Kele vôm ô ne lañe de

Kele sous-menu

Kele tep

Bengaa be Yéhôva

Bulu

Miñye’elane ya Bible asu bongô

 ÑYE’ELAN 98

Ñyebe Bekristen wo kui abui mesi

Ñyebe Bekristen wo kui abui mesi

Minlôman mi nga tôñe abendé Yésus a nga ve na, be kañete mbamba foé si ése. Mbu 47 ya É.J., bobejañe ya Antioche be nga lôme Paul ba Barnabas na be ke kañete mesi mesi. Miñyôyo’o bekañete bebaé bete be nga ke kañete minlam mise ya Asie Mineure aval ane Derbée, Lystres a Iconium.

Paul ba Barnabas be mbe be kañete’e môt ase, minkukum a minzôzoé, bongô a benya bôtô. Abui bôt e nga kañese benya mejôô a lat a Krist. Môt éziñ a mbe a bo’o mam bemvi’i, a nga jeñe môs éziñ na, a kamane Paul ba Barnabas na be kañete Sergius Paulus, ngovina ya Rome. Ane Paul a nga jô nye na: ‘Yéhôva a wosane wo.’ Été été, mvimvi’i ôte ô nga ku ndim. Jam ete e nga bo na Sergius Paulus a su’ulane bo mbuni.

Paul ba Barnabas be mbe be kañete’e vôm ase, menda menda, bemakit, minjoñ minjoñ, a menda me Zambe. Éyoñe be nga saé môt éziñ e Lystres, bôt be nga yene jam ete be nga buni na be ne bezambe, ane be nga jeñe na be kañe be. Ve Paul ba Barnabas be nga kamane be na be bo de, be nga jô be na: ‘Kañané ve Zambe étam! Bia fe bi ne bôt ane mia.’ Ane Bejuif béziñ be nga so, a tindi nkunda bôt ô mbe valé na ô wosane Paul. Nde be nga taté na ba lume nye mekok; be nga wo’otô nye si, a su’ulane ke wua nye tisone yat, be buni’i na a wuya. Ve Paul a mbe a ngenan a vee! Bobejañ béziñ be nga zu volô nye, a beta kee nye tison éte. Mvuse ya valé, Paul a nga bulan Antioche.

 Mbu 49 ya É.J., Paul a nga beta ke a kañete mesi mesi. Éyoñ a maneya jome bobejañ ya Asie Mineure, ane a nga ke kañete mbamba foé Europe. A nga ke Athenes, Éphèse, e Philippe, e Thessalonique a bevôm befe. Silas, Luc a ndoman éziñ é mbe jôé na Timothée, be nga ke su’u Paul ésaé éte. Be nga saé nsamba asu na mekônda me bialé, a na me bo ngul nsisim. Paul a nga tabe Corinthe mbu wua a étun asu na, a ve bobejañ ya wôé ngule nyul. A nga kañete, a ye’ele fe, a tili fe abui mekônda bekalate. A mbe fe a kôme’e menda bindélé. Mvuse ya valé, a nga ke Antioche.

Mvuse ya valé, mbu 52 ya É.J., Paul a nga beta ke a kañete mesi mesi; a nga taté ésaé nkañete jé Asie Mineure. A nga ke Nord ya Philippe akekui Corinthe. Paul a nga bo abui mimbu Éphèse na a ye’ele, a volô bôte ya akônda. A mbe fe a bo’o minkañete ya mengana bôt môs ôse nda be nga top. Abui bôt e mbe e vô’ôlô’ô minkañete mite, a be nga bo mintyendan. Éyoñ a maneya kañete abui mesi, Paul a nga su’ulane ke Jérusalem.

“Kelan, mi bo meyoñe mese beyé’é.”​—Matthieu 28:19