Kele vôm ô ne lañe de

Kele sous-menu

Kele tep

Bengaa be Yéhôva

Bulu

Miñye’elane ya Bible asu bongô

 ÑYE’ELAN 96

Yésus a tobe Saul

Yésus a tobe Saul

Saul a mbe mone Romain a nga bialé e Tarse. A mbe mone Pharisien a mbe a kôme’e yem Atiñ Bejuif, a mbe fe a vini’i Bekristen. A mbe a tita’ane bekristen, binga a befam, menda map, a futi’i fe be menda mimbôk. E nga kui éyoñ éziñ na, a jô’é na nkunda bôt ô lume Étienne mekok, a wôé nye.

Ve Saul a nji be a yi ve na be kee Bekristen ya Jérusalem menda mimbôk. A nga jô beta pretre na, a lôme nye tisone ya Damas, asu na a ke bi Bekristen ya wôé. Éyoñ a kuiya fefele tison éte, ateme na, éfufub é nga faé vôm a mbe a tele; nye ve ku si. Ane a nga wô’ô tyiñ é jô’ô na: ‘A Saul, amu jé wo tibili ma?’ Saul na: ‘Ô ne za?’ A nga wô’ô na: ‘Yésus. Kele’e Damas, e wôé, ma ye kate wo jam wo yiane bo.’ Été été, Saul a nga ku ndim; e nga sili na môt a bi nye wo asu na a ke kui Damas.

Kristen éziñ é mbe Damas é to jôé na Ananias. Yésus a nga jô nye ñyenane na: “Kele’e nda Judas, é ne zene ba loone na Zosôô, ô ke jeñe Saul.” Ane Ananias a nga jô nye na: ‘A Tat, ma yem abui mam môt ate a bo! A futi beyé’é bôé mimbôk!’ Ve Yésus a nga jô nye na: ‘Kele’e be nye. Amu me tobeya Saul na a kañete abui meyoñ mbamba foé.’

Ane Ananias a nga ke koone Saul, a jô nye na: ‘A Saul, Yésus a te lôme ma me zu kui wo mis.’ Été été, Saul a nga beta taté na a yen. A nga yé’é abui mam a lat a Yésus, a su’ulane fe bo ñyé’é wôé. Eyoñe ji, Saul a nto Kristen, a nga kañete fe menda me Zambe a Bekristen bevok. Tame ve’ele simesan avale Bejuif be nga wô’ôtan éyoñe be nga yene Saul a ye’ele bôt mam  ma fombô Yésus. Be nga jô na: ‘Ye sa ke môt a mbe a tibili’i Beyé’é be Yésus nyi?’

Saul a nga kañete bôte ya Damas tañe mimbu milal. Bejuif be mbe be siñe’e nye, a be nga bôndé fe’e ya wôé nye. Ve éyoñe bobenyañ bé be nga wô’ô ajô ete, be nga volô nye. Be nga futi nye nkoé, a daa nye mbé akak ya tison.

Éyoñe Saul a kuiya Jérusalem, a nga jeñe na a yene bobenyañe bé. Ve bobenyañe bé be nga ko jam ete woñ. Ane ñyé’é a mbe jôé na Barnabas a nga kee Saul be minlôman, a kate fe mie abim avé Saul a nga tyendé. Saul a mbe a kañete’e mbamba foé a ayôñ ese akônda ya Jérusalem. Mvuse ya valé, a nga lobane na, Paul.

“Krist Yésus a nga zu si nyô amu a ye nyii bebo abé; mbe bete me ne ôsu.”​—1 Timothée 1:15