Kele vôm ô ne lañe de

Kele sous-menu

Kele tep

Bengaa be Yéhôva

Bulu

Kalate Zambe—Foé jé é ne aya?

 ÉFAS 12

Fe’e Zambe j’aliti zene ya ényiñ

Fe’e Zambe j’aliti zene ya ényiñ

Kalate Minkana a ne njalan a melebe m’ aso be Zambe, me too ngule ya tebele bia ényiñ. Salomon nye a dañe tili kalate ate

YE Yéhova a ne mbamba Njôé? Beta jam ôsu bia yiane fombô asu na bi ve éyalane ya nsili te a ne na bi fombô melep a ve. Ye é ne fo’o nalé? Ye nge bia tôñe melebe ma, ényiñe jangane j’ aye fo’o sôan a bi ngumba nsôñan? Beta mfefe’e Njô bôte Salomon a nga tili mintete minkana. Minkana mite mi a nambe mefase mese ya ényiñ. Bi tame zu nyoñe bone bive’an.

Bi ndi nleme be Zambe. Ndi nlem é ne jame d’ adañe sili asu na bi ba’ale amvôé a Yéhova. Salomon a nga tili na: “Tabe’e Jehova mebun a nleme wôé ôse, A te ye’ebe fe’e jôé womien: Meme ‘e nye a mezene môé mese, Nnye ate a ye sôane mezene môé.” (Minkana 3:5, 6). E bi ndi nleme be Zambe, a tinane na e vô’ôlô melebe mé, a bo ane m’ ajô, mame mete mese me a bo na ényiñe jangan é bi ngumba nsôñan. Avale melebe te de a volô môte na a ve Zambe nleme mvaé, de a volô ve Yéhova éyalane ya mintañete mi Satan, nsiñe wé.—Minkana 27:11.

Bela’ane fek éyoñe wo nyiñ a bôte bevok. Metiñe me Zambe asu fam, minga ba bongô me ne beta mfi den alôté biyoñe bivok. Zambe a kate fam na: “Va’ak a minga ô nga luk ô to ndôman.” (Minkana 5:18-20) Kalate Minkana a bili melep asu binga be ne minlu’an, a liti be ntebelane ya minga a yian. A liti na minga ate a ne beta mfi mise me nnôme wé a bone bé. (Minkana, kabetôlô 31) A ve bongô melep asu na be bo bebiaé mewôk. (Minkana 6:20) Kalate Minkana a liti fe na é ne mfi ya bi bemvôé amu nyô a kandane bôt a jeñe nkômbane wôé émien. (Minkana 18:1) Bemvôé bangane be ne ve bia ngule ya bo mbamba be mam, nge ke mame me ne abé. Amu jamete bia yiane tobe bemvôé bangan a fek.—Minkana 13:20; 17:17.

E kôme mame mangan a fek. Kalate Minkana a bili melebe me ne dia, m’ avolô bia na, bi sa’ale nyuane meyôk a lôte nné. A bili melebe me avolô bia bi sa’ale mbia be asimesane be a ndamane mvo’é minsône jangan; a bili fe melebe m’ avolô bia na bi bi mbamba ôsimesane mfa‘a ya ésaé. (Minkana 6:6; 14:30; 20:1) Kalate Minkana a bemene bia na, nge bia tabe mebun a môt akekui na bi bo Zambe melo, bia yale zene ya awu. (Minkana 14:12) Kalate ate a ba’alane bia na, bi tu’a ba’ale nleme wongan amu ô za mane ndamane mbamba mefulu mangan. A ba’alane fe bia na “mame ya ényiñ m’ aso [nlem] été.”​—Minkana 4:23.

Abui bôte ya si se be nga yene na, éyoñe b’abo ane melebe ya Minkana m’ajô, ényiñe jap j’ aye bo abeñ. Asuu é ne na, bi bili mbamba beamu ya kañese Yéhova a bo fo’o Njô wongan.

—Nkañete ôte wo so kalate Minkana.