Kele vôm ô ne lañe de

Kele sous-menu

Kele tep

Bengaa be Yéhôva

Bulu

Miñye’elane ya Bible asu bongô

 ÑYE’ELAN 63

Mintilane ya mfin

Mintilane ya mfin

Belschatsar nnye a mbe njô bôt ya Babylone éyoñ éte. Alu éziñ, a nga bañete beta be bôte ya Babylone abô’ô bidi. A nga jô bebo bisaé bé na be zu bilaé bi or Nebucadnetsar a nga nyoñe temple Yéhôva. Nde ba beyeñe bé be nga nyu été, a kañe bezambe bap. A teme na, wo môt ô nga kui, ô taté fe na wo tili mfine ya nda.

Belschatsar ve zu ko woñ. Nde a nga loene mingengañ mié a jô mie na: ‘Môt aye kui na a timine ma bifia bi, ma ye telé nye évete lale ya Babylone.’ Mingengañ ve zu jeñe na mi timine bifia bite, teke ndoñ. Ane njô bôte minga a nga jô na: ‘Môt éziñ a ne jôé na Daniel, nnye a mbe a timi’ine Nebucadnetsar mam a mbe a yenek. A ne timine wo bifia bi.’

Ane Daniel a nga ke be njô bôt. Nde Belschatsar a nga jô nye na: ‘Nge ô lañe bifia bi a timine bie, ma ye jalé wo nsanga or, a wo ye bo évete lale ya Babylone.’ Nde Daniel a nga jô na: ‘Me nji yi ma’ane môé, ve ma zu ve wo atinane ya bifia bi. Nebucadnetsar, ésa wôé a mbe mebun, ane Yéhôva a nga sulu nye si. Womien wo yeme mam me nga kui nye, ve ô ngenan ô kele’ ôsu a biasé Yéhôva amu wo nyu meyok a bilaé bi or ya temple Wé. Ajô te, Yéhôva a te tili bifia bi: Mene, Mene,Tekel, Upharsin. Bifia bite bia tinane na, Bemède a Beperse ba ye zu wosane wo, a nyoñe Babylone, teke na wo ye beta jôô môs éziñ.’

Bôt be mbe be buni’i na Babylone a vo’o nyoñeban. Tison éte é mbe é bili beta minka’ale, ôsôé ô mbe ô bôma’ane je. Ve alu éziñ, Bemède a Beperse be nga ke wosane Babylone. Cyrus, Njôô ya Perse a nga bo na mendim me vele ôsôé, ane  bezimbi bé be nga kui na be dañ ôsôé. Éyoñ be nga kui anyiine mbé ya tison, be nga koon mimbé mi yoo! Ane be nga jiane Babylone a wôé njô bôt. Ane Cyrus a nga bo njôô ya Babylone.

Mbu ôte ôbien, Cyrus a nga jô na: ‘Yéhôva a nga jô me na me lôñe temple ya Jérusalem. Mone Bejuif ase a kômbô su’u ésaé éte a ne fili ya bo de.’ Ane abui Bejuif e nga bulane Jérusalem, mvuse mimbu 70 ya éyoñe Jérusalem a nga tyameban, fo’o ve avale Yéhôva a nga ka’ale. Cyrus a nga bulane bilaé bi or a argent Nebucadnetsar a nga to’é temple. Ye ô lôô avale Yéhôva a nga belane Cyrus na a volô bebo bisaé Bé?

“Beta Babylone a kuya, a kuya, a nto éto bediable.”​—Nlitan 18:2