Kele vôm ô ne lañe de

Kele sous-menu

Kele tep

Bengaa be Yéhôva

Bulu

Kalate Zambe—Foé jé é ne aya?

 ÉFAS 20

Awu Yésus Krist

Awu Yésus Krist

Yésus a telé mfefé ésulan; Tawôlô a Tate; b’akoñe nye a tyélé nye élé

YÉSUS a nga bo mimbu mila a étun, a kañete’e, a ye’ele fe bôt. Ve a nga yeme fe na ényiñe jé ya si é nga zu man. Betebe ôsu ya menda me Zambe Bejuif be nga fas ane be ne wôé nye, ve be mbe be ko mengana bôte woñ amu be nga to be yeme na a ne nkulu mejô. Ve Satan a nga nyine nyé’é Yésus wua ya beyé’é 12 nlem​—Judas Iscariot—​na a koñe Yésus. Ane betebe ôsu ya menda me Zambe Bejuif be nga ve Judas ate minsañe mi argent 30, asu na a kuane Yésus.

Ngô’é a nga kandane lôte si va, Yésus a nga kôane beyé’é bé be di Pâque nsamba. Éyoñe Judas a kuiya atan, ane a nga telé Mfefé ésulan, Tawôlô a Tate nge na Bidi bi Tate. A nga nyoñe belet, a ye’elan. Éyoñ a maneya ye’elan, ane a nga be’e belet éte, a kabe je beyé’é bé 11 a jô na: “Nyôle jame nyô é ne mvean ajô denan: boka’ane mi boane jame di, mi simesa’ane ma.” A nga bo fe avale da da asu élaé vin, a jô na: “Élaé ji é ne mfefé élate ya metyi mam, mme me ne nkuian ajô denan.”​—Luc 22:19, 20.

Yésus a mbe a bili abui mame ya kate beyé’é bé. A nga ve be mfefé atiñ—a kate be na be nye’esan. A nga jô na: “Zene nyô bôte bese b’ aye yeme na mi ne beyé’é bam, nge mi anye’esan.” (Jean 13:34, 35) A nga ye’elane be na be bo teke jô’é na nleme wop ô bo mintaé a lôté nné, a mame m’ aye boban. Yésus a nga ye’elan a ngule ése asu beyé’é bé. Ane bese be nga yia bia a ke afube ya Gethsémané alu.

Afube ya Géthsémané été, Yésus a nga kute meboñe si a ye’elane Zambe a ngule ése. Nane a nga mane ye’elan, nde nsamba bezimbi, beprêtre, a bôte befe be mbe be bili bikpwelé be nga suan a zu bi nye. Ane Judas a nga subu Yésus bebé a wubane nye na be yemelane nye. Nane bezimbi be nga bi Yésus nde beyé’é bé be nga tup.

Éyoñe be nga télé Yésus nda mejô Bejuif, a nga jô na a ne Mone Zambe. Ane be nga ve nye mekua a tyi’i na a yian awu amu a nga kobô minkobô mi ébiasé. Ane be nga ke Yésus be ngovina Ponce Pilate a mbe mone romain. Ja’a na Pilate a nga yene na Yésus a ne te bijô, a nga su’ulane ve nye be bôte be mbe be yi awu dé.

Be nga ke Yésus Golgotha. Vôm ate nye bezimbi beromain be nga tyélé nye élé yôp. E bizôñ amôs, atemeteme na dibi é nga vin ne kilit. Mame ngô’é ya valé, nde Yésus a nga wu. Ane si é nga fô’ôsan. Nde be nga jame nye soñe be nga fak ako’o été. Tyé é kpwaa, beprêtre be nga ke nyoñe bezimbi na be zu ba’ale soñe jé. Ye Yésus a nga langane soñ été? Momo. Zambe a nga bo beta asimba éyoñ a nga wômôlô nye soñ.

—Nkañete ôte wo so kalate Matthieu kabetôlô 26 a 27; Marc kabetôlô 14 a 15; Luc kabetôlô 22 a 23; Jean kabetôlô 12 akekui 19.

^ É.N. 15 Nge wo kômbô fase mfi ya metuna’a Yésus a nga ve, fombô’ô Kalate be a loene na Jé Kalate Zambe a ne ye’ele bia? afep 52-61.