Kele vôm ô ne lañe de

Kele sous-menu

Kele tep

Bengaa be Yéhôva

Bulu

Biyalane ya minsili 10 bisoé bia sili bebien

 NSILI 3

Aval avé me ne yeme laan a bebiaé bam?

Aval avé me ne yeme laan a bebiaé bam?

AMU JÉ NSILI ÔTE Ô NE MFI?

Nge wo yi na ényiñe jôé é bo abeñ, wo yiane yeme nyiñ a bebiaé bôé.

NGE A MBE WO, Ô NGA YE BO AYA?

Tame simesane jame di: Bi ne môse Nté wua, mame ngô’é me kuiya. Geoff, mimbu 17, a maneya bo bisaé bié; nde a nyoñe mon éyoñe ya wo’on. A bo’oé télé, a kôme ñhe tabe éto a dañe nye’e.

Atemeteme na, ésa a zu tebe mbé yôp, a nji wô’ô mvaé.

Eyoñe te a jô nye na: “A Geoffrey, wo som, wo zu tabe valé, ô yene’e télé, éyoñe wo yiane ke volô monyoñe na a yé’é sikôlô! Ô ne étyi te bo jame ba jô wo na ô bo!”

Geoffrey a kobô menyiñ: “Ô beteya fo’o so.” Ésa a wô’ô jôm a jô.

Nde a subu nye bebé a jô nye na: “Wo jô aya aa?”

“Me nji jô jôm a Pa,” a fombô’ô yôp.

Ésa a wô’ôya nye nya ôlunu. Nde a jô nye na: “Te bo’o ô kobô ma nalé waa! Bia wo bi nji bo ôkala!”

Nge wo ô mbe ô tele été Geoff, ô mbe ve bo aya asu na jam éte é bo teke kui?

TEBE MONE JÔM, Ô TAME FAS!

E laan a bebiaé bôé a ne ve ane wo dutu metua. Nge ô koone na njoñ ô ne mfetan, wo ye nyoñe zene fe.

 ÉVE’ANE JI:

Ngone minga é too jôé na Léa a jô na: “Ma kate kui na me laan a ésa wom. Biyoñ biziñ, ma taté na ma kañete nye jam éziñ, éyoñe te ma viane wô’ô na: ‘Ma wo too ô kobô a nye?’”

LÉA A NE NGULE YA BO MAME MELA.

  1. E bame ésa.

    Léa a jô ésa na, “Ye wo vô’ôlô fo’o ma, jame ma kate wo di é ne nya mfi!”

  2. E bo te beta kat ésa mame mé.

    Léa a tyi’i fo’o na, a zu ba’ale mame mé mese e nlem wé.

  3. E yange mbamba éyoñe ya beta zu laan a nye.

    Léa a zu laan a ésa éyoñ éfe, nge ke na, a tili nye kalate asu na, a kate nye jame da ndeñele nye.

E mame mela ma, jam avé ô ne lebe Léa na a bo?

TAME FAS: Ésa Léa a fase jam afe, a nji yene na Léa a wô’ô ôlun. Nde, nge Léa a tobe jam ôsu (A), e bame ésa a ye volô jôm éziñ; sa ke nalé nye é bo na ésa a dañe vô’ôlô jôm a kômbô jô. A mboan ôte ô ne liti na Léa a nji semé ésa wé. (Beéphésien 6:2) Nya ajô a ne na, nalé a nji fo’o bo mfi asu bese bebaane.

Fo’o ve aval ô nji yi na, jôm éziñ é kamane wo na, ô ke kui vôme wo ke, avale te fe, ô ne jeñe zene ya bi mbamba minlañ a bebiaé bôé

Akusa bo na jame baa (B) é ne tyi’ibi ya bo, ve, é nji bo zene ya fek. Amu jé bia jô nalé? Amu na, nge Léa a yi na a dañe minju’u a tôbane mie, a yiane laan a ésa. A fe na, nge a yi na ésa a volô nye, a yiane kate nye minju’u a tôbane mie ényiñe jé. E ba’ale mame mé nlem, a vo’o ke jalé jame da ya mame bi ndôme lañe yôbe le.

Ve, nge Léa a tobe jame lale (C), nalé é volô nye na, a bo te jô’é biôme bia fete nye zen, bi kamane nye na a ke kui vôm a ke. A jeñe na a laan a ésa éyoñ éfe. Nge a tili ésa kalate, nalé a ne volô nye na, a wô’ôtane mvo’é.

E tili ésa kalate a ne fe volô nye na, a kôme nye kat aval a wô’ôtan. Éyoñ ésa é lañe kalate ate, éyoñe te nje é tu’a wôk jé Léa a mbe a kômbô’ô kate nye, a jôme da tyelé nye nleme yôp. Jame lale nde é ne mfi asu Léa ba ésa. Ja’a a laan a nye, nge ke tili nye kalate, jame lale (C) é ne fo’o zene Kalate Zambe a liti bia, nge bia kômbô ‘tôñe mam ma so mvo’é’Beromain 14:19.

Jé éfe Léa a mbe ngule ya bo?

Nge ô bili mbamba ôsimesan éziñe mfa’a ôte, fasek aval avé ôsimesan ôte ô ne bo mfi.

 KOBÔ’Ô AVAL É NE TYI’IBI YA WÔK

Te vuane na, ô ne jô jôm éziñ, bebiaé bôé ke be viane wô’ô aval afe.

BI TAME NYOÑ ÉVE’AN:

Bebiaé bôé ba sili wo jé ja ndeñele wo. Éyoñe te wo yalane be na, “Me nji kômbô kobô ajô te.”

Ve bebiaé bôé ba viane wô’ô na: “Me too ke mia ndi. Bemvôé bame mbe mé kate jôme ja ndeñele ma, sa ke mia.”

Tame simesane na, ô tele minju’u été, éyoñe te bebiaé bôé ba jô wo na, ba kômbô volô wo. Wo’o ki ô viane yalane be na: “Te tyelane minleme yôp, nju’u te wo dañe ke ma.”

  • Jé bebiaé bôé be ne wôk?

  • Ô ne yeme yalane nge wo jô aya?