Kele vôm ô ne lañe de

Kele sous-menu

Kele tep

Bengaa be Yéhôva

Bulu

Miñye’elane ya Bible asu bongô

 ÑYE’ELAN 33

Ruth ba Naomi

Ruth ba Naomi

Éyoñe zaé é nga kui si ya Israël, minga éziñ a to jôé na Naomi, ba nnôme wé a bobefam bé bebaé, be nga kôlô, a ke si ya Moab. Mvus ya valé, nnôme Naomi ve wu. Bone bé be nga su’ulane fe lu’u bengone ya Moab, Ruth ba Orpa. Étun é nga bem, be’e fe ve wu.

Éyoñe Naomi a wô’ôya na zaé é maneya si ya Israël, nye ve tyi’i na a bulane si jé. Ruth ba Orpa be nga tôñe nye. Ve éyoñ be wuluya mone nté, ane Naomi a nga jô be na: ‘Mi nga too mbamba beyal asu bone bam, a mi nga bo mbamba be mam asu dam. Ma yi na mi beta yene meluk. Bula’ané Moab.’ Ane be nga jô nye na: ‘Bia nye’e wo! Bi nji kômbô li’i wo étam.’ Ve Naomi a nga yemete be na be bulan. Ane Orpa a nga bulan, ve Ruth a nga li’i. Naomi a nga jô nye na: ‘Orpa a bulaneya be bôte benan a be bezambe benan. Tôñe’e nye.’ Ve Ruth a nga jô nye na: ‘M’aye ke li’i wo. Bôte bôé b’aye bo bôte bam, a Zambe wôé a ye bo Zambe wom.’ Wo simesane na Naomi a nga wô’ôtan aya éyoñe Ruth a nga jô nye nalé?

Ruth ba Naomi be nga ke kui si ya Israël éyoñ ba taté na ba koé orge mefup. Môs éziñ, Ruth a nga ke kôan orge bebo bisaé be mbe be li’i mvus, afube Boaz, mone Rahab. Be nga kate Boaz na Ruth a ne ngone ya Moab, a na, a nga kabetane Naomi. Ane a nga jô bebo bisaé bé na, be li’i ôbe’ebe’e orge afup asu Ruth.

 Ngô’é éte, Naomi a nga sili Ruth na: ‘Wo te saé afube za den?’ Ane Ruth a nga yalane na: ‘Afube Boaz.’ Ane Naomi a nga jô nye na: ‘Ke Boaz a ne évuvumane nnôme wom. Kele’ ôsu a saé afube dé a bengone be binga bevok. Nde mvolan wo ye so wo wôé.’

Ruth a nga saé afube Boaz akekui nkôane bidi ô nga man. Boaz a nga yene na Ruth a ne éwôlô, a na, a ne mbamba minga. Melu mete, atiñ é mbe na, nge môt a wu teke li’i mon, évuvumane jé ja yiane lu’u minga a te lik. Aval ete nde Boaz a nga lu’u Ruth. Be nga biaé mon a to jôé na Obed, nnye a nga su’ulane bo émvame Njô bôte David. Bemvôé be Naomi be nga wô’ô abui avak. Nde be nga jô nye na: ‘Yéhôva a nga taté ve wo Ruth, nnye ate a nga nye’e wo abui; éyoñe ji, a veya fe wo ndaé. Yéhôva a nyoñe duma.’

“Mvôé éziñ é ne kabetane wo a dañe monyoñ.”​—Minkana 18:24, Mfefé Nkôñelan