Kele vôm ô ne lañe de

Kele sous-menu

Kele tep

Bengaa be Yéhôva

Bulu

Miñye’elane ya Bible asu bongô

 ÑYE’ELAN 77

Minga a ne anjeñ

Minga a ne anjeñ

Pâque a maneya, Yésus ba beyé’é bé ba tyii Samarie na ba bulane Galilée. Valé be mbeme kui tisone be mbe be loone na Sychar, a tebe vôme be mbe be loone na anjeñe Jacob. Nté Yésus a wo’on, beyé’é ki ba ke kuse jôme ya di tison.

Minga éziñ a nga zu labe mendim. Yésus a nga jô nye na: “Va’a ma mendime ya nyu.” Nye’ na: ‘Amu jé wo kobô a ma? Me ne ngone ya Samarie. Bejuif ba kobô ki a bia.’ Ane Yésus a nga jô nye na: ‘Nge ô yeme’e za me né, ve wo wo te ja’é ma mendime ya nyu, wônaa me’e ki me ya wo ve mendime ya ényiñ.’ Nde minga ate a nga sili nye na: ‘Jé wo kômbô jô? Ô nji bi bi kobe ya labe je mendim.’ Nye’ na: ‘Môt ase a nyu mendim mam a ye ke beta wô’ô évé môs éziñ.’ Minga na: ‘Va’a nja’a ma mendime mete.’

Nde Yésus a nga jô nye na: ‘Kele’e loone nnôme wôé a zu va.’ Nye’ na: ‘Me nji bi nnôm.’ Yésus nye’ na: ‘Wo bele. Ô nga ke aluk biyoñ bitan, nde fe, môte mia nye mi too a nji bo nnôme wôé.’ Minga na: ‘Me lôô na ô ne nkuli mejô. Bôte ya ayoñ dam ba jô na bia yiane kañe Zambe nkôle wu yôp, ve Bejuif ba jô na bia yiane kañe Zambe ve Jérusalem. Ma buni na éyoñ Messie a ye so, a ye kate bia avale bia yiane kañe Zambe.’ Ane Yésus a nga kate nye jam a mbe a ngenane te kate môte mfe; a nga jô nye na: ‘Ma me ne Messie.’

 Ane minga a nga ji’a ke tison, a ke kate Besamaritain na: ‘Ma buni na me yeneya Messie. A yem ényiñ jam ése. Za’a yenané!’ Ane be nga tôñe nye anjeñ, a vô’ôlô mejô me Yésus.

Besamaritain be nga jô Yésus na a tabe nlame wop. A nga bo melu mebaé a ye’ele be, ane abui ya été e nga buni nye. Be nga jô minga ate na: ‘Éyoñ ji bia buni na môte nyi a ne nkôté ya émo.’

“Za’ak. A nyô a wô’ô évé, a za’ak: nyô a kômbô a nyoñe’ mendime ya ényiñ zezé.”​—Nlitan 22:17