Kele vôm ô ne lañe de

Kele sous-menu

Kele tep

Bengaa be Yéhôva

Bulu

Kalate Zambe—Foé jé é ne aya?

 ÉFAS 25

Melep asu mbunan, ntaban a nye’an

Melep asu mbunan, ntaban a nye’an

Jacques, Pierre, Jean a Jude be a tili bekalate na be ve bobenyañe bap ya mbunane ngule nyôl

JACQUES ba Jude a Yésus be nga to bobenyañe ya nyia wua. Pierre a Jean be mbe nsamba minlômane 12 mi Yésus. Bôte bete benyine be nga tili bekalate zangbwal ya éfase Kalate Zambe é nga tilibane nkobô Grek. Bekalate bevo’o ya été be bili biyôlé bi bôte be nga tili be. Mimbeme’e mi ne bekalate bete été mi a volô bekristene na be ke ôsu a wulu ba’aba’a a Yéhova, a mombô Éjôé Zambe.

Bekristen b’ayiane liti mbunan a mimboan. Bôt abui b’amemetane na be bili mbunan. Ve nya mbunan a yené mimboan. Jacques 2:26 a jô na “mbunan ô ne te miboane mi mam ô ne ñwuan.” E yeme ngul e mbunan été éyoñe bia tôbane beta minjuk wo wôné fulu mban. Kristen a yiane sili Zambe fek a to ndi nleme na a ye ve nye je, ndemben a ye dañe meve’ele. Fulu mbane j’abo na Zambe a yene bia mvaé mise mé. (Jacques 1:2-6, 12) Nge mbo ésaé Zambe a ba’ale mbunan a tabe zôsô, Yéhova Zambe wé a ye yalane nye. “Mi suba’ane bebé be Zambe, ndemben a ye subu mia bebé.”​—Jacques 4:8.

Mbunane Kristene w’ayiane bo ngule ya volô nye na a dañe meve’ele a mbia mewoso m’atindi mvite mimkômbane ya minsôn. Mbia be mame me nga to me boba’ane, me nga tindi Jude a kate bobenyañe bé ya mbunane na, be “ve ngule ya kam mbunan ô nga vebane be bôte ya Zambe.”​—Jude 3.

Bekristen b’ayiane baale mfubane ntaban. Bekristene b’ayiane nyiñ avale metiñe me Zambe m’ajô. Yéhova a jô bôte bese b’abuni nye na be bo mfubane mezene mese. Nlômane Pierre wo jô na: ‘mi aye bo mfuban, amu me [Yehova] ne mfuban.’” (1 Pierre 1:15, 16) Pierre a nga jô na: “amu Krist fe a nga jibi mintaé amu denan, a li’i mia éve’ela nde mi aye toñ bibo’a mebo bié.” (1 Pierre 2:21) To’o Bekristene b’ayiane jibi mintaé amu be a nyiñ ane metiñe me Zambe m’ajô, be bili “mbamba mone môt ya nlem.” (1 Pierre 3:16, 17) Pierre a jô Bekristene na, nté b’ayange môse Zambe a ye tyi’i mejô, be nyiñ aval ane bôte mbamba nsisim a wulu be, a aval ane bôte b’ avu mefulu me Zambe amu mbamba si Zambe a nga ka’ale na: “nne zôsô a to été.”​—2 Pierre 3:11-13.

“Mi suba’an bebé be Zambe, ndemben a ye subu mia bebé.”​—Jacques 4:8

Bekristen b’ayiane liti nyeane zañe jap a zañe ba be Zambe. Jean a nga tili na: “Zambe a ne nye’an.” Nlômane Jean a ngôné beta nye’ane Zambe éyoñ a liti na a nga ve atyi’i mone dé Yésus e “metuna’a asu njamane mam abé.” Nde Bekristene b’ayiane bo aya? Jean a tili na: “A bôt me anye’e, nge Zambe a nga nye’e bia nalé, bia fe bi ayiane nye’esan.” (1 Jean 4:8-11) Bi ne liti na bia nye’e avale da nge bia liti bobejañe ya mbunane fulu anyep.​—3 Jean 5-8.

Aval avé bebo bisaé be Yéhova be ne liti na b’anye’e nye? Jean a yalane na: “Amu jame dina nde e ne nye’ane Zambe, ane bi ba’ale metiñe mé: a metiñe mé me nji bo adit.” (1 Jean 5:3; 2 Jean 6) Ba ñhe b’akômbô bo Zambe mewô’ô b’ayeme na nye fe a ye ke ôsu a nye’e be, a ye fe ve be “ényiñe ya nnôm éto melu me azu.”​—Jude 21.

​—Nkañete ôte wo so kalate Jacques; 1 Pierre; 2 Pierre; 1 Jean; 2 Jean; 3 Jean; Jude.