WO SIMESANE na Môse ya Ntyi’ane Mejô wo ye funane jé? Abui bôt da buni na ba ye so betoyini be bôt éto njôane Zambe ôsu, vôm ate nye môt ase a ye lôt éyoñe jé na be tyi’ajô dé. Bôte béziñe ba ye bi ma’a ya nyiñe yôp; bevo’o ki ba ye nyoñe mekua a tabe étibila’a été nnôm éto. Ve jame da, Kalate Zambe a liti mam m’aye boban éyoñe te aval afe. Nkobô Zambe wo liti môse te sa ke ane éyoñe ya woñ, ve ane éyoñe ya ndi nlem a nkômane mam.

E Nlitan 20:11, 12, bia yene jôme nlôman Jean a nga jô mfa’a ya Môse ya Ntyi’ane Mejô: “Me nga yen beta éfumulu éto njôan, a nyô a nga to je yôp, si a yôp bi nga mate asu dé; a vôme ya bi tabe a nga bo te yené. A me nga yene miñwuan, mi mi ne anen a mi mi ne tyôtyoé, mi tele asu éto njôan; a bekalate be nga kuiban: a kalate mfe a nga kuiban, nnye a ne kalate ya ényiñ: a miñwuan mi nga tyi’ibane mejô a mam me mbe ntilane bekalate bete été, aval ane minboane mi mam miap mi né.” Njôô mbé ba jô nye éfuse ji?

Yéhôva Zambe a ne beta Njôô ya si se. Ve jame da, a ve môte mfe ésaé ya tyi’i mejô. E Mam minlôman 17:31,  nlômane Paul a nga jô na Zambe “a nga tiñeti môs éyoñe te môt émien a nga telé a ye tyi’i mejô me bôte bese zôsô.” Ntyi’i mejô be nga telé a ne Yésus Krist éyoñ a wômôya. (Jean 5:22) Ve Môse ya Ntyi’ane Mejô wo taté éyoñ évé? Nde fe wo ye tabe nté ôvé?

Kalate Nlitan a liti na Môse ya Ntyi’ane Mejô wo ye taté mvuse bita ya Harmaguédon, éyoñe ba ye jaane nta’ane mame Satan ya si. * (Nlitan 16:14, 16; 19:19–20:3) Mvuse ya Harmaguédon, Satan a mimbia minsisime mié ba ye ke mimbôk édo’o ébé été tañe toyini mimbu. Nté te ôse, be 144 000, benyoñe ngape ya ényiñe ya yôp b’aye bo betyi’i mejô a b’aye “jôô, ba be Krist, mimbu toyini wua.” (Nlitan 14:1-3; 20:1-4; Beromain 8:17) Môse ya Ntyi’ane Mejô ô nji bo zezé môs ô bili mewolo 24. Wo ye tabe mimbu toyini jia.

Tañe toyini mimbu éte, Yésus a ye “tyi’i bevevee a miñwuan mejô.” (2 Timothée 4:1) “Bevevee” be ne “bizu’u bi bôt” bi aye tulan Harmaguédon. (Nlitan 7:9-17) Nlômane Jean fe a nga yene “miñwuan. . . mi tele ôsu éto njôan” asu ntyi’ane mejô. Avale Yésus a nga ve ngaka’a, “bôte bese be ne mesoñ ba ye wô’ô tyiñe [Krist], ba ye so” a zene ya ñwômane miñwuan. (Jean 5:28, 29; Mam minlôman 24:15) Mam mevé mme mete ba ye fombô éyoñe ba ye tyi’i be mejô?

Éyoñ bia fombô ñyenane nlômane Jean, “bekalate be nga kuiban” a “miñwuane mi nga tyi’ibane mejô a mame me mbe ntilane bekalate bete été, aval ane mimboane mi mam miap mi né.” Ye mam mese me ne abé a ma me ne mvaé bôte be nga bo ôsusua na ba wu mme me ne ntilane bekalate ba été? Momo, ba ye ke tyi’i bôte mejô be fombô’ô mam be nga bo ôsusua na ba wu. Bia yeme nalé a zene fé? Kalate Zambe a jô na: “Amu na, nyô a wuya, a kabeya mfa’a ya abé.” (Beromain 6:7) Nde bôte ba ye wômô ba ye so be too mfubane teke bika’é mejô. Bekalate ba yoébane ba be ne mimfefé metiñe  me Zambe mife. Nge ba kômbô nyiñe nnôm éto, to’o ba be nga tulane Harmaguédon, to’o ba be nga wômô mesoñ, bese ba ye bo ntidane na be ba’ale metiñe me Zambe, ja’a mimfefé metiñe mise Yéhôva a ne beta ve nté ôse toyini mimbu j’aye tabe. Nne ñhe ba ye tyi’i môt ase ajô be fombô’ô mam a ye bo tañe toyini mimbu, nge na Môse ya Ntyi’ane Mejô.

Môse ya Ntyi’ane Mejô wo ye ve bizu’u bi bôte fane ya tate wô’ô nkômbane Zambe, a bo ngule ya wulu ane nkômbane te ô né. Nalé ate a liti na beta ésaé ya ye’ele bôt a ye boban. Yaa, ‘bôt be to si nyô b’aye yé’é zôsô.’ (Ésaïe 26:9) Ve, bôte bese ba ye ke kañese wulu ane nkômbane Zambe ô né. Ésaïe 26:10 a jô na: “Be liti’i mbia môt mvam, ve a ye bo te ye’é zôsô; a ye bo abé si ya zôsô, a te yen éjijine ya Yéhôva.” Mbia be bôte bete ba ye wôébane Môse ya Ntyi’ane Mejô a teke na ba ye beta wômô môs éziñ.​—Ésaïe 65:20.

Éyoñe Môse ya Ntyi’ane Mejô wo ye man, bôte ba ye bo mfuban aval Adam ba Ève be nga to. (1 Becorinthien 15:24-28) Éyoñe te meve’ele ma su’ulane ma ye taté. Satan a ye kui mimbôk a beta bi nkañesan ya jo’otan bôte y’émo ôyôme nté, a teke na a ye beta bo de éyoñ éfe. (Nlitan 20:3, 7-10) Bôte ba ye kange te ke tôñe nye ba ye yen ane minkulane mejô mise ya Kalate Zambe mi atôéban: “Bôt be ne zôsô b’aye nyoñe si, A tabe été nnôm éto.” (Besam 37:29) Yaa, Môse ya Ntyi’ane Mejô wo ye bo môse bibotan asu bôte bese ya émo ba wulu zôsôô!

^ É.N. 1 Mfa’a Harmaguédon, kele fombô kalate ba loene na Étude Perspicace des Écritures, volume 1, afep 1073-5, volume 2, afep 63-4, a kabetôlô 20 ya kalate be a loene na Adorez le seul vrai Dieu. Bengaa be Yéhôva mbe be nga tili bekalate bete bese.