Kele vôm ô ne lañe de

Kele sous-menu

Kele tep

Bengaa be Yéhôva

Bulu

Miñye’elane ya Bible asu bongô

 ÑYE’ELAN 55

Ange Yéhôva a nga kamane Ézéchias

Ange Yéhôva a nga kamane Ézéchias

B’assyrien be nga mane nyoñ meyoñ awôm ya Israël. Éyoñe ji, Sanchérib, njôô ya Assyrie a kômbô nyoñ meyoñ mebaé ya Juda. A nga taté na a nyoñ bitisone ya Juda ôte’ete’e ôte’etek. Ve tison a mbe a dañe nyamete é mbe Jérusalem. Ve Sanchérib a nji be a yeme’e na Yéhôva a mbe a ba’ale’ Jérusalem.

Ézéchias, njôô ya Juda, a nga ve Sanchérib abui moné asu na a bo te nyoñe tisone jé. Akusa bo nalé, Sanchérib a nga lôme nkane bita wé na ô ke wosane Jérusalem. Bôte ya Jérusalem be nga taté na ba ko woñ amu b’Assyrien be nga mane bômane be. Ane Ézéchias a nga jô be na: ‘Te mia ko woñ. Bôte ya Assyrie be ne ngul, ve Yéhôva a ye bo na bi bo ngul a dañe be.’

Ane Sanchérib a nga lôme Rabschaké na a ke kpwe’ele bôte ya Jérusalem. Nde a nga tebe nseñ, a taté na a bam, a jô’ô na: ‘Yéhôva a vo’o volô mia. Te jô’ané na Ézéchias a du’u mia. Teke zambe éziñ a ne nyii mia mo mangan.’

Ane Ézéchias a nga sili Yéhôva jam a yiane bo. Nde Yéhôva a nga jô nye na: ‘Te ko mejô me Raschaké woñ. Sanchérib a ye ke nyoñe Jérusalem.’ Mvuse ya valé, Sanchérib a nga lôme Ezéchias bekalate. Bekalate bete be mbe be jô’ô na: ‘Te wo ngan. Yéhôva a vo’o nyii wo.’ Nde Ézéchias a nga ye’elan, a jô’ô na: ‘Éngôngol a Yéhôva, nyii bia, asu na môt ase a yeme na, wo étam ô ne nya Zambe.’ Ane Yéhôva a nga jô nye na: ‘Njô bôt ya Assyrie a ye ke nyiine Jérusalem. Mamien ma ye ba’ale tisone jam.’

Sanchérib a mbe a too ndi na, ana’ana, Jérusalem a ye bo tisone jé. Ve alu éziñ, Yéhôva a nga lôme ange wé be nkane bita Sanchérib.  Ange ate a nga wôé bezimbi 185 000! Njô bôt Sanchérib a nga mane jañele biwôlô bezimbi bié. A nji be ve bo aval afe, fo’o ve bulan ja dé. Yéhôva a nga ba’ale fo’o Ézéchias a Jérusalem, fo’o ve aval a nga jô. Nge ô mbe Jérusalem éyoñ éte, ye ô nga ye fo’o tabe Yéhôva mebun?

“Ange Yéhôva a bômane ba b’ako nye woñ, A nyii be.”​—Besam 34:7