Kele vôm ô ne lañe de

Kele sous-menu

Kele tep

Bengaa be Yéhôva

Bulu

Miñye’elane ya Bible asu bongô

 ÑYE’ELAN 64

Daniel ébé beñgbweñbgwem

Daniel ébé beñgbweñbgwem

Môte mfe a nga jôé Babylon a too jôé na Darius. Darius a mbe a nye’e Daniel. A nga ve nye éto ja dañe ji befam bese ya Babylon. Ane be nga taté na ba bo Daniel éviele, be nga jeñe fe na be kolé nye ôbak. Mbôle be mbe be yeme’e na Daniel a ye’elane Yéhôva biyoñ bilale môs, be nga ke jô Darius na: ‘A njô bôt, va’a atiñe na môt ase a ye’elane ve wo. Nge môt a tyam atiñ ete, ba yiane wua nye ébé bengbwengbwem.’ Darius a nga wô’ô mejô mete mvaé, ane a nga san atiñ ete.

Éyoñe Daniel a nga wô’ô jam ete, a nga ji’a ke nda jé, a yoé bevundu, a kute meboñe si, a taté na a ye’elane Yéhôva. Ane mbia be bôt bete be nga nyiine nye nda, a zu koone nye a ye’elan. Be ve bumu mbil a ke kate Darius na: ‘Daniel a biaséya wo. A ye’elane Zambe wé biyoñ bilale môs.’ Mbôl Darius a mbe a nye’e Daniel, a nji be a yi na a wu. Ngum nté môs, a mbe a fase’e jôm a ne bo asu na a nyii Daniel. Ve, ja’a njô bôt émien a nji be ngule ya tyendé atiñ a nga san. Ane a nga jô na be ke wua Daniel ébé bengbwengbwem.

 Darius a nji ke ôyo alu ete amu a mbe a simesa’ane Daniel. Nné ane tyé é nga lendé, a nga ji’a ke ébé bengbwengbwem; ane a nga sili Daniel na: ‘Ye Zambe wôé a te nyii wo?’

Ane Darius a nga wô’ô môt a yala’ane nye. A mbe Daniel! A nga jô Darius na: ‘Éngele Yéhôva a te dibe bengbwengbwem menyu. Be nji bo ma mbia jam éziñ.’ Darius ve zu wô’ô mvaé! Ane a nga jô na be vaa Daniel ébé. Daniel a nji be a bili éfel éziñ nyul. Ane njôô a nga jô na: ‘Wuané ma bôt be nga bôte Daniel ajô ébé été.’ Bengbwengbwem be nga mane be di ôsusua na ba ku ébé.

Ane Darius a nga jô bôt bese ya Babylone na: ‘Môt ase a yiane semé Zambe Daniel. Amu a te nyii nye mo bengbwengbwem.’

Ye wo fe wo ye’elane Yéhôva môs ôse ane Daniel?

“Yéhôva a yeme va ba be abo mame ya Zambe meve’ele été.”​—2 Pierre 2:9