Kele vôm ô ne lañe de

Kele sous-menu

Kele tep

Bengaa be Yéhôva

Bulu

Jé Kalate Zambe a ne ye’ele bia?

 KABETÔLÔ ÔSU

Za a ne Zambe?

Za a ne Zambe?

1, 2. Minsili mivé bôte be wô’ô sili?

BONGÔ ba sili abui minsili. Nge ô timine be jôme jia, ba ye beta sili na: ‘Amu jé?’ Ja’a éyoñe wo yalane be, be ne beta sili na, ‘Ve amu jé?’

2 Bi kusa bo bisoé nge minnôm, bi bili minsili. Bi ne bi minsili mi afombô jôm ya di, jôm ya jaé, nge kus. Bi ne fe bi minsili mi adañe mfi mfa’a ya ényiñe ji, a ényiñe ya melu ma zu. Ve éyoñe bi nji bi mbamba biyalane ya minsili mite, bi ne jô’é njeñan.

3. Amu jé abui bôte da simesane na, be nji yiane jeñe biyalane ya minsili mi adañe mfi?

3 Ye Kalate Zambe a bili biyalane ya benya minsili bia sili? Bôte béziñe ba simesane nalé, ve ba yene na Kalate Zambe a ne ayaé ya wôk. Bevo’o ba buni na beye’ele, nge betebe ôsu ya miñyebe étam, mbe be bili biyalan. A bevo’o ba wô’ô ôsone ya meme na, be nji yem biyalan. Wo simesan aya?

4, 5. Minsili mi ne mfi mivé ô ne sili? Amu jé wo yiane ke ôsu a jeñe biyalan?

4 Ô ne yi biyalane ya minsili mi: Amu jé ma nyiñ? Jé ja ye kui be ma éyoñe ma ye wu? Zambe a ne avale môt avé? Yésus, beta Ñye’ele a dañ, a nga jô na: “Jaka’an, wôna mia ye nyoñ; jeñan, wôna mia ye yen; kutane mbé, ndemben a ye dii mia wô.” (Matthieu 7:7) Te jô’é njeñan, akekui wo ye yene mbamba biyalane ya minsili miôé.

 5 Ôwé, nge wo ke ôsu a “jeñ,” wo ye yene biyalan e Kalate Zambe été. (Minkana 2:1-5) Biyalane bite bi nji bo ayaé ya wôk. Mam wo yé’é me aye ve wo mbamba ényiñe den, a ndi nlem asu melu ma zu. Bi tame zu kobô ajô ya nsili wua ya mi, mi andeñele abui bôt.

YE ZAMBE A NYOÑE BIA NGAP, YE A NE NJET?

6. Amu jé bôte béziñe ba simesane na, Zambe a nji nyoñe ngap a minju’u miap?

6 Abui bôt da simesane na, Zambe a nji nyoñe bia ngap. Ba simesane na, nge Zambe a mbe fo’o a nyoñe bia ngap, ve émo ji é nji bo avale bia yene den. Bia yene bita, ziñ, a azoé bevôme bese. Bôte ba kon, be tele minju’u été, a ba wu. Abui da simesane na, ‘nge Zambe a nyoñe bia ngap, amu jé a jô’é na minju’u mi ke ôsu?’

7. (a) Aval avé betebe ôsu ya menda me Zambe ba ye’ele bôte na Zambe a ne njet? (b) Amu jé bi ne tabe ndi na, sa ke Zambe nnye a bo na bi tôbane minjuk?

7 Betebe ôsu ya miñyebe ba tindi bôte na, be simesane na Zambe a ne njet. Éyoñe bitua bi mam bi akui, ba jô na, a ne nkômbane Zambe. Éyoñe ba jô de, ba ve Zambe bijô. Ve Kalate Zambe a ye’ele na, Zambe a se ngule ya telé bôte minju’u été. Jacques 1:13 a kate na, Zambe a ne te ve’ele bôt a mbia be mam. A jô na: “Môte te jô, éyoñ a yene meve’ele, na, ma yene meve’ele be Zambe; amu Zambe a se ngule ya yene meve’ele ya abé, a émien a ne te ve’ele môt.” Nalé a tinane na, to’o Zambe a nji bo na mbia be mam me tebe, sa ke nnye a bo na me kui. (Lañe Job 34:10-12.) Bi tame nyoñ éve’an.

8, 9. Amu jé bi nji yiane ve Zambe bijô amu minju’u miangan? Va’a évé’an.

 8 Tame fas éve’ane ji: monafam a nyiñ a bebiaé bé. Ésa wé a nye’e nye, a ye’ele fe nye aval a ne nyoñe mbamba mintyi’an. Akusa bo nalé, mon ate a taté na a bo ésa wé melo, a kôlô nda jé. A taté na a bo mbia be mam, a tôbane minjuk. Ye wo ye ve ésa bijô amu, a nji kamane na mone wé a kôlô nda jé? Teké’é! (Luc 15:11-13) Aval ane ésa ate, Zambe a nji kamane bôt éyoñe be nga tobe na, ba bo melo a abé. Nde éyoñe mbia be mam ba kui, bia yiane yeme na sa ke Zambe nnye a bo me. É nji bo zôsô na bi ve Zambe bijô.

9 Zambe a ngenan te télé minjuk, amu a bili abui beamu. E kabetôlô 11, wo ye yé’é mame Kalate Zambe a jô mfa’a te. Ve tabe’e ndi na Zambe a nye’e bia, bi nji yiane ve nye bijô amu minju’u miangan. Nnye étam a ne ngule ya kôme mie.​—Ésaïe 33:2.

10. Amu jé bi ne tabe ndi na Zambe a ye kôme mbia be mam bese?

10 Zambe a ne étyi. (Ésaïe 6:3) Bi ne tabe nye ndi amu, mimboane mi mam mié mise mi ne mfuban a abeñ. Bôte be nji bo ane Zambe amu, ba bo mam me ne abé biyôñe biziñ. Ja’a njô bôt a ne zôsôô a nji bi ngule ya mane kôme mbia be mam bese. Teke môt éziñ a ne bi avale ngule Zambe a bili. Zambe a bili ngule ya mane kôme mam mbia be bôte ba bo, a ye fe de bo. A ye mane va abé ése éyôñe jia ya biyoñe bise.​—Lañe Besam 37:9-11.

 ZAMBE A WÔ’Ô AYA ÉYOÑE BÔTE BE TELE MINJU’U ÉTÉ?

11. Zambe a wô’ô aya éyoñ ô tele minju’u été?

11 Zambe a wô’ô aya éyôñ a yene minju’u bia tôbane mie? Kalate Zambe a ye’ele na Zambe “a nye’e nya ntyi’ane mejôô.” (Besam 37:28) Nde, mam mese me anambe nye, ma me ne abé, a ma me ne zôsô. A vini a yene bôt e minju’u été. Kalate Zambe a jô na, “a nga wô’ô jam éte ôlune nlem,” éyoñ a nga yen ane émo é mbe njalan a mbia be mam. (Metata’a 6:5, 6) Zambe a nji tyendé. (Malachie 3:6) Kalate Zambe a jô na, Zambe a nyoñe wo ngap.​—Lañe 1 Pierre 5:7.

Kalate Zambe a jô na Yéhôva, Nté biôme bise a ne nye’an

12, 13. (a) Amu jé bia nye’e, a nyoñe bôte bevo’o ngap, a jé bia simesan éyoñe bia yene minju’u ya émo ji? (b) Amu jé bi ne tabe ndi na, Zambe a ye mane va minju’u mise a ékotekot?

12 Kalate Zambe a jô fe na, Zambe a nga té bia éve’ela jé. (Metata’a 1:26) Nalé a tinane na, Zambe a nga té bia a mbamba mefulu mé. Nga nlem wo taé wo, éyoñe wo yene bôte ba tôbane minju’u teke étom? Yeme fe na nlem Zambe wo dañe taé éyoñ a yen avale mame te. Bia yeme nalé aya?

13 Kalate Zambe a ye’ele bia na, “Zambe a ne nye’an.” (1 Jean 4:8) Nye’ane ñwô wo tindi Zambe na, a bo mam mese. Nde bia nye’e, amu Zambe a nye’e. Tame fas: ye ô ne mane va minju’u mise a ékotekot mi ne émo ji, nge ô bili ngule ya bo de? Ôwé ô ne de bo, amu wo nye’e bôt. Zambe a bili ngul; nde fe a nye’e bia. Jôme te nje bia yeme na, a ye mane va minju’u mise, a ékotekot é ne njalane si. Yeme na, bengaka’a bese wo te yen atata’a ya kalate nyi be aye  tôéban. Ve nge wo kômbô tabe ndi a bengaka’a bete, wo yiane taté yeme Zambe a nga bo be.

ZAMBE A YI NA Ô YEME NYE

Éyoñe wo jeñe na ô bo mvôé môt, jé ô wô’ô tate kate nye? Éyôlé jôé. Zambe a kate bia éyôlé jé e Kalate Zambe été

14. Zambe a ne jôé na za, a amu jé bia yeme na, bia yiane belan éyôlé te?

14 Éyoñe wo jeñe na ô bo mvôé môt, jé ô wô’ô tate kate nye? Éyôlé jôé. Ye Zambe a bili éyôlé? Abui miñyebe mi ajô na, jôé dé é ne Zambe, nge Tate, ve balé be nji bo biyôlé. Be ne fo’o ve môé mese’esa ane “njô bôt” nge “kaso.” Zambe a nga kate bia na, jôé dé é ne Yéhôva. Besam 83:18 a jô na: “Nde be aye yeme na wo étam, nyô jôé dé é ne Yéhôva, ô ne nyô a dañe bôte bese yôp a jôô si se.” Betili Kalate Zambe be nga belane jôé Zambe biyoñe betoyini. Yéhôva a yi na ô yem éyôlé jé a belane je. A kate wo éyôlé jé asu na ô bo mvôé jé.

15. Éyôlé Yéhôva ja tinan aya?

15 Éyôlé Zambe, Yéhôva ja tinane na, a ne tôé bengaka’a bé bese, a ne fe tôé minsôñane mié. Jôm éziñ é se ngule ya telé nye. Yéhôva étam, nnye a ne bi éyôlé te. *

16, 17. Va’a atinan ya: (a) “Zambe ya Ngul Ése”? (b) “Njô bôte ya biyoñe bise”? a (c) “Nté” biôm bise?

 16 Bia te lañ e kalate Besam 83:18 na, Yéhôva étam, nnye a ne: “Nyô a dañe bôte bese.” Nde fe kalate Nlitan 15:3 a jô na: “Mimboane mi mam miôé mi ne anen a mi ya semé, a Tate Zambe, nyô a ne Ngul Ése; mezene môé me ne zôsôô a été, wo Njô bôte ya biyoñe bise.” Jé éyôlé mese’esa “Zambe ya Ngul Ése” ja tinan? Ja tinane na, Yéhôva nnye a dañe ngul a lôte môt ase ya émo minlañ. A éyôlé mese’esa “Njô bôte ya biyoñe  bise” ja tinane na, a zuya a nyiñe kom. Kalate Besam 90:2 a faé éfufube na, Yéhôva a ne nnôm éto a nnôm éto. Ke jame te é ne jame ya semé!

17 Fo’o ve Yéhôva étam, nnye a ne Nté biôm bise. Kalate Nlitan 4:11 a jô na: “A Tate wongan a Zambe wongan, wo ayiane nyoñe duma a ékaña’a a ngu: amu ô nga té biôm bise, a amu nkômbane wôé bi nga to, a bi nga téban.” Yaa, ataté beéngele, akekui atété ya minkut été; ataté bibuma ya bilé akekui kose ya mañ,​—Yéhôva nnye a nga té biôm bise ô ne simesan. A ne fo’o jame ya kam!

YE Ô NE BO MVÔÉ ZAMBE?

18. Amu jé abui bôt da simesane na, be se ngule ya subu Zambe bebé? Jé Kalate Zambe a jô mfa’a te?

18 Éyoñe bôte ba lañe minkañete mi aliti mbamba  mefulu me Yéhôva, woñe wo bi be. Ba fase nlem été na, ‘Zambe a ne angôndô ya ngul, anen a ôyabe yôp, nde a ne nyoñe ngap a ma aya?’ Ye aval asimesane te nde Zambe a yi na, bi bi mfa’a wé? Momo. Kalate Mam Minlôman 17:27 a jô na, “Zambe a nji bo ôyap” a môt ase ya be bia. Zambe a kômbô na ô subu nye bebé, a ve fe bia ngaka’a na, ‘a ye subu bia bebé.’​—Jacques 4:8.

19. (a) Aval avé ô ne bo mvôé Zambe? (b) Mefulu me Yéhôva mevé wo dañe nye’e?

19 Aval avé ô ne bo mvôé Zambe? Yésus a nga jô na: “Ényiñe ya melu mese é ne na, be aye yeme wo, wo étam ô ne nya Zambe, be aye yeme fe nyô ô nga lôm, nnye a ne Yésus Krist.” (Jean 17:3) Kele ôsu a yé’é, ndemben wo ye yeme Yéhôva ba Yésus. Wo ye fe bo ngule ya bi ényiñe ya nnôm éto. Bi maneya yé’é na, “Zambe a ne nye’an.” (1 Jean 4:16) Ve a bili fe mbamba mefulu mefe. Kalate Zambe a jô bia na, Yéhôva a ne “Zambe ya éngôngol a mvam, ôte’éte’e ya yaa, a bili abui mvam a benya mejôô.” (Nkôlan 34:6) Yéhôva a ne “mvaé a avôle ya jamé.” (Besam 86:5) Zambe a ne ôjibi, a mimboane mi mam mié mi ne zôsô. (2 Pierre 3:9; Nlitan 15:4) Nge wo ke ôsu a yé’é mejô me Zambe, wo ye yem abui mam mfa’a ya mbamba mefulu mé.

20-22. (a) Aval avé ô ne subu Zambe bebé to’o ô nji yene nye? (b) Jé wo yiane bo nge bôte befe ba yemete wo na, ô telé ayé’é dôé?

20 Aval avé ô ne subu Zambe bebé to’o ô nji yene nye? (Jean 1:18; 4:24; 1 Timothée 1:17) Éyoñe wo  lañe mam me afombô Yéhôva e Kalate Zambe été, wo ye yene na, Zambe a ne vevea môt. (Besam 27:4; Beromain 1:20) Mam wo ye yé’é a lat a Yéhôva, me aye bo na nye’ane wo nye’e nye ô yaé; a wo ye subu nye bebé.

Mbiaé a nye’e bone bé, ve nye’an Ésa wongan ya yôp a bili mfa’a wongan, ñwô wo adañ

21 Wo ye yeme na Yéhôva a ne Ésa wongan. (Matthieu 6:9) A nga ve bia ényiñ, a yi fe na bi nyiñe mvo’é. Mam ésa a ne nye’an a tak asu bone bé mme le. (Besam 36:9) Yaa, Kalate Zambe a ye’ele na ô ne bo mvôé Zambe. (Jacques 2:23) Tame fas, Nté biôme bise, Yéhôva, a yi na ô bo mvôé jé!

22 Bôte béziñe be ne yemete wo na, ô telé ayé’é dôé. Be ne ko woñe na ô tyendé ñyebe. Ve te jô’é na môt éziñ a daman amvoé mia Yéhôva. Nnye a ne nya mvôé ô ne bi.

23, 24. (a) Amu jé wo yiane ke ôsu a sili minsili? (b) Jé bia ye yene kabetôlô a tôñe nyi?

23 É ne kui na, éyoñe wo yé’é Kalate Zambe, ô bo teke wô’ô mam m’éziñ. Te wô’ô ôsone ya sili minsili, nge mvolan. Yésus a nga jô na, bia yiane sili biabebiene si ane bone be bongô. (Matthieu 18:2-4) Bongô ba sili abui minsili. Zambe a yi na ô bi biyalan. Nge ô tu’a yé’é Kalate Zambe, wo ye bi ndi nlem na mam wo yé’é me ne benya mejôô.​—Lañe Mam Minlôman 17:11.

24 Mbamba zene ya yeme Yéhôva a ne na, ô yé’é Kalate Zambe. E kabetôlô a tôñe nyi, bia ye yen amu jé Kalate Zambe a selan a bekalate bese bevok.

^ É.N. 15 Nge Kalate Zambe wôé a nji bi éyôlé Yéhôva, nge ke na, nge wo kômbô yem abui mam mefe mfa’a ya atinan, a avale ba tot éyôlé Zambe, fombô’ô Ayemé 1.