Kele vôm ô ne lañe de

Kele sous-menu

Kele tep

Bengaa be Yéhôva

Bulu

Kalate Zambe—Foé jé é ne aya?

 ÉFAS 10

Salomon a jôé a fek

Salomon a jôé a fek

Yéhova a ve Njô Salomon fek. Nté ôse Salomon a ne éjôé, ayoñ Israël é ne mvo’é été a mebu’uban

ÉNYIÑE j’ aye bo aya nge si ndôn ése, a bejô bôte bese ya été be a tobe Yéhova ane Njôé a tôñe metiñe mé? Éyalane j’ avebane bia éyoñe bia fombô mimbu 40 ya éjôé Salomon.

Ôsusua na David a wu, a nga tobe mone wé Salomon ane éjiane jé. Éyoñ a beteya éto, Zambe a nga jô Salomon biyeyeme na a sili nye jôm a yi. Salomon a nga sili Zambe fek a atyeñ, ndemben a ye tyi’i ayoñ Israël mejô a zôsôô. Ane Yéhova a nga wô’ô nsili Salomon mvaé abui, ajô te a nga ve nye fek, a mbamba nlem. Yéhova a nga beta ka’ale nye akum a duma a melu m’ ényiñ, nge a kele ôsu a bo nye mewôk.

Salomon a nga wum abui amu atyeñe ntyi’iane mejô dé. A nga bo na, binga bebaé be mbe be suñe nkeñelé mon. Wua ase ya be be ajô’ô na, ma me ne mon. Ane Salomon a nga jô na, be sale mone zañ a ve minga ase ngabe jia. Ane minga ôsu a nga kañese, ve nyia mon émien a nga ye’elane na be bo te sale nye, be jiba ve nye minga ôsusua. Ane Salomon a nga yene tyi’ibi na nyi a nga too a ye’elane nye fo’o a mbe nyia mon. Ane a nga ve nye mone wé. Nde jamete é nga mane mialan ayoñ Israël ése, a bôte be nga yeme fo’o na Zambe a nga ve Salomon fek.

Beta jame wua Salomon a nga bo a mbe nlôñane temple Yéhova. Nda éte é mbe nyanga nkôman e Jerusalem. É mbe vome ya mfubane nkañan asu bone be Israël. Éyoñe Salomon a nga ve Zambe temple ngume mvean, a nga ye’elane na: “Tame yen, yôp ebien a yôpe ya meyôp me vo’o yiane wo; ngumane ke nda nyô me nga lôñ!”​—1 Bejô bôt 8:27.

Meyoñe mese me nga to me yeme Salomon, to’o bôte ya Shéba, si ya Arabie. Njô bôte ya Shéba a mbe minga. Ane a nga so ôyabe na a zu yene duma Salomon, a akume dé a abime fek a bili. Njô bôt ate a nga tabe fe’e ne vema éyoñ a nga yene abui fe’e Salomon, a akume ya Israël. A nga ve Zambe duma amu a nga telé étua mfefe’e môt éto njôane ya Israël. Yéhova a nga botane fo’o éjôé Salomon. Éyoñ a nga bili éjôé, akum a évôvoé bi nga to Israël alôté éjôé môte mfe.

Jam é ne éngôngol été é ne na, Salomon a nji bo nkômbane Yéhova akekui awu. A nga bo Zambe melo a lu’u abui binga to’o ba ya meyoñe m’ akañe bezambe befe. Ôte’ete’e ôte’etek, binga bé be nga mane viti nye nlem, ane a nga lume Yéhova mvus. Nde Yéhova a nga jô Salomon na, beta éfuse si ya Israël a ye kôlô nye mo. Fo’o ve mon éfuse si nye nda bôte jé j’aye li’i é jô’é, amu Zambe a nga ka’ale David na bone bé b’ aye ke ôsu a jôé si ya Juda. Akôsa bo na Salomon a nga bo abé, Yéhova a nga simesan élate ba David asu Éjôé.

​—Nkañete ôte wo so kalate 1 Bejô bôt kabetôlô 1 akekui 11; 2 Minkañete kabetôlô 1 akekui 9; Deuteronome 17:17