Kele vôm ô ne lañe de

Kele sous-menu

Kele tep

Bengaa be Yéhôva

Bulu

Kalate Zambe—Foé jé é ne aya?

 ÉFAS 15

Nkulu mejô a yene mame m’aye bobane melu m’azu a to minkôm

Nkulu mejô a yene mame m’aye bobane melu m’azu a to minkôm

Daniel a kuli mejô a lat a Éjôé Zambe, a ñzuane Messie. Nkuane Babylone

DANIEL, mone ndômane môt a nga to a wulu ba’aba’a a Zambe, a nga ke minkôme Babylone ôsusua na Jérusalem a tyameban. Nye, a Bejuif befe​—be nga so éyoñ éjôé ya Juda é nga tyameban—​be nga bi ma’a na éjôé ya Babylone é nga ve be abim éto fili éziñ. Be nga nyiñ ayabe Babylone. Nté ôte ôse, Zambe a nga botane Daniel. A nga nyii nye ébé bengbwengbwem. Daniel a nga yene fe minyenane mame m’ aye bobane melu m’ azu. Nkulan ajô Daniel wo dañe mfi, wo kobô ajô Messie a éjôé jé.

Daniel a yemelan éyoñ évé Messie a ye so. Daniel a nga kate éyoñ évé ayoñe Zambe é ne abendé ya mombô nyô a ne “Ñwo’an mbon, évet éte”​—mvuse besondô mimbu 69 ataté éyoñ ngule ya beta kôm a lôñe mimfine ya Jérusalem é nga veban. Sondô wua a ne melu zangbwal; nalé fe sondô mbu wua a ne mimbu zangbwal. Abendé te é nga taté na ja lañeban ayap éyoñe mvuse Daniel mbu 455 Ô.É.J. Ataté éyoñe te, “besondô” 69 b’ave mimbu 483, a m’ake mane mbu 29 É.J. Kele ôsu a lañe mefebe me a tôñe valé, wo zu yene jame é nga bobane mbu ôte. Daniel a nga beta fe jô na Messie a ye wu asu njamane mam abé mangan.​—Daniel 9:24-26.

Messie a ye bo Njô yôp été. Daniel a nga yene Messie yôb été minyenane, nge na môt “mbo’éziñ a funane mone ya môt,” a subu’u éto njôane Yéhova émien. Yéhova a nga ve nye “ngule ya jôô, a étôtok, a ayoñ”. Ayoñe te nge na Éjôé j’ aye tabe nnôm éto a nnôm éto. Daniel a nga yeme mbamba jame mfe a fombô’ô Éjôé Messie—Njô a ye jôô nsamba a bôte befe. Nsamba ôte ñwô b’aloene na “mbamba be bôte ya Njô a Dañe Yôp.”​—Daniel 7:13, 14, 27.

Éjôé j’aye tyame bijôé bise ya si nyi. Zambe a nga ve Daniel ngule ya timine biyeyeme bi nga jañelé Nebuchadnezzar, njô ya Babylone fek. Njô bôt a nga yene beta anen éve’ela môt. Nlô môt ôte ô nga to nya or, tôé a mo bi nga to argent, abum a mebé bi to a mvot, mebo me to étyé, mekule mebo me to ngab étyé a ngab étek mfula’ane. Nde akok é nga so nkôl a bibi éve’ela, nde é nga mane nyuñelan. Daniel a nga timi jamete na éve’ela é ne nsamba beta bijôé bi nga tebe si nyi, ataté Babylone nlô ô ne a or. Daniel a nga yene na melu ya asu’ulane, Éjôé Zambe j’ aye mane tyame éjôé môt ya melu mete. J’ aye fole bijôé bi bôte bise bi tele si nyi, éyoñe te j’ aye jôé nnôm éto.​—Daniel, kabetôlô 2.

Daniel a nga nyiñ akekui na a yene nkuane ya Babylone; éyoñe te a nto nnôm abui. Njô bôte Cyrus a nga zu tyame Babylone fo’o ve aval ane bekulu mejô be nga kobô. Mvuse ya ntyamane te, ane be nga suu Bejuif be bulane Jérusalem. Jamete é nga tôbane mvuse mimbu 70 avale nkulan ajô ô nga to ô jô’ô na b’ aye bulane jale dap. Éjôé bengovina si a beprêtre a bekulu mejô, Bejuif be nga beta lôñe Jérusalem a mane kôme temple Yéhova. Jé é nga kui éyoñe mimbu 483 mite mi lôteya?

​—Nkañete ôte wo so kalate Daniel.