Kele vôm ô ne lañe de

Kele sous-menu

Kele tep

Bengaa be Yéhôva

Bulu

Bula’ane be Yéhôva

 NGAP 5

Bula’ane be “mba’ale mintômba a Nnonô ya minsisime mienan”

Bula’ane be “mba’ale mintômba a Nnonô ya minsisime mienan”

Ye jame da ya mame bi ate kobô nsoé kalate wu, nge abui ya été m’afunane mam ô bili? Nge wo yalane na ôwé, wôna ô yeneya mvaé. Abui bebo b’ésaé be Yéhôva Zambe, be nga tôbane avale minju’u te. Bebo b’ésaé bete be ne ba ya melu mvus a ba ya melu ma. Yéhôva a ne volô wo aval a nga volô be na, be bi ngule ya dañe minjuk.

Yéhôva é volô wo na ô beta bulane be nye

 TABE’E ndi nleme na Yéhôva a ye bo valé asu dôé, nté wo bulane be nye. A ye volô wo na, ô dañe ntyélane nleme yôp. A ye fe volô wo na ô tyendé mbia b’asimesan, a na nlem ô bômbô wo si amu mone môte ya nlem wôé a nto teke bijô. Éyoñe te ô ne beta bulane kañe Yéhôva fufulu a bebo bisaé bé. Été jôé j’afunane été bekristene ya ntet mimbu ôsu. Nlômane Pierre a nga tili be na: “Amu mi nga dimi fé ane bone mintômba, ve éyoñe ji mi bulaneya be mba’ale mintômba a nnonô ya minsisime mienan.”—1 Pierre 2:25, mfefé nkôñelan.

Nya jam ô ne bo a ne fo’o ve na ô bulane be Yéhôva. Amu jé? Wo ye ve nleme Yéhôva mevak. (Minkana 27:11) Avale wo yem, mame wo bo me ne ve Yéhôva nleme avak, nge vindane nye nlem. É ne fo’o été na, Yéhôva a tindi ki bia a ngule na bi nye’e a kañe nye. (Deutéronome 30:19, 20) Beta mfase Kalate Zambe a nga jô na: “Môte mfe ase ngule ya zu yoé nleme wôé, womiene wo yiane wô yoé.” Nge bia kômbô kañe Yéhôva a nleme wongan ôse, bia yiane tobe na bi yoé nye nleme te. Éyoñe bia bo de, bia ve Yéhôva jôm é ne édima: e wulu aval a nye’e. Bia ve nleme wé angôndô ya abui mevak. É ne été na, jôm éziñ é se ngule ya ve’ane a meva’a wo ye bi éyoñe wo ye kañe Yéhôva a nleme wôé ôse.—Mam minlôman 20:35; Nlitan 4:11.

Nge wo beta taté na wo kañe Yéhôva aval ane ôsusua, miñyiane miôé ya nsisime mi aye jaé. (Matthieu 5:3) Aval avé? Bôte ya mesi mese ba sili na: ‘Amu jé bi ne si nyi?’ Ba wô’ô évé ya bi biyalane ya minsili ya ényiñ. Bôte be bili ñyiane te amu Yéhôva a nga té be a wô. A nga mane ta’a na bi bo nye ésaé a mevak. Teke jam afe é ne ve bia nya ava’a a lôté ji bi bili éyoñ bia kañe Yéhôva a nlem ôse.—Besam 63:1-5.

Yeme na Yéhôva a yi na ô bulane be nye. Aval avé ô ne yeme de? Tame fas: bi nga ye’elan abui asu na bi tili nsoé kalate wu. Nde mvendé ya akônda nge mone ngaa mfe a nga zu wo nye ve. Mvuse ya valé, ô nga taté nlañane ya nsoé kalate wu, a bo ane wo jô. Mame mete mese, me ne ndeme na Yéhôva a nji vuane wo. Yéhôva a loene wo na ô beta zu be nye.—Jean 6:44.

Bi bili ngule nyôl éyoñe bia yeme na, Yéhôva a se ngule ya vuane bebo b’ésaé bé be ne njañan. Kale jangan, Donna, a nga nye’e jamete amu a jô na: “Me nga kolô benya mejôô ôte’ete’e ôte’etek. Ve mamiene me nga fase Besam 139:23, 24 ajô na: ‘A Zambe, fase’e ma, a yem nleme wom: ve’ele’e ma, a yem minsimesane miam; a yen nge zen éziñ é ne abé é ne be ma, a wulu me zene ya nnôm éto.’ Me mbe me yeme na émo ji é nji bo éñjam. A me nji yiane bo mame ya été. A me mbe fe me yeme na, m’ayiane tabe ékôane Yéhôva été. Ane me nga taté na ma yene na, Yéhôva a nji bene ma. Susu’a jame me mbe na me abo é mbe ve na, me yene zene ya bulane be nye. Ma wô’ô jame me nga bo angôndô ya mevak!”

“Me nga taté na ma yene na Yéhôva a nji bene ma. Susu’a jame me mbe na ma bo é mbe ve na, me yene zene ya bulane be nye.”

Bia ye’elane na ô beta bi “ava’a Yéhôva.” (Néhémie 8:10) Nge wo bulane be Yéhôva, ô se ngule ya jôbane.