Kele vôm ô ne lañe de

Kele sous-menu

Kele tep

Bengaa be Yéhôva

Bulu

Jé Kalate Zambe a tu’a ye’ele?

 APPENDICE

Yésus Krist—Messie be nga kak

Yésus Krist—Messie be nga kak

YÉHÔVA Zambe a nga bo na bekulu mejô ya Kalate Zambe be tili minkulane mejô mi alat a abialé, ésaé, a awu ya Nyii Bôt be nga kak; minkulane mejô mite mi nga volô na bi yemelane Messie. Minkulane mejô ya Kalate Zambe mite mise mi  nga tôébane be Yésus Krist. Teke jam éziñ é mbe ndimba été, mi mbe fe nta’asan a kele kui bone be mam. Bi tame nyoñ éve’an a bone minkulane mejô mi nga kobô ajô ya abialé Messie a éyoñ a nga nañ.

Nkulu mejô Ésaïe a nga kobô na Messie a ye so mvoñe Njô bôte David. (Ésaïe 9:7) Yésus a nga bialé fo’o mvoñe bôte David.—Matthieu 1:1, 6-17.

 Michée, nkulu mejô Zambe mfe, a nga kobô na mon ate a ye bo njôé, a na a ye bialé “Bethléhem Éphrata.” (Michée 5:2) Éyoñ Yésus a nga bialé, bitison bibaé ya Israël bi mbe bi loenebane na Bethléhem. Jia ya été é mbe bebé a Nazareth, e Nord ya si éte, ji vok é mbe bebé a Jérusalem, e Juda. Bethléhem a mbe bebé a Jérusalem a mbe fe a loenebane na Éphrata. Nne Yésus a nga bialé étisone te, aval ébien nkulan ajô ô nga kobô!—Matthieu 2:1.

Nkulane ajô ôfe ya Kalate Zambe ô nga jô na Mone Zambe a ye ‘so Égypte.’ Yésus a nga ke Égypte a too nkeñelé mon. A nga ke so wé éyoñ Hérode a wuya, avale te nkulan ajô ô nga tôéban.—Osée 11:1; Matthieu 2:15.

 Tableau a ne afep 200 valé, nnoñ “Nkulane ajô” wo ve bifuse ya Kalate Zambe, bi akobô mam ma fombô Messie. Tame ve’e bifuse bite a bi ya nnoñ ôvok ô ne ntilane na “Ntôéan.” Nalé ate a ye ve wo ngule ya yemete mbunane wôé mfa’a ya Mejô me Zambe me ne zôsôô.

Éyoñe wo fase bifuse bi, ba’ale nlem été na bifuse bite bi nga vebane mimbu mintet ôsusua na Yésus a bialé. Yésus émien a nga jô na: “Mam mese me ne ntilan ajô dam kalate metiñe me Moïse, a Bekulu mejô a Bepsaume, me ayiane fo’o boban.” ( Luc 24:44) Avale womien ô ne yene Kalate Zambe été, mi nga mane tôébane bone mezene mese!