Sodom, a mbia étisone mfe a mbe nye ngbwak, be loene je na Gomorrhe. Ane nduan é nga wôé bôte bese ya été. Lot a bengone bé bebaé be nga nyiñ. Ve ngal Lot a nga fombô mvus, amu a nga simesan akum é nga li’i. Ane a nga veñesan ako’ nku a wu, amu melo.

—Nkañete ôte wo so kalate Metata’a 11:10–19:38.