Kele vôm ô ne lañe de

Kele sous-menu

Kele tep

Bengaa be Yéhôva

Bulu

Miñye’elane ya Bible asu bongô

 ÑYE’ELAN 9

Be biaéya mon!

Be biaéya mon!

Abraham ba Sara be mbe be lu’aneya ayap. Be nga li’i abeñe nda tisone ya Our na ba ke nyiñe menda bindélé. Ve ntyi’an ôte ô nji ndeñele Sara amu a nga futi ndi nleme jé be Yéhôva.

Sara a mbe a kômbô’ô biaé mon, nde a nga jô Abraham na: ‘Nge Agar, mbo ésaé minga wom, a biaé mon, mé yene nye ve ane mone wom.’ Ane Abraham ba Agar be nga biaé mon. Jôé dé é mbe Ismaël.

Éyoñ abui mimbu é lôteya, valé Abraham a mbili mimbu 99, Sara ke mimbu 89, bôte bela be nga zu jome be. Abraham a nga jô be na be zu wo’on élé si, a na be zu di. Ye wo yeme za bôte bete be mbe? A mbe beéngele! Be nga jô Abraham na: ‘Mbu wo zu, aval éyoñe ji, minga wôé é biaé mona fam.’ Sara a mbe a vô’ôlô be a too nda été. Nde a nga taté na a woé nlem été a jô’ô na: ‘Abime nnôm me ntoo ji, ye me ne fo’o beta biaé mon?’

 Mbu ô nga tya’a valé, Sara a nga biaé mona fam, fo’o ve avale beéngele be nga jô. Abraham a nga yôlé nye na Isaac, nalé a tinane na, “Vioé.”

Éyoñ Isaac a nga bi mimbu mitan, Sara a nga zu koon Ismaël a kpwe’ele nye. Nde a nga ke yen Abraham a jô nye na a titan Agar ba Ismaël, amu a mbe a kômbô’ô kamane mone wé. Abraham a nji taté kômbô bo de. Ve Yéhôva a nga jô Abraham na: ‘Vô’ôlô’ô Sara. Mamien mé ba’ale Ismaël. Ve mé tôé ngaka’a me nga bo wo a zene ya be Isaac.’

“Amu mbunan, Sara, nye fe, akôsa bo nnôm, a nga bi ma’a ya beta biaé mvoñe bôt, amu a nga tabe ndi nlem e be nyô a nga ka’a nye je.”​—Behébreu 11:11, Mfefé Nkoñelan