Kele vôm ô ne lañe de

Kele sous-menu

Kele tep

Bengaa be Yéhôva

Bulu

Biyalane ya minsili 10 bisoé bia sili bebien

 NSILI 1

Me ne ne za?

Me ne ne za?

AMU JÉ NSILI ÔTE Ô NE MFI?

E yeme za ô né, a mame wo buni, a ye volô wo na ô nyoñe mbamba mintyi’an éyoñe bôt ba tindi wo na ô bo jam é ne abé.

NGE A MBE WO, Ô NGA YE BO AYA?

Tame fase jame di: Karen a ndôme kui abôk; a yeme na, atiñe da kamane na, môt a ne ôkala wé a nyu meyok; nde a wô’ô tyiñe môt a yem é jô’ô na:

“Jé wo bo ô tele valé?”

Éyoñ a fombô mvus, a yene mvôé jé Jéssica, é bili miñyombé mi bia mibaé mi yoo. Jéssica a kalane Karen ñyombé wua a jô’ô nye na: “Ô nji beta bo mongô nga? Tame ñhe tyek.”

Karen a kômbô ben, ve Jéssica a ne mvôé jé. Karen a nji yi na mvôé jé é buni na a ne aval étam. A nde fe, Jéssica a nji bo mbia mona minga. Nge a nga nyu meyok, nalé ate a tinane na, jam ete é nji dañe bo abé. Karen a jô nlem été na, ‘A ne fo’o ve bia. A nji bo ane ma nyu banga!’

Nge ô mbe été Karen, ô nga ye bo aya?

TEBE MONE JÔM, Ô TAME FAS!

Éyoñ ô tele aval été te, asu na ô nyoñ mbamba ntyi’an, wo yiane yem avale môt ô né. E yem avale môt ô né a tinane na, wo yeme mam me ne mfi mise môé, a mame wo buni. Ñyeman ôte wo volô na, ô bi ngule ya jôé ényiñe jôé womien, a lôte na, bôte bevok mbe be kate wo jôme wo yiane bo.1 Becorinthien 9:26, 27.

Aval avé ô ne kui na, ô bi ngule ya jôé womien? Nge ô bii biyalane ya minsili mia tôñe le, yeme na ô nto zen.

 1 MEFULU MAM MA DAÑ ABEÑ ME NE MEVÉ?

E yeme jé ô ne ngule ya bo, a mefulu môé ma dañ abeñ, a ye yemete ndi ô bili be womien.

ÉVE’ELA YA KALATE ZAMBE: Nlômane Paul ô nga tili na: “Ve akusa bo me ne ndiman mfa’a ya nkobô, ve me nji bo ndiman mfa’a ya ñyeman.” (2 Becorinthien 11:6) Amu a mbe a kôme yeme Mintilane ya Kalate Zambe, Paul a mbe ngule ya tabe ne séé, teke si’an éyoñe be nga soñe nye. A nji jô’é na mbia minkobô mi te’e ndi a mbe a bili be émien.2 Becorinthien 10:10; 11:5.

FAS AVALE MÔT Ô NÉ: Tili’i e si valé jôm éziñ wo yeme bo, nge vôm éziñ ô ne atyeñ.

Éyoñe ji, tame tili fulu jia ya mefulu môé ma dañ abeñ. (Bive’ane bi: Ye wo yeme nyoñe bôte ngap? Ye ô ne akap? Ye ô ntoo ngule ya toñe womien? Ye wo kui awolo kom ése?)

2 MBIA MEFULU MAM ME NE MEVÉ?

Aval ane ngôkop é se ngule ya yem, nge aboñe da y’été é ne nte’an, avale te fe, nge bia jô’é mbia mefulu me kôm éto e be bia, bi ne tyendé a bo avale môt afe.

ÉVE’ELA YA KALATE ZAMBE: Paul a mbe a yeme mbia mefulu mé. A nga tili na: “Me ayen atiñe Zambe mvaé mfa’a ya môte ya nlem été: ve me lôô aval atiñ afe bibu’a ya nyôle jam été, de awosan atiñe ya nleme wom, a de ake ma nkôm atiñe ya abé si, nde ete e ne bibu’a ya nyôle jam été.”Beromain 7:22, 23.

FAS AVALE MÔT Ô NÉ: Mbia fulu évé wo yiane jeñe na ô saé?

 3 MINSÔÑANE MIAM MI NE MIVÉ?

Ye ô ne bo na, ô dañe taxi, éyoñe te nje wo jô ndutu taxi na, a dutu wo tison ése, mi so’o mi kele’e, akekui essence ése ya metua ja man? Ke akute jame le! Ngo’o abime moné te!

Sikôlô mbé ô ne nyoñ? Minsôñane mia volô wo na, ô nyiñ ane môt a yeme vôm a ke. Mia volô wo na, ô yeme vôm wo ke, a aval avé ô ne ke kui vôm ate.

ÉVE’ELA YA KALATE ZAMBE: Nlômane Paul ô nga tili na: “Ajô te, me amate mbile nalé, sa aval ane me ne te yeme ngumba jam.” (1 Becorinthien 9:26) Paul a nji yange na, mam me kui nye ényiñ atemetem, a mbe a bili minsôñan, a jeñe fe na a jalé mie.Bephilippien 3:12-14.

FAS AVALE MÔT Ô NÉ: Tili’i e si valé minsôñane milal wo kômbô jalé akekui amane mbu.

4 MAM MA BUNI ME NE MEVÉ?

Éyoñe wo nyoñe ntyi’ane ya tôñe mam me ne mfi mise môé, ô ne ane élé é vo’o ku, ja’a ngul ôkôs wo vuñ, amu minkañ mié mi ne édok e si été

Nge ô nji bi mam wo buni, wo ye bo avale môt é nji yeme nyoñe mintyi’ane mié. Wo ye bo ve ane jôngôlô, wo ye tyendé fo’o ve na, ô funane bongô be sikôlô bevok, jam ete da ye liti na, ô nji yem avale môt womien ô né.

Ve éyoñe wo nyoñe mintyi’an amu wo buni ngume jam, nalé a volô na, ô bo teke tyendé, ja’a bôte bevok ba yi na ô bo aval afe.

ÉVE’ELA YA KALATE ZAMBE: Valé Daniel a ngenane mone mongô, Daniel “a nga tyi’i nlem été” na a ye tôñe metiñe me Zambe, ja’a be nga kandane nye a nda bôte jé. (Daniel 1:8) Nalé a nga volô nye na a bo teke tyendé. A nga jeñe na ényiñe jé é lu’an a mam a buni.

FAS AVALE MÔT Ô NÉ: Mam wo buni me ne mevé? Ye wo buni Zambe? Amu jé wo buni nye? Mam mevé ma bo na, ô buni na Zambe a ne?

Ye wo buni fo’o na, metiñe me Yéhôva me ne asu mfi wôé womien? Amu jé wo buni nalé?

Nde ñhe, wo kômbô funane jé? Ye ôkaé élé mfebe wo lôme vôm ase, nge ke élé é yeme ne bip, ja’a beta ôkôs wo vuñ? Nge wo kômbô bo ane élé te, yemete avale môt ô né. Nalé é volô wo na, ô bi éyalane ya nsili wu: Me ne ne za?