E si ya Égypte, be mbe be loene nda bôte Jacob na b’Israélite. Éyoñe Jacob ba Joseph be wuya, mfefé njô bôt ô nga bet éto. A mbe a ko woñe na, mbôle b’Israélite be nto abui, ba ye bo ngul a dañe b’Égyptien. Nde a nga belane be ane belo. A nga tindi be na be kôme bebrique, a na be bo bisaé mefup, bisaé bite bi mbe mbia ya ngul. Akusa bo b’Égyptien be mbe be tibili’i b’Israélite, ayoñ Israël é mbe é kele’e ôsu a yaé. Pharaon a nji be a nye’e jam ete, nde a nga tyi’i na be wôé bobefam bese bengone ya Israël ba biaé. B’Israélite be nga yiane ko jam ete mbia woñ.

Ngon Israélite é to jôé na Jokébed, é nga biaé mona fam a to étua abeñ. Mbôl a mbe a yi na a kamane nye, a nga futi nye ékat été, a ke bôé ékate éte ôsôé ya Égypte ba loone na Nil. Miriam, kale mon ate, a nga ke tebe fefel ôsôé na a yen jam da ye kui.

Ane ngone Pharaon é nga zu wobane Nil, a koone na mon a bô ékat été, a yônôk. Nde a nga wô’ô nye mbia éngôngo. Miriam a nga sili nye na:  ‘Ye me ke jeñe wo minga é zu ba’ale wo mon ate?’ Éyoñe ngone Pharaon é nga yebe, Miriam a nga ji’a ke loone nyia wé, Jokébed. Nde ngone Pharaon é nga jô Jokébed na: ‘Nyoñe mone nyi, ô yale nye asu dam, ma ke mé ya’ane wo.’

Éyoñe mon a nga bo nya môtô, Jokébed a nga kee nye be ngone Pharaon. Nde ngone Pharaon é nga yôlé nye na Moïse; a nga yale nye ane mone wé émien. Moïse a nga yaé ane mone njô bôt, jôm éziñ é nji be é jembane nye. Ve Moïse a nji vuane Yéhôva môs éziñ. A mbe a kôme yeme na, a nji bo mon Égyptien, a ne mon Israélite. Ane a nga tobe na a zu bo Yéhôva ésaé.

Éyoñe Moïse a nga bi mimbu 40, a nga tyi’i na a zu volô ayoñe bôte dé. Môs éziñ, a nga zu koone mon Égyptien a bôme’e mon Israélite mbia ébôm, ane Moïse a nga kamane mon Israélite, a wôé mon Égyptien. Nde a nga ke solé mbime mon Égyptien ate nsele’e été. Éyoñe Pharaon a nga wô’ô jam ete, a nga jeñe na a wôé fe Moïse. Nde Moïse a nga tup, a ke sobô si ya Madian. Yéhôva a nga ke ôsu a ba’ale nye wôé.

“Amu mbunan, Moïse . . . a nga bene loebane na mone ya ngone Pharaon, a nga dañe nye’e a tope’ na, a nyoñe ngape ya ñwuan ékpwe’ele ba be bôte ya Zambe.”​—Behébreu 11:24, 25