Kele vôm ô ne lañe de

Kele sous-menu

Kele tep

Bengaa be Yéhôva

Bulu

Kalate Zambe—Foé jé é ne aya?

 ÉFAS 8

Bone be Israël b’anyine Canaan

Bone be Israël b’anyine Canaan

Josué a tebele bone be Israël e nyoñane Canaan. Yéhova a belane betyi’i mejô asu na be kôté ayoñe dé mo betibili bap

MINTETE mimbu ôsusua na Israël a nyine Canaan, Yéhova a nga ka’ale mvoñe bôt Abraham si éte. Ve éjôé Josué si, bone be Israël be mbe be nto bebé ya nyine Si ya Ntiñetan éte.

Zambe a nga tyi’i na bôte ya Canaan b’ayiane wu. Be nga jalé nlam a mbia mvite mboane mame ya bisôk, a nkulane metyi. Ajô te, bitisone ya Canaan bise bone be Israël be nga wôlé, Yéhova a nga jô na be mane tyame bise.

Ôsusua na ba nyine mfefe si ôte, Josué a nga tate lôme beloo si bebaé étisone ya Jéricho. Ane be nga ke tabe nda Rahab. A nga ba’ale be bebaé nda jé a solé fe be, na be za yene be. A nga yeme na be mbe bone be Israël. Rahab a nga to a buni’i Zambe bone be Israël amu a nga wô’ô minlañe na Yéhova a nga nyii ayoñe dé. Ane a nga bo na beloo si be tiñeti nye na b’aye nyii nye éyoñe b’aye zu tyam étison avale fe a nga ba’ale be.

Mvuse ya valé, nane bone be Israël be nga télé mebo si ya Canaan, a taté wosane Jéricho, nde Yéhova a nga bo étua jam. A nga bôé beta mimfine mi nga to mi boma’ane étisone ya Jéricho. Été été, bezimba be Josué be nga nyin étison été a mane je tyam ése. Fo’o ve Rahab a nda bôte jé étam be nga nyiñ. Mvuse ya valé, Josué a nga beta wôlé mesi mefe tañe mimbu misaman. Josué a nga wôlé beta ngabe ya Si ya Ntiñetan. Ane a nga kabe nda bôte ya Israël si éte.

Éyoñ éjôé Josué é nga bo bebé ya man, a nga loene bone be Israël bese vôme wua. Nde a nga ba’alane be metiñe me Yéhova, a ve fe be ngule nyôl na be ke ôsu a kañe fo’o ve Yéhova. Éyoñe Josué a bôte bese ya miaé wé be nga mane wu, bone be Israël be nga bene Yéhova a taté na b’akañe bivuse bezambe. Ayoñ é nga jômôsô abé été a kañe bezambe befe tañe mimbu 300. Nté ôte ôse, Yéhova a nga jô’é na Bephilistin a meyoñe mefe be tibili bone be Israël. Ve nane bone be Israël be nga yône Yéhova mis, nde a nga volô be a lôme be betyi’i mejô​—bese be mbe 12​—be nyii be.

Kalate Betyi’i mejô a kañete ényiñe Betyi’i mejô ataté be Othniel akekui be Samson. Samson a mbe ngungule môte si é ngenane teke tame bi. Nya ajô bi ne ba’ale a ne ntilane biyoñe biyoñe kalate Betyi’i mejô a ne na: Ntabane éjôé Yéhova si wo soo bibotan, nlumane Zambe mvuse wo soo biyo’é.

—Nkañete ôte wo so kalate Josué; Betyi’i mejô; Lévitique 18:24, 25.