Kele vôm ô ne lañe de

Kele sous-menu

Kele tep

Bengaa be Yéhôva

Bulu

Bula’ane be Yéhôva

 NGAP 3

Mintaé ya nlem—Éyoñe ‘bi bili ajô a nyô mbok’

Mintaé ya nlem—Éyoñe ‘bi bili ajô a nyô mbok’

“Monyañe wom ya akônda a nga bôté ma ajô na me nga wube nye moné. Bôte bevo’o be nga wô’ô de, be nga taté na ba sa’ale ma. Mvuse ya valé, nde monyañe wom ate a nga zu kate ma na, éyoñ a tu’a ya fase jamete, a nga yene na ma yeme ke de. Akusa bo a nga sili ma njaman, me se ngule ya jamé nye môs éziñ, amu jamete é nga bo ma nleme mbia mintaé.”—Linda.

LINDA a nga wô’ô mbia ôlun e jame monyañe ya akônda a nga bo nye. Ye wo fe ô tebeya aval été te? Jam é ne éngôngol été é ne na, abui ya bebia é nga bili ate’e nsisim amu mbia mboane bôte bevok. Ye wo fe ô tôbaneya avale jamete?

Ye môt éziñ a ne “kandé bia a nye’ane Zambe”?

É ne fo’o ayaé ya jamé monyañe wongan ya mbunan a te bo na nlem ô taé bia. Akusa bo nalé, bekristene ba yiane nye’esan. (Jean 13:34, 35) Nge monyañe wongane ya mbunan a te bo bia jame é ne te yian, ôlun ô ne jaé bia nleme ne lut! Ôlune te ô ne bo na bi bo jam bi ne jôban.—Besam 55:12.

Kalate Zambe a jô na biyoñe biziñ, kristen a ne ‘bi ajô a nyi mbok.’ (Becolossien 3:13) Éyoñ avale jamete d’akui be bia, bi ne yen ayaé ya kôme de. Jé é ne volô bia? Fase’e miñye’elane milale mi:

Ésaa wongan ya yôp été a yeme mame mese. Yéhôva a yene mame mese ma lôtan. A yene fe ékokot ése bi atôbane, a minju’u mise mi aso été. (Behébreu 4:13) Nde fe Yéhôva a wô’ô nleme mintaé éyoñe bia tôbane minjuk. (Ésaïe 63:9) A ye ke jô’é môs éziñe na, “njuk nge ésôbôk” nge ke jam afe é “kandé bia a nye’ane Zambe.” To’o monyañe wongane ya mbunan a se ngule ya kandé bia a nye’ane Zambe. (Beromain 8:35, 38, 39) A bi nji yiane kañese na jôm éziñ, nge môt éziñ a kandé bia a Yéhôva.

E jamé a nji tinane na, bia biasé ajô te. Éyoñe bia jamé bôte be a bo bia abé, nalé a nji tinane na bia biasé abé te, nge ve de mvaé, nge ke yebe mimboane mite. Simesane na Yéhôva a se ngule ya yene abé mvaé. Ve a jamé, nge a bili beamu ya jamé de. (Besam 103:12, 13; Habakuk 1:13) Yéhôva a yemete bia na bi jamé bôte bevok, amu a yi na bi vu nye. “A ne te ba’ale ziñe nnôm éto.”—Besam 103:9, mfefé nkôñelan; Matthieu 6:14.

E jô’é ziñ, a ne asu mvo’é jangan. Aval avé? Tame ve’ele simesane nkañete wu. Wo to’é mon akok, éyoñe te wo same wo. Nge ô jô’é wo wôé ô to nsaman ayap éyoñ, wo ye simesane na akok é ntoo adit. Mba’alane ziñ ô ne fe nalé. Nté ôse wo ke ôsu a siñe môt, ôlune wo wôk, wo ye ke ôsu a nen a bo adit, w’aye fe bo womien abé. Nalé a kui, to’o éyoñe jame wo siñe de môte mbok é ne zezé. Bi ne wô’ô amu jé Yéhôva a yemete bia na bi bo te ba’ale ziñ. É ne fo’o nalé na, e jô’é ziñ a ne asu mvo’é jangan.—Minkana 11:17.

Éyoñe bia jô’é ziñ, biabebien bia yene mfi ya été

 “A mbe ve ane nge Yéhôva émiene nnye a kobô ma”

Jé é nga volô Linda na a bo te beta siñe monyañ akusa bo abé a nga bo nye? Linda a nga fase beamu Kalate Zambe a ve na bi jamé bôte bevok. (Besam 130:3, 4) Jam é nga dañe tindi Linda na a jamé é mbe vôme Kalate Zambe a jô na, Yéhôva fe a ye jamé bôte ba jamé bôte bevok. (Beéphésien 4:32–5:2) Mejô mete me nga nambe nye, nde a nga jô na: “A mbe ve ane nge Yéhôva émiene nnye a kobô ma.”

Éyoñe ji Linda a ntoo ngule ya va ziñ e ne nye nlem. Linda a nga jamé monyañe a nleme wé ôse. Den, be ntoo benya bemvôé. Linda a ke osu a kañe Yéhôva. Tabe’e ndi nleme na, Yéhôva a kômbô volô wo na, ô yeme jamé avale Linda a nga jamé.