Kele vôm ô ne lañe de

Kele sous-menu

Kele tep

Bengaa be Yéhôva

Bulu

Bula’ane be Yéhôva

 NGAP 2

Ntyélane minleme yôp—“Bia miatebane mimfa’a mise”

Ntyélane minleme yôp—“Bia miatebane mimfa’a mise”

“Bia nnôme wom bi nga tyam alu’u dangan, valé bi tabeya mimbu 25. Bone bangan be nga kôlô benya mejôô. Nde me nga bo ntutuñ. Nlem ô nga kone ma. Ane nyôl ése é nga mane ma bo nte’an; me nga buni na me se ngule ya bo jôm éziñe na me kôme mame mete. Ane me nga taté na ma bu’i bisulan, a télé fe nkañete.”—June.

E NE kui na nlem ô tyebe môt ase yôp, to’o bebo b’ésaé be Zambe. Ntili besam a nga jô na: “Abui minsimesan é ne me nlem été.” (Besam 94:19) Yésus a nga jô na, e melu ya asu’ulan, “e mam ma tyelé nleme yôp ényiñ” mme m’aye dañe bo na, nkañane Yéhôva ô bo ayaé. (Lukas 21:34, mfefé nkôñelan) Ye nlem ô tyele wo yôp ajô moné, mejô ya nda bôt, nge ôkon? Aval avé Yéhôva a ne volô wo na ô dañe me?

“Ngule é ne tee ave’ane”

Biabebien bi se ngule ya dañe biyebe bi ne bia minlem. Nlômane Paul ô nga tili na: “Bia miatebane mimfa’a mise,” “bia kui mevôm me ne adip . . . , ba fite bia.” Ve a nga beta fe jô na  “ve te ke ko’oban,” “bia su’ulane tulan,” “ve te jaane bia.” Jé j’ave bia ngule ya jibi? “Ngule é ne tee ave’ane.” Ngul éte j’aso be Zambe wongan ya ngul ése, Yéhôva.—2 Becorinthien 4:7-9, mfefé nkôñelan.

Simesa’an aval ô nga nyoñe “ngule é ne tee ave’ane” melu ya mvus. Ye mesikôt éziñ a nga ve wo ndi nleme na, Yéhôva a nye’e fo’o wo? Mbunan wôé na, Zambe a ye fo’o tôé mame mese a nga ka’a bia ô nga nen. Ô nga nyoñ éyoñe ya kate bôte ndi nleme jôé ya nyiñ e paradis. Éyoñe bia ke bisulan a kate bôte bevo’o mame bia buni, bia bi ngule ya jibi mame ma tyelé bia minleme yôp, éyoñe te nje bia ye bo ngul ya kañe Yéhôva minlem mi bôô bia si ne mieññ a mevak.

“Tameka tye’an a yen ane Yéhôva a ne mvaé”

Ô ne simesane na, wo tôñ akpweñ abaé éyoñe jia. Yéhôva a jô bia na, bi taté jeñ Éjôé jé, a bo mame ya nsisim. (Matthieu 6:33; Luc 13:24) Minjuk, aval ane étibila’a, akon a mejô ya nda bôte me ne bo na ô bili atek. Ye asu ésaé dôé da nyoñe wo abui éyoñ a ngul ô ne belane je akônda? Ô ne fe bili atek éyoñ ô bili abui mame ya bo, ve teke éyoñ, nge ngule ya bo mame mete. Éyoñ éziñ ô ne simesane na, mame Yéhôva a jô wo ma lôte wo nkôñ.

Yéhôva a yeme tebe été jangan. A nji kañese na bi bo mame ma lôte bia nkôñ. A yeme fe na, abui éyoñe da sili asu na bi yete minsôn a nlem.—Besam 103:13, 14.

Tame yen aval avé Yéhôva a nga nyoñe nkuli mejô Élie ngap. Éyoñ a nga bi ate’e nlem, a ko woñ, ane a nga tup a ke nkôte si. Ye Yéhôva a nga komekane nye a jô nye na a bulane ke bo ésaé jé? Momo. Yéhôva a nga lôm éngele biyoñe bibaé na a vele Élie, a ve nye bidi. Mvuse melu 40, nlem ô mbe ô ngenan ô tyele nye yôp. Jé Yéhôva a nga beta bo? E jame ôsu, Yéhôva a nga liti nye na a ye ba’ale nye. Jame baa, Yéhôva a nga ve nye ngule nyôl a “ôyôme tyiñe  nne mieññ.” Ane Yéhôva a nga su’ulane kate nye na bôte betoyini befe ba ke ôsu a kañe nye. Été été, nkuli mejô Élie a nga beta bo ayôñ. (1 Bejô bôt 19:1-19) Ñye’elan ôvé bi ne nyoñ? Éyoñe nlem ô mbe ô tyele Élie e yôp, Yéhôva a nga jibi nye a koo nye éngôngo. Yéhôva a nji tyendé. A nyoñe bia ngap avale da da.

Éyoñe wo simesane jôm ô ne ve Yéhôva, bo’o zôsô. Te ve’e mam ô ne bo den a ma wo zu wo bo. Bi tame nyoñ éve’an: môt a télé mmatane mbil ayap éyoñ, a se ngule ya beta mate aval a mbe a mate’e ôsusua. Ve a taté mone mbil; mone mbil ate a ye ve nye ngul a ôjibi ya mate avôl. Bekristene fe be ne ane bemate mbil. Ba yé’é mmatan, be bili jôme ba sôñ. (1 Becorinthien 9:24-27) Wo fe ô ne bo jame wo yeme na é ne tyi’ibi mfa’a ya ékaña’a wo ve Yéhôva. Ô ne tyi’i na wo ke ésulan. Sili’i Yéhôva mvolane na ô ke ôsu a bo aval ô maneya tyik. Avale wo ye yeme mbunane été, nde fe wo ye ‘tyek a yene na Yéhôva ane mvaé.’ (Besam 34:8) Yeme na, jam ése wo bo amu nye’ane wo nye’e nye é ne dia mise mé, to’o wo buni na jôme wo te bo é ne tyôtyoé.—Luc 21:1-4.

Yéhôva a sili bia ve jame bi ne bo

“Biañe me nga too me yange”

Aval avé Yéhôva a nga ve June ngule ya bulane be nye? Émien a kate bia: “Me nga ke ôsu a ye’elane Yéhôva na a volô ma. Mvuse ya été, mone me nga koone nnôme wom a bili, a nga kobô ma ajô ya assemblée e tison me nga too. Nde me nga tyi’i na ma ke tabe assemblée môse wua. Ngo’o aval ava’a me nga wôk na ma beta tabe a bebo bésaé be Yéhôva! Assemblée ate a mbe fo’o biañe me nga too me yange. Eyoñe ji me mbili meva’a ya beta kañe Yéhôva; me kômeya yem amu jé ma nyiñe si va. A ma yeme fe na ma yi a na m’ayiane kañese mvolane wo so ma be bobenyañe bam a bendôme bam. Ma ve akiba amu éyoñe ma yiane bulane be Yéhôva é kpwaaneya.”