Kele vôm ô ne lañe de

Kele sous-menu

Kele tep

Bengaa be Yéhôva

Bulu

Jé Kalate Zambe a tu’a ye’ele?

 KABETÔLÔ AWÔM A ÉBULU

Ba’ala’ane miabebien e nye’ane Zambe été

Ba’ala’ane miabebien e nye’ane Zambe été
  • E nye’e Zambe a tinan aya?

  • Aval avé mi ne ba’ale miabebiene nye’ane Zambe été?

  • Ma’ane mevé Yéhôva a ye ve bôte ba ba’ale bebiene nye’ane wé?

Ye wo ye fo’o bo na Yéhôva a bo asoé dôé éyoñe mbia ôkôs a vuñe ji?

1, 2. Bi ne yene mbamba asoé vé melu ma?

TAME simesane na wo tyi’ilane beta ôkañ, mveñ é kômbô’ô noñ. Yôp é nga vin nne viu. Feleves é nga bo, zo’oyañ é nga bam, mvuse ya valé, mbia mveñ a tyi’i yôp. Éyoñe te wo kusa bumu a mbil, a jeñe vôm ô ne wu’ubu. E teme na, ngbwa’a njoñ, ô nga yen ôlem; ô nga’an ô tele ne bip, andil é teke toé, ô nga’ane fe na ô nyeke’e ô too. Tame simesan aval mvaé wo ye wôk!

2 Bia nyiñ éyoñe ya jo’ojo’o. Ényiñe ya si é ne fo’o ve tu’a ke ke abé été. Ve bi bili ngul ôlem ô ne ba’ale bia avale meve’ele ése, éyoñ ése. Ô ne ôvé? Kalate Zambe a ye’ele na: “M’ aye jô ajô Yéhôva na, ‘A ne me vôm m’ asobô a ôleme viam; Zambe wom, nnye me to nye mebun.’”—Besam 91:2.

3. Aval avé bi ne bo na Yéhôva a bo asoé dangan?

3 Tame simesane jame di! Yéhôva, Nté biôm a Njô ya biôm bise, a ne bo asoé dangan. A ne ba’ale bia, amu a bili ngul abui a dañe bôte bese, nge ki jôm ése é ne bo na bi tôbane minjuk. Ja’a bi tele minju’u été,  Yéhôva a ne mane vaa mbia be mam mese abé te d’ate so me. Aval avé bi ne bo na Yéhôva a bo asoé dangan? Bia yiane futi ndi nleme jangane be nye. Mejô me Zambe ma bendé bia na: “Taba’ane nye’ane Zambe été.” (Jude 21) Yaa, bia yiane ba’ale biabebiene nye’ane Zambe été, bi ba’ale mbamba amvôé a Ésa wongan a nye’e bia a ne yôp. Éyoñe te bia ye tabe nye mebun, bi yeme na a ne asoé dangan. Ve aval avé bi ne lat aval amvôé te?

YEMELA’AN A YALAN A NYE’ANE ZAMBE A NYE’E WO

4, 5. Tame lañe bone be mame Yéhôva a nga liti nye’ane wé asu dangan.

4 Asu na ô ba’ale womien nye’ane Zambe été, wo yiane tu’a wôk aval avé Yéhôva a nga liti nye’ane wé asu dangan. Tame simesan abui miñye’elan ya Kalate Zambe ô yé’éya a zene ya kalate nyi. Amu a ne Nté biôm, Yéhôva a nga ve bia si na é bo mbamba vôme bia nye’e bi too. Ane a nga jalé je a abui bidi a mendim, akum, abui mevale betite bia nye’e bi yene, a mbamba mefube bilé a mesam. Amu a ne nlô ya Kalate Zambe, Zambe a nga liti bia éyôlé jé a mefulu mé. Nge ô vaa nalé, Mejô mé ma kate bia na a nga lôme Mone wé a dañe nye’e si, ane a nga kañese na Yésus a wô’ô mintaé a wu asu dangan. (Jean 3:16) Nde dase te da tinane jé asu dangan? Da ve bia ndi nleme ya angôndô ya abeñ ényiñe melu ma zu.

5 Ndi nleme jangane ya melu ma zu é tii a jam afe Zambe a nga bo. Yéhôva a nga telé éjôé ya yôp, Éjôé Messie. É mbeme zu mane minju’u mise bia tôbane mie, a so paradis si va. Tame simesan! Bia ye bo ngule ya nyiñe meva’a été a mvo’é été nnôm éto. (Besam 37:29) Éyoñe ji fe, Zambe a litiya bia zen, aval avé bia yiane nyiñ aval ényiñ a wô’ô mvaé. A nga ve fe bia beta mvean: meye’elan, a yoé zene ya na bi bo ngule ya laan a nye. Bone be mame bi ne ve’ele lañe mbe le, ma liti na Yéhôva a nye’e wo, a bôte bese y’émo.

6. Aval avé ô ne yalan a nye’ane Yéhôva a nga liti bia?

 6 Nde ényiñe jangan é tii beta nsili bia yiane sili biabebiene nyi: Ma ye yalane nye’ane Yéhôva a nga liti me wu aya? Abui bôt da jô na, “Ôwé, ma yi fo’o na ma fe me nye’e Yéhôva.” Ye wo fe wo fas avale da? Yésus a nga jô na atiñe di da dañe metiñe mese: “Nyeke’e [Yéhôva, NW] Zambe wôé a nleme wôé ôse, a nsisime wôé ôse, a nlô wôé ôse.” (Matthieu 22:37) Wo yiane fo’o bi abui b’amu ba tindi wo na ô nye’e Yéhôva Zambe. Ye nye’e Yéhôva a nlem ôse, nyôle ése, a nsisim ôse a su’u ve na bi wô’ôtan édiñe te nleme wongan été?

7. Ye zézé ñwô’ôtane nye’ane Zambe nlem, ñwô étam wo liti na bia nye’e Zambe? Timi’i.

7 Avale Kalate Zambe a liti, nye’ane Zambe ô nji su’u ve zeze ôsimesan. Akôsa bo na ñwô’ôtan édiñe Yéhôva nleme wongan été ô ne mfi, ve ô ne fo’o ve atata’a ya nya nye’ane mfa’a wé. Bi tame nyoñ éve’an. Nge wo kômbô bé élé ja wume bibuma, wo yiane bi mvoñe ya été, mvoñ éte é ne bo bone mefes. Nde nge wo kômbô di ébuma élé éziñ, ye wo ye wô’ô mvaé nge môt a viane wo ve mefese ya ébuma te, a li’i ve wo ébuma ébien? Teke jôm! Avale te da, e nye’e Yéhôva Zambe nlem wongan été a ne fo’o ve atata’a. Kalate Zambe a ye’ele na: “Amu jame dina nde e ne nye’ane Zambe, ane bi aba’ale metiñe mé: a metiñe mé me nji bo adit.” (1 Jean 5:3) Asu na nye’ane wongan asu Zambe ô bo wu wo so bia nlem été, wo yiane wume mbamba bibuma. Bia yiane liti wô a zene ya mimboan.—Matthieu 7:16-20.

8, 9. Aval avé bi ne liti nye’ane wongan a mvean akéva e be Zambe?

8 Bia liti na bia nye’e Zambe éyoñe bia wulu ane metiñe mé me né, a bo aval ane mimbôka’a ya metiñe mete mia jô. E bo ane metiñe mete ma jô a nji dañe bo ayet, amu Yéhôva a ve bia metiñe mé na bi bi ényiñ é ne mvaé, mevak, é jalé’é minkômbane miangan. (Ésaïe 48:17, 18) Éyoñe bia  tôñe zene Yéhôva a liti bia ényiñe jangan, bia liti Ésa wongane ya yôp été na bia ve akéva amu mam mese a nga bo asu dangan. Ve éngôngol ajô é ne na, émo bia nyiñe dene ji, fo’o ve tyôtyoé bôte mbe ba kañese liti mvean akéva wop. Bi nji kômbô bo bikalak ane bôte béziñe ya melu me Yésus. Yésus a nga saé minzezam awôm, fo’o ve wua étam ñwô ô nga simesane na wo yiane zu ve nye akéva. (Luc 17:12-17) Yaa, bia yi na bi funan a nyô a nga simesane zu ve akéva, sa ke ba bevok!

9 Metiñe me Yéhôva bia yiane ba’ale me ne ñhe mevé? Bi yeneya abui y’été kalate nyô, ve bi tame beta zu yene mevo’o méziñ. E ba’ale metiñe me Zambe a ye volô bia na bi tabe nye’ane Zambe été.

KELAN ÔSU A SUBU YÉHÔVA BEBÉ

10. Liti’i amu jé é ne mfi na ô ke ôsu a jeñe ñyemane Yéhôva Zambe.

10 E yé’é yeme Yéhôva a ne beta mfi ényiñe jangan asu na bi ke ôsu a subu Zambe bebé. A ne jam bi nji yiane télé. Nge da kui na alu da bi wo  nseñ, éyoñe te wo kôbane nduan amu avep é ne, ye wo ye jô’é na nduan é wut akekui j’amane dim? Momo. Wo ye jeñe na ô futi nja’a na nduan é ke ôsu a yôñ. Ô ne ngule ya jañelé ényiñe jôé nge ô nji ke ôsu a sulu nduan éte! Aval ane nja’a é ne mfi asu na nduan é yôñ, aval te “ñyemane ya Zambe” wo ye bo na ô ba’ale nye’ane wôé ngul asu Yéhôva.—Minkana 2:1-5.

Aval ane nduan, nye’ane wo nye’e Yéhôva wo sili na ô soo wô asu na ô ke ôsu a yôñ.

11. Aval avé beyé’é be Yésus be nga wô’ôtan a ñye’elan a nga ve be?

11 Yésus a mbe a yi na, beyé’é bé be ke ôsu a bo na nye’ane ba nye’e Yéhôva a Mejô mé me ne dia a totyii, ô ke ôsu a bo vevee a nya ngul abui be be. Éyoñ a wômôya, Yésus a nga liti beyé’é bé bebaé aval avé minkulane mejô miziñ mi ne éfase Kalate Zambe ya nkobô Hébreu mi nga tôébane be nye. Be nga wô’ôtan aya? Bebien be nga jô mvuse ya été na: “Ke minlem miangan mi ate yôñ a mevak, éyoñ a te kobô bia zen, a liti bia mejô me ya kalate Zambe?”— Luc 24:32.

12, 13. (a) Aval avé nye’ane bôte be bili den asu Zambe a Kalate Zambe ô nto? (b) Jé bi ne bo asu na nye’ane bi bili ô bo te vobô?

12 Éyoñ ô nga taté na wo yé’é jôme Kalate Zambe a tu’a ye’ele, ye nleme wôé ô nji jaé a mevak, éva’a ya kañete bôte bevo’o benya mejôô, a nye’an asu Zambe? Teke bisô, ô nga yiane wô’ôtane nalé. Abui bôte befe be nga wô’ôtan avale da. Ve jam é ne njuk, éyoñe ji, é ne na, ô ba’ale nye’an ôte vevee a bo na ô ke ôsu a nañ. Bi nji kômbô vu mefulu me bôte y’émo ya dene ji. Yésus a nga jô na: “Nye’an bôt abui wo aye [vobô, NW ].” (Matthieu 24:12) Aval avé ô ne bo na nye’ane wo nye’e Yéhôva a betotyi miñye’elane ya Kalate Zambe été ô bo te vobô?

13 Kele ôsu a yé’é yeme Yéhôva Zambe a Yésus Krist. (Jean 17:3) Kôme’e fase mam wo yé’é Kalate Zambe été, a sili womiene na: ‘Jé mame ma, m’aye’ele ma mfa’a Yéhôva Zambe? Amu mbé mam mete ma beta ve ma na me nye’e nye a nleme wom ôse, a nsisime wom ôse, a nyôle jam ése?’ (1 Timothée 4:15) Nge wo bindi mam wo lañ nlem wôé avale te, wo ye bo ngule ya ba’ale nye’ane wôé asu Yéhôva ayôñ.

14. Aval avé meye’elan me ne volô bia na bi ba’ale nye’ane bi bili asu Yéhôva ayôñ?

 14 Zene fe é ne volô wo na ô ba’ale nye’ane ô bili asu Yéhôva ayôñ, é ne na, ô ye’elan éyoñ ése. (1 Bethéssalonicien 5:17) E Kabetôlô 17 ya kalate nyi, bi nga yé’é na meye’elan me ne beta dase Zambe a nga ve bia. Aval ane amvôé bôte bebaé é ne tabe ayôñ nge ba jeñ éyoñ ése na be laan, avale te fe amvôé dangan a Yéhôva é ne tabe ayôñ nge bia laan a nye meye’elan été kom ése. É ne mfi na meye’elan mangan me bo te veñesane fo’o ve ékobôkobô, nge ve mba’alan avale bifia da éyoñ ése, teke tame taté fas nge wô’ôwô’ô jame bia jô. Bia yiane laan a Yéhôva ane mon a kobô a ésa wé a nye’e. Bia ye kobô a ésemé, bi kate nye mam ma so bia nlem été, zôsô été. (Besam 62:8) Teke bisô, ayé’é Kalate Zambe dôé womien, a meye’elane ma so nlem été, me ne fo’o mam ma sili ékaña’a jangan, amu ma volô bia na bi ba’ale biabebiene nye’ane Zambe été.

YENE MEVAK ÉKAÑA’A JÔÉ WO VE ZAMBE

15, 16. Amu jé bia yiane fo’o yen ésaé ya nkañetane mbamba foé ya Éjôé Zambe ane ôlu’u a étôtok?

15 Ayé’é Kalate Zambe dôé womien, a meye’elan, me ne mame ya ékaña’a jangan bi ne bo éyoñe bi ne étam. Ve jame da, éyoñe ji, bi tame yene jame da ya ékaña’a jangane bi ne bo mise me bôte bevok: e kate bôte bevo’o mbunane bi bili. Ye ô kañeteya bôte bevo’o benya mejôô ya Kalate Zambe? Nge nalé, yeme na ô biya beta ma’a. (Luc 1:74) Éyoñ bia bo na bôte befe be yeme benya mejôô ma lat a Yéhôva Zambe, bia nyoñe ngap asu beta ésaé a ne mvebane be benya Bekristen bese: nkañete ya mbamba foé y’ Éjôé Zambe.—Matthieu 24:14; 28:19, 20.

16 Nlômane Paul a mbe a yene ésaé minisi jé ane jôm é ne édima, a nga too a loene je na étôtok. (2 Becorinthien 4:7) E kate bôte bevok ajô Yéhôva Zambe a nsôñane wé, a ne ésaé ja dañe bisaé bise ô ne bo. A ne ésaé asu Masa a  dañe bi abeñe mefulu a lôté ba bevo’o bese, a ésaé te j’aso bema’a bi se ngule ya bi vôme mfe. Éyoñe wo nyoñe ngap asu nkañete ya mbamba foé, wo volô bôte be ne zôsô na be subu Ésa wongane ya yôp bebé, a nyoñe zene y’ényiñe ya nnôm éto. Ésaé évé é ne beta ve avale ma’ane te? Jam afe é  ne na, éyoñ wo kañete mbamba foé a lat a Yéhôva a Mejô mé, wo yemete mbunane wôé womien, a kômôtô nye’an ô bili asu dé. Yéhôva a wô’ô mvaé asu ngule wo ve. (Behébreu 6:10) E bo ésaé te kom ése a volô wo na ô ba’ale womien nye’ane Zambe été.—1 Becorinthien 15:58.

17. Amu jé ésaé Bekristen ja yiane boban avôl avôle den?

17 É ne mfi ya simesane na ésaé ya nkañetane mbamba foé ya Éjôé Zambe ja yiane boban avôl avôl. Kalate Zambe a jô na: “Kañete’e mejô, va’a ngu.” (2 Timothée 4:2) Amu jé ésaé te je a yiane boban avôl avôle den? Kalate Zambe a ve éyalan: “Beta môse ya Yéhôva a nto bebé, a nto bebé a zu avô.” (Sophonie 1:14) Ôwé, beta môse ya Yéhôva a yiane zu tyame nta’ane mame wu a nto bebé. Nde bôte ba yiane yeme nalé! Ba yiane yeme na, éyoñe ji nje ba yiane tobe Yéhôva ane Njôé. Amu asu’ulan d’ “aye ke bem.”—Habakuk 2:3.

18. Amu jé bia yiane kañe Yéhôva fufulu a benya Bekristen bevok?

18 Yéhôva a yi na bi ve nye ékaña’a bi to nsamba a benya Bekristen bevok. Jamete nde mejô mé ma jô na: “Môt ase a simesa’ane nyô mbok, nsimesane ya tindi nye mfa’a ya nye’an a mbamba mimboane mi mam; te jô’an nsulane wongane ya vôme wua, ane ba bevo’o be wô’ô bo, ve nkoba’ane mejô me avolô, wua a kobô’ô nyô mbok; a mi dañedañe bo nalé ane mi ayene môs ôte ô za’a bebé.” (Behébreu 10:24, 25) Éyoñe bia be bobejañe ya mbunane bevo’o bia tôbane bisulan, bi bili mbamba zene ya ve Zambe bia nye’e duma a ékaña’a. Bia wônane fe bia bia nsisim été, a veane fe ayôñe nyôl.

19. Nne bi ne yemete ñwôka’ane akônda Bekristen été aya?

19 Éyoñe bia yeñ a bebo bisaé be Yéhôva bevok, bia yemete nye’an a amvôé akônda été. É ne mfi na, bi jeñe na bi yene mbamba mefulu môte mbok a bili, avale Yéhôva fe a jeñe mbamba mefulu bia fe bi bili. Te simesane na beébe bebo bisaé be Yéhôva bevok be nji yiane kop. Simesa’ane na môt ase ya be bia a yeme ngule na amvôé ba Zambe  é nen; ve nnañane Bekristen ô ne minté minté. Bia yiane fe simesane na môt ase ya be bia a kop. (Becolossien 3:13) Jeñe na ô late ngbwa a bôte ba nye’e Yéhôva abui, a wo ye yene na womien wo nañe nsisim. Yaa, kañe Yéhôva a bobenyoñ a bekale bôé ya nsisim: nalé a ye volô wo na ô ba’ale womiene nye’ane Zambe été. Yéhôva a ya’ane ba bese b’akañe nye ane a nye’e, a ba’ale bebien nye’an wé été aya?

NYAMETE’E “ÉNYIÑ É NE FO’O ÉNYIÑ”

20, 21. Jé é ne “ényiñ é ne fo’o ényiñ,” a amu jé jamete é ne mbamba ndi nlem?

20 Mfa’a ya fa’é bebo bisaé bé ba wulu ane a nye’e, Yéhôva a ve be ényiñ; ve a ve be kan ényiñ fé? Ye ényiñ wo nyiñ éyoñe ji nje é ne nya ényiñi? Mise me abui bôt, éyalan é ne na ôwé. Amu bia vebe, bia di a nyu; nalé a tinane na bia nyiñ. Éyoñe mevak, da kui na bi jô na: ‘Nyi a ne fo’o mfañ ényiñ.’ Ve jame da, Kalate Zambe a liti na, a zen éziñ, môt éziñ a nji tu’a nyiñe den.

Yéhôva a kômbô na ô bu’uban a “ényiñ é ne fo’o ényiñ.” Ye wo ye fo’o bu’uban je?

21 Mejô me Zambe ma tindi bia na bi “bi ényiñ é ne fo’o ényiñ.” (1 Timothée 6:19) Bifia bite bia liti na “ényiñ é ne fo’o ényiñ” é ne jôme bi to ndi nleme na bia ye bi melu ma zu. Ôwé, éyoñe bia ye bo te bijô, bia ye bo vevee a mezene mese. Nde bia ye nyiñ avale Zambe a nga mane ta’a na bia yiane nyiñ. Môs éziñ, melu m’azu, bia ye nyiñe si é nto paradis, bi to mvo’é minsôn, évôvoé été a mevak été. Bia ye bu’uban a “ényiñ é ne fo’o ényiñ”—ényiñe ya melu mese. (1 Timothée 6:12) Ye nalé a nji bo mbamba ndi nlem?

22. Aval avé ô ne kôme “bi ényiñ é ne fo’o ényiñ”?

22 Nne bi ne “bi ényiñ é ne fo’o ényiñ” aya? A kobô’ô jame da, Paul a nga jô Bekristene na “be bo mvaé,” a na be bo “minkukum mfa’a ya mbamba mimboan.” (1 Timothée 6:18) É ne fo’o mfi abui na bi bo mam bi nga yé’é Kalate Zambe été. Ve, ye Paul a kômbô jô na bia kus “ényiñ é ne fo’o ényiñ” éyoñ bia bo mbamba be mam? Momo, bia bi mbamba jam ate amu “mveane ya zesé” wo so be Zambe.  (Beromain 5:15) Ve Yéhôva a yene mvaé ya dasé bôte ba bo nye ésaé aval a nye’e. A yene mvaé na ô bi “ényiñ é ne fo’o ényiñ.” Ényiñe te é ne abeñ, évôvoé, a nnôm éto, ja yange bôte bese ba ba’ale bebiene nye’ane Zambe été.

23. Amu jé é ne mfi ya ba’ale womiene nye’ane Zambe été?

23 Môt ase ya be bia a bo mvaé éyoñ a ye sili émiene na, ‘Ye m’akañe fo’o Zambe aval a nga tili Kalate Zambe été? Nge bia kôme yeme na, môs ôse, éyalan é ne na ôwé, wôna bi ne mbamba zen. Bi tabe ndi nleme na Yéhôva a ne asoé dangan. A ye bo na bebo bisaé bé be kôlô teke nsel éyoñe ya melu ya asu’ulan ya nta’ane mame wu. Yéhôva a ye fe bo na bi nyiñe mfefé nta’ane mam ô nto bebé wu. Ngo’o avale meva’a bia ye bo éyoñe bia ye nyiñ aval ényiñe te! Ngo’o abim ava’a bia ye wôk éyoñe bia ye simesane na bia te nyoñ abeñe miñtyi’ane melu ma su’ulane ma! Nge wo nyoñ avale miñtyi’ane te éyoñe ji, wo ye bu’uban “ényiñ é ne fo’o ényiñ;” aval ényiñe Yéhôva Zambe a nga mane ta’a na ja ye bobane nnôm éto!