Kele vôm ô ne lañe de

Kele sous-menu

Kele tep

Bengaa be Yéhôva

Bulu

Miñye’elane ya Bible asu bongô

 ÑYE’ELAN 84

Yésus a wulu mendime yôp

Yésus a wulu mendime yôp

Yésus a nji be a saé’ ve minkôkon, a wômô’ôlô mimbim, a mbe fe ngule ya jôé évuñulu a mveñ. Éyoñ a maneya ye’elan nkôle yôp, Yésus a nga yen ôkôs ô vuñu mañe ya Galilée. Minlôman mié mi mbe sitima été, mi biba’ane na mi dutu sitima. Ane Yésus a nga sise nkôl, a telé mebo mendim, a taté dulu na a ke tôbane sitima. Éyoñe minlôman mi nga yene môt a wulu’u mendime yôp, woñ ô nga bi be. Ve Yésus a nga jô be na: ‘Ane ma. Te mia ko woñ.’

Ane Pierre a nga jô nye na: ‘A Tat, nge a ne fo’o wo, jô’ô ma na me zu.’ Nye’e na: ‘Za’ak.’ Ôkôse zañe va, Pierre ve taté na a wulu mendime yôp, na a ke tôbane Yésus. Ve nté a mbe a subu’u nye bebé, Pierre a nga fombô ôkôs, ane woñ ô nga bi nye. Nde a nga taté na a nyoñ. Ane a nga bôé ñyôn, a jô’ô na: ‘A Tat, volô’ô ma!’ Ane Yésus a nga same nye wo, a jô’ô nye na: ‘Amu jé bisô bia te bi wo? Mbunane wôé ô ne vé?’

Ane Yésus ba Pierre be nga dañe sitima, ôkôs ô tebe. Tame simesan jam minlôman mi nga wô’ôtan! Be nga jô na: “Ô ne fo’o Mone Zambe.”

A nji be éyoñ ôsu Yésus a bo aval asimba ete. Môs éziñ, ba beyé’é bé be mbe sitima été be kele’e dulu, ane Yésus a nga ke mvuse sitima na a ke wo’on. Nté a mbe ôyo melom, ôkôs ve zu taté na wo vuñ. Mintyôa mi mañ mi nga taté na mia jimbi sitima, sitima ve jaé a mendim. Ane minlôman mi nga taté na mia vele nye mi yônôk, mi jô’ô na: ‘A ñye’ele, bi wuya! Volô’ô bia!’ Ane Yésus a nga kôlô si, a jô mañe na: “Évô!” Été été, ôkôs ô nga tebe, mañ me ntoo ne mieññ. Nde Yésus a nga sili be na: ‘Mbunane wônan ô ne vé?’ Ane be nga kam a jô na: “Ja’a évuñulu a mañ [bia] wô’ô nye.” Nalé a nga ye’ele be na, nge ba futi ndi nleme jab ése be Yésus, ba ye ke ko jôme woñ.

“Me nga ye bo aya e si bia nyiñe nyô nge me too ye bo te bi ndi ya yene mvame [Yéhôva]?”​—Besam 27:13, Mfefé Nkôñelan