Kele vôm ô ne lañe de

Kele sous-menu

Kele tep

Bengaa be Yéhôva

Bulu

Biyalane ya minsili 10 bisoé bia sili bebien

 NSILI 8

Jé ma yiane yem nge môt a bômbô a ma a ngul?

Jé ma yiane yem nge môt a bômbô a ma a ngul?

AMU JÉ NSILI ÔTE Ô NE MFI?

Mbu ôse, befam ba bômbô a bizu’u bi binga a ngul. Bisoé mbie bia dañe tôban avale jam ete.

NGE A MBE WO, Ô NGA YE BO AYA?

Môt a nga bômbô a Annette a nga wua nye tyia, ôsusua na Annette a yeme jam a nga yi na a bo nye. Annette a jô na: “Me nga bo mam mese asu na me titane nye. Me nga jeñe na ma bam, ve teke kui na ma kuli éduñ éziñ a anyu dam. Me nga sô’ôlô nye, me lume nye bikuta, me wôté nye biaé, a lume lume nye mebo. Éyoñe te me nga wô’ô ve ane ôtyeñ ô nga nyiine ma nyôl été. Me ve jañelé mengule mam mese.”

Nge wo ô nga tebe aval été éte, ô nga ye bo aya ?

TEBE MONE JÔM, Ô TAME FAS!

Ja’a wo jeñ a ngul ése na ô tabe ntyel éyoñ ése, ékoziñ éyoñ ô ne e nseñ alu, mbia jam a ne fe kui wo. Kalate Zambe a jô na: “Ndañan mbi ô nji bo jôme ya beke mimbi, a ndañane bita ô nji bo jôme ya mingungu, . . . [amu] éyoñ a ndôba’ane bi akui be be bese.”Ecclésiaste 9:11.

Jam é nga kui Annette da kui fe abui bisoé den. É ne kui na, bôte ba bômbô a bisoé a ngu, be bo bôte bisoé bite bi nji yem, ve biyoñe biziñe a ne fe bôte ba yem, a ne bo bo bivuvumane biap. Valé a bili ve mimbu awôm, Natalie a nga tôbane jam ete; môt éziñe ya fefele vôm be mbe be too, a nga bômbô a nye a ngu. Natalie a jô na: “Me mbe me ko mbia woñ, me mbe fe me wô’ô ôson, jôme te nje me nji tate kate môt jam é nga kui ma.”

 SA KE WO Ô NE BIJÔ

A za’a kui den, Annette a ngenan a va’a émiene bijô ya jam é nga kui nye. A jô na: “Me ngenane me simesane jam e nga boban alu te. Ma simesane na me nga yiane ke ôsu a juan asu na me titane nye. Nya ajô a ne na, éyoñ ôtyeñ ô nyiineya ma nyôl été, me nga koo mbia woñ. Me nji be ngule ya beta bo jôm, ve ma wô’ôtane ve ane me nga yiane bo jôm éfe.”

Nathalie fe a ve émiene bijô. A jô na: “Me nji yiane tabe mamien avale mebune te. Bebiaé bam be nga kôme ma jô na, éyoñe ma bo bivôé nseñ, bia monyañe wom bia yiane tabe nsamba, ve me nga bo be melo. Ma simesane na mamiene me nga bo na, môt a mbe a too bia fefel, a bo ma jam ete. Jam ete e nga taé nda bôte jam ése nlem, a ma buni na, ma ma yiane mekua. Jôme te nje ja bo na, me tu’a dañe wô’ô nlem mintaé.”

Jé ô ne ngule ya bo nge wo fe wo wô’ôtan ane Nathalie ba Annette? Tate yeme na ô nji yi na avale jam ete e kui wo. Abui bôt da nyoñe jam ete ane fianga, a jô na befam be ne nalé, a na, nge ba bômbô a mona minga a ngul, a ne amu émien a te jeñ. Ve e nji yiane na, be bômbô a môt a ngul. Nge môt a nga bo wo avale mbia jam ete, sa ke wo ô ne bijô!

É ne été na, e lañe bifia “sa ke wo ô ne bijô”, a ne tyi’ibi jam; ve e bo te ve womiene bijô, a ne jam e ne ayaé. Abui bobebinga da ba’ale jam e nga kui be e nlem été, a nalé a bo na be juk abui, amu ba ve bebiene mekua. Ve nge ô tabe évô, wo ye volô za? Ye womien, ye môt a nga bômbô a wo a ngul? E ne mfi na ô fas a bo aval afe.

KOBÔ’Ô

Kalate Zambe a jô na, éyoñe Job a te’eya a minjuk, a nga jô na: “M’aye kobô ayôle ya nleme wom été.” (Job 10:1) Wo ye yene mvolan nge wo bo ane nye. Kate môt ô too nye ndi jam e nga kui wo, nalé a ye volô wo ôte’ete’e ôte’ete’e na, ô dañe nju’u ôte, a na, ô dañe mbia b’asimesan be ne wo nlem été.

Mintaé mi ne wo nlem mi ne bo adit asu na ô be’e mie étam. Sili’i mvolan, laan a môt éziñ

Annette a me’ete ajô te. A jô na: “Me nga laan a mvôé jam, nde a nga lebe ma na me ke yene bemvendé ya akônda. Mboon ôte ô nga volô ma, amu bemvendé be nga yene ma abui biyoñ, a kate ma mam me mbe me kômbô wôk. Be nga kate ma na, sa ke ma me nga bo na jam ete e kui. Me nji bi atañe mekua ajô te.”

Nathalie a nga laan a bebiaé bé. A jô na: “Be nga su’u ma. Be nga jô ma na me laan a bemvendé; nalé a nga volô na, mintaé a ôlun bi mbe ma nlem, bi taté na bia man.”

Meye’elane fe me nga volô Nathalie. A jô na: “Meye’elan me nga volô ma, e dañe dañ éyoñe me mbe me wô’ôtane na me vo’o kate môte jam é mbe ma nlem. Éyoñe ma ye’elan, me ne kui nleme wom ôse. Nalé a soo ma mvo’é, a nlem ô bôô ma si ne mieññ.”

Wo fe ô ne yene na, ‘éyoñe ya bo mvo’é’ é ne fe. (Ecclésiaste 3:3) Nyoñe womiene ngap, mfa’a ya minsôn, a mfa’a ya ôsimesan. Jeñe na ô kôme wo’an. Sili’i fe Yéhôva mvolan, nnye a ne Zambe ya mvolane minlem.2 Becorinthien 1:3, 4.

 NGE Ô MBILI ÔKALA YA YEMBAN A MÔT ASU ALUK

Nge ô ne ngone minga, a nge môte mia nye mia yemban asu aluk a kômbô tindi wo na ô bo mbia jam, kate nye a ayo’o ése na, “Jé wo bo di!” nge ke na, “Vaa me wo nyu!” Te koo woñe na a ye jô wo na mi kandan. Nge a kandane wo, yeme na, a nji bo avale môte da yiane wo. Wo yian avale môt da semé nyôle jôé, a miñye’elane ya Kalate Zambe wo tôñ.

MINSILI ASU ÉYOÑ MÔT A YEMETE WO ÉBON A NGUL

Coretta a jô na: “E sikôlô, bobefam béziñ be mbe be limiti ma boté, be mbe fe be jô’ô ma mam méziñ asu na me wô’ô ôson. Be mbe be jô’ô ma na, nge bia be be bia ke binoñ, ma ye dañe bo mvo’é.”

Wo ô lôô aya:

  1. Ba bo nye fianga?

  2. Ba bo nye ayas?

  3. Ba yemete nye ébon a ngul?

Candice a jô na: “E metua été, mona fam éziñ a nga taté na a jô ma mam me ne nyé, nde a nga bi ma wo. Ane me nga sô’ôlô nye wo, a jô nye na a kôlô ma mis. A nga fombô ma ane nyô a jô na me ne akut.”

Wo ô lôô aya:

  1. A mbe a bo’o nye fianga?

  2. A mbe a bo’o nye ayas?

  3. A mbe a yemete nye ébon a ngul?

Béthanie a jô na: “Mbu ô nga man, mona fam éziñ a mbe a jô’ô ma éyoñ ése na, a nye’e ma, a na, a yi na bia nye bi bo ébon. Me nga titane nye me te’é. Biyoñe biziñ, a mbe a kele a nambe ma wo. Me mbe me jô’ô nye na a jô’é ma, ve a teke wôk. Môs éziñ, me mbe me tiñeti minkole ya bikôndé biam, nde a nga nambe ma mekan.”

Wo ô lôô aya:

  1. A mbe a bo’o nye fianga?

  2. A mbe a bo’o nye ayas?

  3. A mbe a yemete nye ébon a ngul?

E mame mete melal, éyalan é ne mvo’é, é ne ji lale (C).

Amu jé bi ne jô na, e yemete môt ébon a ngul a selan a ayas, nge fianga?

Amu na, ô nji kui tyiñ a môt a yemete wo ébon a ngul. Ja’a éyoñ wo kate nye na a jô’é wo, a ke ke ôsu.

E yemete môt ébon a ngul a nji bo mone jam. A ne jam é ne bo na, môt a bômbô a wo a ngul.