Kele vôm ô ne lañe de

Kele sous-menu

Kele tep

Bengaa be Yéhôva

Bulu

Miñye’elane ya Bible asu bongô

 ÑYE’ELAN 71

Yéhôva a ba’ale Yésus

Yéhôva a ba’ale Yésus

Bôte béziñ ya Israël, vôm jôbe da tôô, be mbe be simesa’ane na ateté e ne volô be. Alu éziñ, bôte be nga yen ôteté ô faé yôp, ane be nga taté na ba tôñe wô. “Ôteté” ôte ô nga kee be Jerusalem. Ane be nga taté na ba sili bôte na: ‘Mon a ye bo njôô Bejuif a ne vé? Bia te zu lu’u nye.’

Éyoñ Hérode, njôô ya Jérusalem a nga wô’ô ajô ete, a nga wô’ô mbia ôlun. Ane a nga sili beprêtre na: ‘Ba jô jô na njôô ate a mbe na a bialé vé?’ Be nga yalane nye na: ‘Bekulu mejô be nga jô na a ye bialé Bethléhem.’ Ane Hérode a nga loone bôte bete a jô be na: ‘Kelané Bethléhem. Nge mi yene mon ate, mi za’a kate ma. Ma fe ma kômbô ke lu’u nye.’ Ve a mbe a la’ane minsos.

“Ôteté” ve beta téé dulu. Bôt bete be nga tôñe wô akekui e Bethléhem. “Ôteté” ôte ô nga zu tebe andile ya nda, ane be nga nyiin été wôé. Be nga koone Yésus ba nyia wé, Marie. Be nga lu’u mongô a ve nye or, encens, a myrrhe. Ye Yéhôva nnye a nga bo na bôte bete be yene Yésus nga? Momo.

Alu ete ebien, Yéhôva a nga jô Joseph na: ‘Hérode a kômbô wôé Yésus. Nyoñe minga wôé a mone wôé mi tup Égypte. Taba’ane wôé akekui ma ye jô mia na mi bulan.’ Ane Joseph a nga kee nda bôte jé Égypte.

Yéhôva a nga jô fe bôte bete na be bo te bulane be Hérode. Hérode a nga wô’ô mbia ôlun éyoñ a nga yeme na bôte bete be lôteya. Nde a nga jô na be mane wôé bobefam bese ya Bethléhem, ba ba be Yésus be mbe zia ôkala. Ve Yésus a nji wu, amu a mbe si ya Égypte.

 Mvuse bone mimbu, Hérode a nga wu. Éyoñ éte Yéhôva a nga jô Joseph na: ‘Ô ntoo ve bulan ne séé.’ Ane Joseph, Marie a Yésus be nga bulan Israël, a ke tabe Nazareth.

“Aval ete njôane wom w’akui anyu dam w’aye bo: . . .  wo ye [tôé jam me nga lôme wô].” ​—Ésaïe 55:11