Kele vôm ô ne lañe de

Kele sous-menu

Kele tep

Bengaa be Yéhôva

Bulu

Biyalane ya minsili 10 bisoé bia sili bebien

 NSILI 7

Jé me ne bo nge môt a tindi ma na bi ke binoñ?

Jé me ne bo nge môt a tindi ma na bi ke binoñ?

AMU JÉ NSILI ÔTE Ô NE MFI?

Mintyi’ane wo nyoñ a lat a nkeane binoñ mi aye tôñe wo melu m’azu.

NGE A MBE WO, Ô NGA YE BO AYA?

Tame fas ajô di: Den a ntoo ngon ébaé, Esta ba Michel ba yenan; ve Esta a lôô ve ane a yeme Michel kom. Ngume môs, be tilibane bekalate, be laane mewolo me nkolo e téléfôn, aval é ne na, môte wua a ne ne sondô éfia nyô mbok.

Bengone bebaé ba te lôte ba, Esta ba Michel ba te biane ve mo, be wuba’ane fe mone jôm. Esta nye a kômbô su’u ve valé. Ve, a nji yi na ba Michel be kandan. Éyoñe be ne nsamba, a wô’ôtan émien na a ne angôndô y’abeñ, a na, a ne édima. Nde fe, a jô nlem été na, ‘Bia Michel bia nye’esan . . .’

Nge wo fe ô nto ôkala ô ne yemban a môt asu aluk, a nge wo ô mbe ô tele été Esta, ô nga ye su’ulane bo aya?

TEBE MONE JÔM, Ô TAME FAS!

E ke binoñ a ne dasè Zambe a nga ve fo’o ve bôte be ne nlu’an. Môt a ke binoñ, te wô’ô na a ne nlu’an, a dimine belane dase te. A ne ve ane a belan mbamba éyé môt a te ve nye ane jôme ba fimine je mebo

Tame simesane na ô bete élé, éyoñe te nje wo yele ane ônon. Ke wo ye tôban abé! Avale te fe da kui, éyoñe wo tyam atiñe Zambe, ane di da jô na: “Mi sa’ale mbia nkeane binoñ.”1 Bethessalonicien 4:3, MN.

Mbia be mame mevé bi ne tôbane me éyoñe bia tyam atiñe te? Kalate Zambe a jô na: “Nyô a [ke binoñe mbia nkean], a bo abé de andamane nyôle jé émien.” (1 Becorinthien 6:18) Amu jé bi ne jô nalé?

 Beyeme mam be yeneya na, bisoé bia ke binoñ teke na bi ne nlu’an, bi wô’ô tôban avale minju’u di:

  • NJÔBAN. E bisoé bi nga ke binoñ te yene bi za’a luk, abui y’été da jô na, é nga su’ulane jôban.

  • ABAN. Éyoñ be maneya ke binoñ, môt ase a sili émiene na: ‘Za mfe a jô’ôbôya a nye?’

  • E WÔ’Ô ANGÔNDÔ. Nya ajô a ne na, mona minga a dañe yi na, mona fam a kamane nye, sa ke na a belane nye. Mona fame ki, a nji dañe semé mona minga a kañese tyi’ibi na be ke binoñ.

  • Jôme bi ne ba’ale: Nge ô kele binoñ ôsusua na wo luk, wo ye ndaman édima das ô bili. (Beromain 1:24) Nyule jôé é ne angôndô ya mfi, te jô’é na be belane je mbia mbelan!

Bi ngule ya tôñ atiñe Yéhôva da jô na bi ‘sa’ale mbia nkeane binoñ.’ (1 Bethessalonicien 4:3) Nde, nge wo lu’u môs éziñ, wo ye bo ngule ya ke binoñ. Valé nye ñhe, wo ye kôme bi meva’a ya ke binoñ teke jôban nge sili womiene minsili, nge tôbane minju’u mi akui éyoñe môt a ke binoñ te wô’ô na a ne nlu’an.Minkana 7:22, 23; 1 Becorinthien 7:3.

 WO SIMESAN AYA?

  • Ye môt a kôme nye’e wo, a ne yi na, nyule jôé é ndaman a na, ô jañelé éjijine jôé?

  • Ye môt a kôme nye’e wo, a ne tindi wo na, ô bo jam é ne ndaman élate jôé a Zambe?Behébreu 13:4.