Kele vôm ô ne lañe de

Kele sous-menu

Kele tep

Bengaa be Yéhôva

Bulu

Miñye’elane ya Bible asu bongô

 ÑYE’ELAN 53

Jehojada a mbe ayo’o nlem

Jehojada a mbe ayo’o nlem

Jézabel a mbe a bili ngon é too jôé na Athalie, nye’ fe a mbe a bili mbia mefulu ane nyia. Athalie a mbe minga njô bôt ya Juda. Eyoñ nnôme wé a nga wu, mone wé a nga taté na a jôô. Ve éyoñ mone wé fe a wuya, Athalie émien a nga nyoñ éto njôô ya Juda. Ane a nga jeñe na a jian mvoñ bôt njô bôt ése, na a wôé môt ase a mbe ngule ya jôé señe jé, ja’a môt ate a mbe ndaé jé. Bôt ve zu ko nye woñ.

Jehojada Beta Prêtre, ba Joschéba minga wé, be nga wô’ô mbia be mam Athalie a mbe a bo’ok. Be nga fam binyiñ biap asu na be wube ndaé Athalie é mbe jôé na Joas. Ane be nga solé nye temple.

Éyoñ Joas a nga bi mimbu zangbwal, Jehojada a nga sulane bivete bise a belévite, ane a nga jô be na: ‘Ba’alané mimbé ya temple, a te jô’ané na môt éziñ a nyiin.’ Nde Jehojada a nga telé Joas njôô ya Juda, a jalé nye couronne nlô. Ane bôt be nga yôtane na: ‘Ényiñ Njô bôt é bo’o ayap!’

Éyoñ Athalie a nga wô’ô zô’é, ane a nga ke temple. Éyoñ a nga yen mfefé njô bôt, nde a nga yôn, a jô na: “Njoñ! Njoñ!” Ane bivet bi nga bi nye, be kuli nye atan, be su’ulane fe wôé nye. Jé bi ne jô mfa’a ya mbia be mam a nga tindi bôt na be bo?

Jehojada a nga volô ayoñ na e beta lat a Yéhôva, na e ka’ale nye na da ye kañe ve Nnye. Ane ayoñ ese e nga ke bôé temple Baal a bengulemelane bé. Nde Jehojada a  nga telé beprêtre a belévite na be saé temple, asu na bôt be zu kañe vom ate. A nga telé fe beba’ale na be ba’ale temple asu na môt a ne mvit a bo te nyiin été. Nde Jehojada ba bivete be nga telé Joas njôô. Ane ayoñ Juda e nga vak. Mbôle be mbe be kôlôya éjôé Athalie si, a amu be nga mane vaa ékaña’a Baal, ayoñ e mbe e nto ngule ya bo Yéhôva ésaé. Ye ô lôô fo’o ane ayo’o nleme Jehojada e nga volô abui bôt?

“Te koane bôt be awôé nyôle woñ, ve be se ngule ya wôé nsisim: ve koane woñ môte a ne ngule ya wôé nyôl a nsisim bibaane hel été.”​—Matthieu 10:28