Kele vôm ô ne lañe de

Kele sous-menu

Kele tep

Bengaa be Yéhôva

Bulu

Miñye’elane ya Bible asu bongô

 ÑYE’ELAN 99

Mba’ale nda mimbôk a yem benya mejôô

Mba’ale nda mimbôk a yem benya mejôô

Mona minga éziñ a mbe ôlo Philippe; mbia nsisim a mbe a to nye nyul. Mbia nsisim ate a mbe a bela’ane nye na a kulu mejô; bemasa bé be nga bi abui moné a zen éte. Éyoñe Paul ba Silas be nga kui Philippe, a nga tôñe be abui melu. Mbia nsisim ate a nga bo na a bam, a jô’ô na: “Bôte ba be ne bebo bisaé be Zambe a Dañe Yôp.” Ane Paul a nga jô mbia nsisim ate na: ‘Ma kate wo a jôé Yésus na, kôlô’ô nye nyul!’ Mbia nsisim ve kôlô nye nyul.

Éyoñe bemasa be mona minga ate be nga yene na, be bili ki fe môt aye ve be moné, be nga wô’ô mbia ôlun. Ane be nga kee Paul ba Silas be betyi’i mejô; be nga jô na: ‘Bôte ba ba tyam atiñ, a ba soo jo’ojo’o nlam!’ Nde betyi’i mejô be nga ve atiñe na be bôme Paul ba Silas, a na, be futi be mimbôk. Mba’ale nda mimbôk a nga futi be afôla ya nda é mbe dibi ne viu, a ka’a fe be mengatak.

Bôte bevo’o be mbe mimbôk be mbe be wô’ô ane Paul ba Silas ba yia Yéhôva bia ya ékaña’a. Atemeteme na, si é nga fo’osane zañ alu, mekône ya nda fe me nga fô’ôsan. Ane mimbé mi nga yombô, mengata’a me mane kulan. Mba’ale nda mimbôk ve zu bume mbil, a nyiine nda été; a ke koone na mimbé mi yoo. Mbôle a mbe a buni’i na mimbô’ô mi nga mane tup, a nga nyoñe nkpwaté mekôn asu na a wôé émién.

Ane Paul a nga loone nye, a jô nye na: ‘Te wôé womien! Bia bese bi ne va!’ Mba’ale nda mimbôk ve zu ko woñ, nde a nga ku Paul ba Silas mebo . A nga sili be na: “Jé ma yiane bo asu na me nyiñ?” Be nga jô nye na: ‘Mia nda bôte jôé mia yiane buni Yésus.’ Nde Paul ba Silas be nga ye’ele be Mejô me Yéhôva, ane mba’ale nda mimbôk a nda bôte jé be nga duban.

“Be aye ke mia menda mimbôk, a ke fe mia be bejô bôt be ne anen a ba be ne tyôtyoé amu jôé dam. Mam mete me aye bo mia zene ya kañete mbunane wônan.”​—Luc 21:12, 13