Kele vôm ô ne lañe de

Kele sous-menu

Kele tep

Bengaa be Yéhôva

Bulu

Bula’ane be Yéhôva

 NGAP 4

Mekua ya nlem-“Tune ma mfa’a ya abé dam”

Mekua ya nlem-“Tune ma mfa’a ya abé dam”

“Mfefé asu ésaé dam é nga bo na nda bôte jam é nyiñe mvaé; ve é nga tindi fe ma na, me bo mame ma kolé bôte bevok ôbak. Me nga taté na ma vôman a ényiñ. Me nga taté fe na ma bo pôlitik, a ke bisulan e miñyebe mife. Nde me nga voé nsisim tañe mimbu 40. Nté ôse mimbu mite mi nga lôt, me nga buni na Yéhôva a vo’o ki beta jamé ma. Me mbe me simesa’ane fe na, me se ngule ya jamé mamien. Amu me mbe me yeme benya mejôô, éyoñe me nga tyi’i na ma tôñe mbia zen.”—Martha.

JÔM éfe é nji bo adite mbe’e ane mekua ya nlem. David a nga tili na “Mbia be mam, me yandaneya me nlô yôp avale ane adit mbe’e, m’adañe me adit.” (Besam 38:4) Abui bekristene be ne ntya’an a ôlun. Ba buni na Yéhôva a se ngule ya beta jamé be. (2 Becorinthien 2:7) Ye ôsimesan ôte ô ne zôsôô? To’o ô nga bo mbia be mam, ye wo simesane na ô ntele Yéhôva ôyap aval é ne na, a se ngule ya beta jamé wo? Momo!

“Za’ané éyoñe ji; bi tame fasan”

Yéhôva a ne te bene bebo mam abé ba kôñelane minlem. Ve a jeñe jeñe be! Yésus a nga kañete nlañe monafam a nga jañ. A nga liti na Yéhôva a funan ésa mon a nga ke a vôman ényiñ e si é ne ôyap. Éyoñ ayap éyoñ e lôteya, mone ve tyi’i na a bulane nda be ésa wé. “A ngenane ôyap, ane ésaa a nga yene nye a wô’ô nye éngôngo a ke mbi, a wubane nye e tyiñ, a latane nye anyu.” (Luc 15:11-20) Ye wo kômbô subu Yéhôva bebé? Ye wo simesane na ô “ngenan ôyap” a nye? Aval ane ésa ya nkañete Yésus, Yéhôva a wô’ô fe wo éngôngo. A bili évévé ya jô wo na ‘mbamba nsoane.’

Ve jé ô ne bo nge wo buni na, mam abé môé me ne angôndô a me ne fe abui mise me Zambe na a jamé me? Éngôngo bia ye’elane wo na ô fombô nloene Yéhôva ô ne Ésaïe 1:18: “‘Za’ane éyoñe ji, bi tame fasan’, nalé Yéhôva a jô: ‘akôsa bo na mam abé menan me ntoo évele ne tyañ, me aye bo éfumulu avale ane sut.’” Ôwé, ja’a mam abé mete me ne ane abat é ne évele ne tyañ éfumulu éyé été, Yéhôva a vo’o ke kate jamé me.

Yéhôva a nji yi na nleme wôé, ô ke ôsu a ve wo mekua. Éyoñe Yéhôva a jaméya wo, mone môte ya nlem wôé a nto mfuban. Aval avé ô ne bi mbamba jam ate? David a nga bo mam mebaé: Di ôsu a nga jô na: “me aye meme Yéhôva mintyamane metiñe miam.” (Besam 32:5) Simesa’ane na, Yéhôva a loeneya wo na ô subu nye bebé a zene ya meye’elan. Yéhôva a loeneya fe wo na ô ‘zu éyoñe ji, mi tame fas.’ Kañese’e nloene te. Meme mam abé môé be Yéhôva, a kate nye mame mese ma taé wo nlem. Amu avale David émien a nga yen, nde a nga jô a nlem wé ôse na: “Tune ma mfa’a ya abé dam. . . . Nleme ô ne ntya’an a ôlun, a Zambe, wo ye bo te bene wô.”—Besam 51:2, 17.

Di baa, Yéhôva a nga volô David a zene ya nkuli mejô Nathan. (2 Samuel 12:13) Melu ma, Yéhôva a belane bemvendé ya akônda. Bemvendé bete be bili ñye’elan avale be ne volô bebo mam abé ba kôñelane minlem na, be beta late ngbwa a Yéhôva. Éyoñe wo subu bemvendé  bebé, b’aye belane mejô me Zambe a meye’elane na be sili wo nleme si. Nalé aye sé’é nge mane mbia b’asimesane wo too ô bili, a volô wo na ô yet nsisim.—Jacques 5:14-16.

Yéhôva a yi na, wo fe ô bi mevak me ne éyoñ mone môte ya nlem a ne wo mfuban

“Ébotan a nyô ntyaman metiñe wôé ô ntoo njaman”

Wo ye buni na, mmeman abé dôé be Yéhôva, a nsubane bemvendé bebé, wo ye bo aval ayaé jame wo be tame bo. David fe a nga bi aval asimesane te. A nga “tabe évô” ayap éyoñ mfa’a ya abé dé. (Besam 32:3) Ve a nga su’ulane yene mfi, éyoñ a nga meme abé te be Zambe, a kôm abo dulu dé.

Beta ébotane David a nga bi a mbe na, a nga beta bi ava’a dé. A nga tili na: “Ébotan a nyô ntyaman metiñe wé ô ntoo njaman, nyô abé dé é ne mbutane yôp.” (Besam 32:1) A ye’elane na: “A tat, kui biyaé biam; a anyu dam d’aye liti ékaña’a jôé.” (Besam 51:15) David émien a nga kañete bôt ajô Yéhôva, amu a nga jamé abé dé, a kôté nye mekua ya nlem.

Yéhôva a yi na, wo fe ô bi meva’a me ne éyoñ mone môte ya nlem a ne wo mfuban. A yi fe na ô kañete bôte bevo’o ajô dé a minsoñane mié, teke mekua nlem, ve a beta avak. (Besam 65:1-4) Simesa’ane nloene Yéhôva wu na bi kôñelane minlem a bulan: “Nde mam abé menan m’aye bo ngule ya vas, nalé melu me ya évôvoé me aye so be Tate.”—Mam minlôman 3:19.

Jamete é nga kui be Martha. A jô na: “Mone wom a nga lôme ma Tour de Garde a Réveillez-vous! Ôte’etek ôte’etek me nga taté na ma beta yembane a Yéhôva. Jam é mbe é dañ ayaé été, é mbe nsilane njamane mam abé mese me nga bo. Mvuse ya valé me nga su’ulane de bo a subu nye bebé a zene ya meye’elan. É ne ayaé ya buni na, me nga yange mimbu 40 na me bulane be Yéhôva. Nkañete wom wo liti na, to’o mimbu mi lôteya abui, môt ase ya be bia a ne beta bi ma’a ya kañe Yéhôva, a bulane nye’ane wé été.”