Kele vôm ô ne lañe de

Kele sous-menu

Kele tep

Bengaa be Yéhôva

Bulu

Miñye’elane ya Bible asu bongô

 ÑYE’ELAN 22

Asimba ya évele mañ

Asimba ya évele mañ

Nné ane Pharaon a nga wô’ô na b’Israélite be kôlôya Égypte, a nga taté na a jôban amu jé a nga jô’é na be ke. Nde a nga jô bezimba bé na: ‘Avôl, kelané ma jeñané bechariot bita bam bese, bi ji’a ke bia tôñe be! Bi nji yiane jô’é be na be ke.’ Nde ba bezimba bé be nga taté na ba leñe bone b’Israël.

Yéhôva nnye a mbe a wulu’u bôte bé, a mbe a belane nkut a môs, nkaba’a nduane ki alu. Éyone be nga ke kui évele mañ, Yéhôva a nga jô be na be tebe valé, be lôñe menda bindelé a taté tabe été.

Éyoñe b’Israélite be nga teme na Pharaon a bezimba bé ba tôñe be, be mbe teke fe yem ane be bo, amu mañ me mbe be ôsu, bezimba ke be za’a be mvus. Ane be nga taté na ba yôn, be jô’ô Moïse na: ‘Bia zu mane wu! Ô nga yiane jô’é bia Égypte.’ Ve Moïse a nga jô be na: ‘Te mia ko woñ. Tabané ne séé, a yen ane Zambe a zu nyii mia.’ Nga ô lôô na Moïse a mbe a too Yéhôva mebun?

Nde Yéhôva a nga jô b’Israélite na, be kee dulu dap ôsu. Alu ete, Yéhôva a nga telé nkute zañe b’Égyptien a bone b’Israël. Dibi é nga mane jaé vôme b’Égyptien be mbe. Ve éfufube é mbe vôme b’Israélite be nga too.

 Zambe a nga jô Moïse na a same wo wé e mañe yôp. Ane Yéhôva a nga lôme beta évuñulu ngumba alu. Nde mañ me nga salé zañ, a zen é nga yombô. Bemillion b’Israélite be nga wulu nkôte si, mimfine mendime mibaé mi too be mbo nga a mbo nnôm.

Éyoñe bezimba be Pharaon be nga yene na zen é yoo e mañ été, ane be nga taté na ba tôñe b’Israélite. Nde Yéhôva a nga futi jo’ojo’o zañe jap. Minka bechariot bap mi nga taté na mia koo. Nde bezimbi be nga taté na ba jô na: ‘Embulané mvus! Yéhôva nnye a wosan asu dap.’

Nde Yéhôva a nga jô Moïse na: ‘Beta same wo e mañe yôp.’ Ane mimfine mendime mi nga feteban b’Égyptien nyôl. Pharaon a bôte bé ve mane wu. Teke môte wua ya be be a nga nyiñ.

Éyoñe b’Israélite be nga kui abôñe mañe yat, be nga taté na ba yia Yéhôva jia ji: “M’aye yia Yéhôva jia amu a dañeya beta ndañan. Ékabela ba môt a wulu je yôp, a wuaya be mañ été.” Nté befam be mbe be yia, binga ke be mbe be jeme’e, be kute fe mengom. Môt ase a mbe a wô’ô mvaé, amu bese be mbe be ntoo fili.

“Nalé ate bi ajô a mbamba ayo’o minleme na, Tate a ne mvolô wom; me aye ke ko woñ: Môt a ye bo ma jé?”​—Behébreu 13:6