Kele vôm ô ne lañe de

Kele sous-menu

Kele tep

Bengaa be Yéhôva

Bulu

Miñye’elane ya Bible asu bongô

 ÑYE’ELAN 43

Nsem Njôô bôte David a nga bo

Nsem Njôô bôte David a nga bo

David a nga taté na a jôé éyoñ Saül a nga wu, e zu koon a bili mimbu 30. Ngô’é éziñ, a mbe a too andile ya nda jé, nde a nga yen abeñe minga. Be nga kate David na minga ate a ne jôé na Bath-schéba, a na, a ne nga Urie, mone bezimbi. Nde David nga bañete nye nda jé, a jô’ôbô a nye, a ve ke nye abum. David a nga jeñe na a solé jam a nga bo. Nde a nga jô évete bezimbi jé na é telé Urie vôm bita bi ne ngul, a na, be li’i nye a tele étam. Urie a nga wu mewosan mete, nde David a nga lu’u Bath-schéba.

Yéhôva a nga yene jam ete. Nde a nga bo aya? A nga lôme nkuli mejô Nathan be David. Nathan a nga jô nye na: ‘Nkukume môt ô mbe ô bili abui mintômba, nzôzoé ki ô mbe ô bili ve ôyôme mon ngal ntômba wua a mbe a nye’e abui. Ane nkukume môt ô nga nyoñ ntômba wua nzôzoé ô mbe ô bili.’ Ane David a nga wô’ô ôlun, a jô na: ‘Môt ate a yian awu!’ Ane Nathan a nga jô nye na: ‘Wo ô ne môt ate!’ Ane nleme David ô nga taé nye, nde a nga jô na: ‘Me semeya mise me Yéhôva.’ Nsem ôte ô nga soo David a nda bôte jé abui minjuk. Yéhôva a nga foñôsô David, ve a nji wôé nye amu David a nga mem abé dé, a sulu fe émiene si.

David a mbe a kômbô’ô lôñe Yéhôva nda, ve Yéhôva a nga tyi’i na Salomon, mone wé, nnye a ye lôñe nye nda. Akusa  bo nalé, David a nga kômesan abui biôm asu Salomon, a mbe a fase avale di: ‘Temple Yéhôva a yiane bo abeñ. Salomon a ngenane mongô, ma ye kômesan biôm asu na me volô nye.’ David a nga ve abui moné asu ésaé melôñ éte. A nga jeñe fe bôte ba yeme bo ésaé. A nga kôane fe or a argent, a bilé bi cèdre bi so’o Tyr a Sidon. Éyoñ a mbe a nga zu wu, David a nga liti Salomon aval a yiane lôñ temple. A nga jô nye na: ‘Yéhôva a nga jô me na me tili mam ma asu dôé. A ye volô wo. Te ko woñ. Bo’o ngul, a bo’o ésaé jôé.’

“Nyô a buti minkobane mié, mam mé m’aye ke ôsu; ve nyô ase a meme mie a jô’é mie, nnye a ye koban éngôngol.”​—Minkana 28:13