Kele vôm ô ne lañe de

Kele sous-menu

Kele tep

Bengaa be Yéhôva

Bulu

Miñye’elane ya Bible asu bongô

 ÑYE’ELAN 78

Yésus a kañete mbamba foé ya Éjôé

Yésus a kañete mbamba foé ya Éjôé

Éyoñ a dubaneya, Yésus a nga taté ésaé nkañete jé, a jô’ô na: ‘Éjôé Zambe é ntoo bebé.’ Beyé’é bé be mbe be tôñe’e nye nté a mbe a bôma’ane Galilée a Juda. Éyoñ a nga bulane Nazareth, Yésus a nga ke synagogue, a yoé mvulekane kalate Ésaïe, a lañe yôp été na: ‘Yéhôva a nga ve me nsisime wé na me kañete mbamba foé.’ Mejô mete me mbe me tina’an aya? Me mbe me tina’ane na, ja’a bôte be mbe be yii na a bo mesimba, Yésus a mbe a yiane taté kañete mbamba foé, jôm ete nje Yéhôva a nga ve nye mbamba nsisime wé. Ajô te, a nga jô bôte na: ‘Nkulan ajô wu ô tôébaneya.’

Mvuse ya valé, Yésus a nga ke mañe ya Galilée, a koone beyé’é bé benyin be mbe beyobô kos. Ane a nga loone be, a jô be na: ‘Za’ané be ma, a ma ye ye’ele mia ane ba yobe bôt.’ Be mbe môé na Pierre, André, Jacques, a Jean. Ane be nga jô’é ésaé jap a taté na ba tôñe nye. Be nga bômane Galilée ase, be kañete’e mbamba foé ya Éjôé Yéhôva. Be nga kañete besynagogue été, e makit, a minjoñ minjoñ. Beta nsamba bôt a mbe a tôñe’e be vôm ase. Be nga wô’ôtane Yésus vôm ase, ja’a Syrie.

Yésus a nga ve beyé’é bé béziñ ngule ya saé akon, a nyi ya vaa mimbia minsisim. Bevo’o ki be mbe be wulu’u a nye nté a mbe a kele’e a kañete bitison a minlam. Binga ya mbunan ane Marie Madeleine, Jeanne, Suzanne, a befe abui be nga nyoñ ngab a be.

Éyoñ a maneya ye’ele beyé’é bé ésaé nkañete, a nga lôme be na be ke kañete. Nté be mbe be bôma’ane Galilée, be nga volô abui bôte na be’e fe be bo beyé’é a duban. Mbôl abui bôt e nga kômbô bo beyé’é bé, Yésus a nga belane éve’ela afube bidi e ntoo étôtôlô. A nga jô na: ‘Ye’elané Yéhôva na a lôm abui bôt asu nkôane bidi.’ A nga su’ulane tobe beyé’é 70, a lôme be  bebaé bebaé na be ke ba kañete Judée. Be nga ye’ele avale môt ese mam ma fombô Éjôé Zambe. Éyoñ be nga bulan, be mbe évévé ya kate Yésus avale nkañete ô nga wulu. Ja’a Satan a nji be ngule ya telé ésaé nkañete.

Yésus a mbe a yi na ésaé éte é ke ôsu ja’a éyoñ a bulaneya yôp. Ajô te, a nga jô beyé’é bé na: ‘Kañeta’ané mbamba foé si ése. Ye’elané bôte Mejô me Zambe a baptizô be.’

“Me ayiane ke minlam mife, a kate bôt mbamba foé ya [Éjôé] Zambe: amu ajô te nde Zambe a nga lôme ma.”​—Luc 4:43