Kele vôm ô ne lañe de

Kele sous-menu

Kele tep

Bengaa be Yéhôva

Bulu

Miñye’elane ya Bible asu bongô

 ÑYE’ELAN 18

Mon élé a yôñe nduan

Mon élé a yôñe nduan

Moïse a nga bo mimbu 40 e Madian. A nga lu’u minga, a biaé fe bon. Môs éziñ, a mbe a ba’ale mintômba fefele Nkôle Sinaï, nde a nga yen étua jam. Mon élé a mbe a yôñô’ô, ve a teke dik. Ane Moïse a nga subu bebé na a kôme yen, nde a nga wô’ô tyiñ é so’o élé é jô’ô na: ‘A Moïse! Tebe’e valé. Va’a besilifase bôé mebo, amu vôm ô tele le a ne étyi.’ Yéhôva nnye a nga belan éngele na a kobô a Moïse.

Ane Moïse a nga buti asu dé, amu a mbe a ko woñ. Tyiñ éte é nga ke ôsu é jô’ô na: ‘Me yeneya minju’u ayoñ Israël da tôbane mie Égypte. Ma zu kôté be mo b’Égyptien, a bo na be zu kañe ma e mbamba si mé ve be. Wo Moïse, wo me tobeya na ô vaa ayoñe dam e mo b’Égyptien.’ Ye wo buni na jam ete e nga bo na Moïse a kam?

Moïse a nga sili Yéhôva na: ‘Éyoñe bé sili ma na za a lôme ma, mé yalan aya?’ Nde Zambe a nga jô nye na: ‘Wé kate be na, Yéhôva, Zambe Abraham, Zambe Isaac, a Zambe Jacob, nnye a lôme wo.’ Nde Moïse a nga beta jô Yéhôva na: ‘Nge be bene vô’ôlô ma, mé bo aya?’ Ane Zambe a nga ve Moïse ndem ja liti na é volô nye. A nga jô nye na a wua ntume wé si. Ane ntum ô nga veñesane nyo. Éyoñe Moïse a nga to’é nyo éte, ane é nga beta veñesane ntum. Nde Yéhôva a nga jô nye na: ‘Éyoñe wé bo asimba di, bé yeme na, ma te lôme wo.’

Ve Moïse a nga beta jô Zambe na: ‘Me nji yeme kobô.’ Ane Yéhôva a nga bo nye ngaka’a nyi: ‘Ma mé kate wo jôme wo yiane jô, mé lôme fe monyañe wôé, Aaron, a zu volô wo.’ Éyoñ éte ñhe Moïse a nga nyoñe minga wé, a bone bé, a bulan Égypte, amu a mbe a nga yeme na Yéhôva é volô nye.

“Te tyelane minleme yôp a jô na, bi aye kobô aya? Za mejô bi aye jô? Amu éyoñe te, [jame mi aye jô da ye vebane be mia].”​—Matthieu 10:19