Kele vôm ô ne lañe de

Kele sous-menu

Kele tep

Bengaa be Yéhôva

Bulu

Jé Kalate Zambe a ne ye’ele bia?

 KABETÔLÔ AWÔM A ZANGBWALE

Ma’a ya ye’elane Zambe

Ma’a ya ye’elane Zambe

“Nyô a nga té yôp a si” a kômbô wô’ô meye’elane mangan.​—Besam 115:15

1, 2. Amu jé wo buni na meye’elane me ne beta das, a amu jé da sili na bi yeme mame Kalate Zambe a ye’ele a lat a meye’elan?

SI É ne angôndô ya tyôtyoé, éyoñe bia ve’e je a émo minlañ ése. Éyoñe Yéhôva a fômbô si, a yene bôte bese ya meyoñe mese ane atoé mendime ya nlônga. (Besam 115:15; Ésaïe 40:15) Akusa bo na éyoñe ba ve’e bia a émo minlañ, bi ne angôndô ya tyôtyoé, Kalate Besam 145:18, 19 a jô na: “Yéhôva a ne bebé be ba bese b’aloene nye, ba bese b’aloene nye a benya mejôô. A ye jalé nkômbane ya ba b’ako nye woñ; a ye fe wô’ô ñyone wop, a nyii be.” Avale beta ma’a bi bili! Yéhôva, Nté a ne Ngul Ése a yi na a subu bia bebé, a yi fe na a vô’ôlô meye’elane mangan. Yaa, meye’elane me ne beta dase Yéhôva a ve môt ase ya bebia.

2 Ve Yéhôva a ye wô’ô meye’elane mangan, fo’o ve nge bia kate nye mam me ne avale nkômbane wé ô ne. Aval avé bi ne de bo? Bi tame zu yene mam Kalate Zambe a jô a lat a meye’elan.

AMU JÉ BIA YE’ELANE YÉHÔVA?

3. Amu jé wo yiane Ye’elane Yéhôva?

3 Yéhôva a yi na ô ye’elane nge laan a nye. Aval avé bia yeme de? Tame lañe Bephilippien 4:6, 7. Fase ajô ya mbamba mbañete te. Njôô ya émo a nyoñe fo’o ngap a wo. A yi na ô kate nye asimesane dôé a minju’u wo tôban.

4. Aval avé mbane meye’elane wo yemete élat é ne zañe mia Yéhôva?

4 Meye’elane me avolô bia na, bi kôme subu Yéhôva  bebé. Éyoñe bemvôé ba bo mbane ya laane mam me afombô be a mam me atyele be minleme yôp amvôé dap da nen. A ne fe avale da éyoñe bia ye’elane Yéhôva. A zene ya Kalate Zambe a nga kate wo asimesane dé, aval a wô’ôtane mam, a kate fe wo mam a ye bo melu ma zu. Ô ne kate nye mam me ne wo nlem été éyoñe wo laan a nye mban. Éyoñe wo bo nalé élat é ne zañe mia Yéhôva ja yem.​—Jacques 4:8.

JÉ BIA YIANE BO ASU NA ZAMBE A WÔ’Ô MEYE’ELANE MANGAN?

5. Aval avé bia yeme na Yéhôva a nji wô’ô meye’elane mese?

5 Ye Yéhôva a wô’ô meye’elane mese? Teke’e. Melu me nkuli mejô Ésaïe, Yéhôva a nga kate bone be Israël na: “Éyoñe mi abo meye’elan abui, m’aye bo te vô’ôlô: mo menan me nto metyi ne lut!” (Ésaïe 1:15) Nde nge bi teke tabe ntyel, bi ne bo mam me ne bo na, bi tebe Yéhôva ôyap a na, a bo te wô’ô meye’elane mangan.

6. Amu jé mbunan ô ne mfi? Aval avé wo liti na ô bili mbunan?

 6 Nge bia yi na Yéhôva a wô’ô meye’elane mangan, bia yiane bi mbunan. (Marc 11:24) Nlômane Paul ô nga jô na: “A mbunan momo, môt a vo’o bo nya mvo’é mise mé; amu nyô a zu be Zambe a yiane fo’o buni na, a ne, a na a ne ñya’ane ya ba be ajeñe nye.” (Behébreu 11:6) Ve bi nji yiane jô ve na bia buni Zambe. Bia yiane liti mbunane wongan a zene ya bo Yéhôva mewô’ô éyoñ ése.​—Lañe Jacques 2:26.

7. (a) Amu jé bia yiane sili biabebiene si, a liti Yéhôva ésémé éyoñe bia ye’elane nye? (b) Aval avé bi ne liti na meye’elane mangane me aso nlem?

7 Éyoñe bia ye’elane Yéhôva bia yiane sili biabebiene si a liti nye ésémé. Amu jé? Nge da kui na, bia laan a njôé ya nlam, bia ye bo de a ésémé. Mbôle Yéhôva a ne Zambe ya Ngul Ése, jôme te nje bia yiane dañe liti nye beta ésémé, a sili bia bebiene si éyoñe bia kobô a nye. (Metata’a 17:1; Besam 138:6) Éyoñe bia ye’elane Yéhôva bi nji yiane ba’alan avale mame da, ve bia yiane nye kate mam me aso bia nlem été.​—Matthieu 6:7, 8.

8. Éyoñe bia sili Yéhôva jôm éziñ, jé éfe bia yiane bo?

8 Éyoñe bia sili Yéhôva jôm éziñ, bia yiane ve mengule mese asu na mimboane miangane mi lu’an a meye’elane mangan. Éve’an é ne na, nge bia ye’elane Yéhôva asu biôm bia yi môs, bi nji yiane bo éles, a yange na Yéhôva a ve bia biôm bise, a to ke na bi ne ngule ya saé asu na bi bi bie. Bia yiane saé a ngul ése a kañese aval ésaé ése be ne bia ve, a bi ne ngule ya bo. (Matthieu 6:11; 2 Bethessalonicien 3:10) Nge na, éyoñe bia ye’elane Yéhôva na a volô bia na bi telé mbia mboan éziñ, bia yiane sa’ale été ése é ne telé bia  meve’ele été. (Becolossien 3:5) Bi tame zu yene minsili bôte be wô’ô sili a lat a meye’elan.

MINSILI BÔTE BE WÔ’Ô SILI A LAT A MEYE’ELAN

9. Bia yiane ye’elane za? Jé kalate Jean 14:6 a ye’ele bia alat a meye’elan?

9 Bia yiane ye’elane za? Yésus a nga ye’ele beyé’é bé na be ye’elane “Tate wongan a ne yôp.” (Matthieu 6:9) A nga jô fe na: “Ma me ne zen, me ne fe benya mejôô, a ényiñ: te ke môt, a zu be Tate, ve amu ma.” (Jean 14:6) Nde bia yiane ye’elane fo’o ve Yéhôva bi tyii mvuse be Yésus. Jé ja tinane na e ye’elane bi tyii mvuse be Yésus? Asu na Yéhôva a wô’ô meye’elane mangan, bia yiane liti ésémé mfa’a mbe’e Yéhôva a nga ve Yésus. Avale bi nga yé’é, Yésus a nga zu si asu na a zu kôté bia abé a awu. (Jean 3:16; Beromain 5:12) Yéhôva a nga telé fe Yésus beta Prêtre a Ntyi’i mejô.​—Jean 5:22; Behébreu 6:20.

Ô ne ye’elan éyoñ ése

10. Ye da sili na éyoñe bia ye’elane bi tebe ngum aval été éziñ? Timine de.

10 Ye da sili na éyoñe bia ye’elane bi tebe ngum aval été éziñ? Momo, Yéhôva a nji jô bia na bia yiane kute mebôñ, e tabe tôtoo, nge tebe tetele éyoñe bia ye’elane nye. Kalate Zambe a ye’ele bia na bi ne ye’elan été ése bia yi. Ve été éte ja yiane liti na bia semé Yéhôva. (1 Minkañete 17:16; Néhémie 8:6; Daniel 6:10; Marc 11:25) Jôme ja dañe mfi mise me Yéhôva a nji bo, été bi tele éyoñe bia ye’elane nye, ve mbamba ôsimesane bi bili. Bi ne ye’elane yôp été nge si si, vôm ase bi ne, a éyoñ ése amôs nge alu. Éyoñe bia ye’elane Yéhôva bi ne tabe ndi na, ja’a môte mfe a nji vô’ôlô jôme bia jô, Yéhôva a ye vô’ôlô bia.​—Néhémie 2:1-6.

11. Mam mevé bi ne sili Yéhôva éyoñe bia ye’elane nye?

 11 Mam mevé bi ne sili éyoñe bia ye’elan? Bi ne sili jôm ése ja lu’an a nkômbane Yéhôva. Kalate Zambe a jô na: “Nge bi asili jam éziñ aval ane nkômbane wé, a wô’ô bia.” (1 Jean 5:14) Ye bi ne ye’elan asu mam me afombô bia bebien? Ôwé. E ye’elane Yéhôva a yiane bo ane nge wo laan a nyo mvôé. Bi ne nye kate jôm ése ja so bia ôsimesan été, a jam ése da so bia nlem été. (Luc 11:13) Bi ne fe ye’elane nye na a ve bia mbamba nsisime wé asu na, a volô bia na bi bo mam a nye’e. Bi ne fe sili Yéhôva na a ve bia fek, na bi nyoñe mbamba mintyi’an, a bi ne ye’elane nye na a ve bia ngule ya jibi minjuk. (Jacques 1:5) Bia yiane sili Yéhôva na a jamé bikop biangan. (Beéphésien 1:3, 7) Bia yiane fe ye’elane nye asu bôte bevok, bibu’a ya nda bôte jangan a bobejañ a bekale ya akônda. ​—Mam Minlôman 12:5; Becolossien 4:12.

12. Jé ja yiane tebe ôsu meye’elane mangan?

12 Jé ja yiane tebe ôsu meye’elane mangan? Yéhôva a nkômbane wé. Bia yiane ve nye akéva é so’o bia nlem, asu mam mese a bo asu dangan. (1 Minkañete 29:10-13) Bia yeme jame te amu éyoñe Yésus a mbe si a nga ye’ele beyé’é bé avale ba yiane ye’elan. (Lañe Matthieu 6:9-13.) A nga jô na ba yiane taté ye’elan asu na jôé Zambe é bo étyi, nge mfuban. Mvuse ya valé Yésus a nga liti na bia yiane ye’elan asu na Éjôé Zambe, é zu a na, nkômbane wé ô bobane si se. Fo’o ve éyoñe bi maneya sili biôm bi adañe mfi Yésus a nga jô na bi sili, éyoñe te nje bi ne ye’elan asu miñyiane miangan. Éyoñe bia telé Yéhôva a nkômbane wé ôsu meye’elane mangan, bia liti mam me adañe mfi asu dangan.

13. Meye’elane mangane me ayiane bo nté ôvé?

 13 Meye’elane mangan me ayiane bo nté ôvé? Kalate Zambe a nji kate nté meye’elane me ayiane bo. É ne kui na bi bo meye’elane me ne étun, nge ma me ne ayap. Bi ne bo meye’elane me too étun ôsusua na bia di, ve bi ne bo meye’elane me ne ayap éyoñe bia ve Yéhôva akéva, nge kate nye mam me atyelé bia minleme yôp. (1 Samuel 1:12, 15) Avale bôte béziñe ya éyoñe Yésus be mbe be bo’o, bi nji yiane bo ayabe  meye’elane fo’o ve asu na bôte be kam. (Luc 20:46, 47) Yéhôva a nji kam avale meye’elane te. Jame da dañe mfi mise mé é ne na, meye’elane mangane me so nlem été.

14. Bia yiane ye’elane biyoñe tañeya, a nalé a ye’ele bia jé mfa’a Yéhôva?

14 Bia yiane ye’elane biyoñe tañeya? Yéhôva a jô bia na bi bo mbane ya ye’elane nye. Kalate Zambe a jô na bia yiane “ye’elan,” ‘e bo mbane meye’elan été,’ a “ye’elane te jô’é.” (Matthieu 26:41; Beromain 12:12; 1 Bethessalonicien 5:17) Yéhôva a ne nkômesane ya vô’ôlô bia éyoñ ése. Bi ne ve nye akéva môs ôse asu nye’ane wé a akabe dé. Bi ne fe sili nye na a liti bia zen, a ve fe bia ngule nyul. Nge bi kôme ve’e ma’a bi bili na bi ne ye’elane Yéhôva, bia ye laan a nye éyoñ ése.

15. Amu jé bia yiane jô “amen” éyoñe meye’elane ma man?

 15 Amu jé bia yiane jô “amen” éyoñe meye’elane ma man? Éfia “amen” ja tinane na, “é bo’o avale wo jô,” nge “nalé a boba’an.” A ne zene ya liti na mam bia te jô meye’elane mangan me ne betotyii nalé a tinane na, bia te kate nye mam me aso bia nlem été. (Besam 41:13) Kalate Zambe a ye’ela bia na, é ne fe mvo’é ya jô “amen” e si si nge yôp été memane ya mela’ane ya mengana bôt, asu na bi liti na bia kañese mam ba te mane jô.​—1 Minkañete 16:36; 1 Becorinthien 14:16.

AVALE ZAMBE A YALANE MEYE’ELANE MANGAN

16. Ye Yéhôva a yalane fo’o meye’elane mangan? Timine de.

16 Ye Yéhôva a yalane fo’o meye’elane mangan? Ôwé a bo de. Kalate Zambe a loone nye na: “Nyô a wô’ô meye’elan.” (Besam 65:2) Yéhôva a vô’ôlô a yalane fe meye’elane bemillion be bôte ba bo, me so’o be nlem. Yéhôva a bo de mevale meval.

17. Aval avé Yéhôva a belane beéngele a bebo bisaé bé be ne si va asu na, a yalane meye’elane mangan?

17 Yéhôva a belane beéngele a bebo bisaé bé, be ne si va asu na a yalane bia. (Behébreu 1:13, 14) Abui bive’ane da liti na bôte be nga ye’elane Zambe asu na a ve be ngule ya wô’ô Kalate Zambe, ane Ngaa Yéhôva é nga ke be jôm. Kalate Zambe a liti na beéngele ba su’u ésaé nkañete ya “mbamba foé” ja bobane si se. (Lañe Nlitan 14:6.) Nde fe na, abui ya bebia é nga ye’elane Yéhôva mfa’a ya nju’u éziñe nge jôm éziñe be mbe be yi, nde be nga bi mvolane wo yian ô so’o be monyañe nge kale jangane ya nsisim.​—Minkana 12:25; Jacques 2:16.

Asu na a yalane meye’elane mangan, Yéhôva a ne belane Kristen éziñ asu na é zu volô bia

18. Aval avé Yéhôva a belane mbamba nsisime wé, a Kalate Zambe asu na a yalane meye’elane mangan?

 18 Yéhôva a belane mbamba nsisime wé asu na a yalane meye’elane mangan. Éyoñe bia sili nye ngule ya dañe meve’ele bia tôban, a ne belane mbamba nsisime wé asu na, a liti bia zen a ve bia ngule nyul. (2 Becorinthien 4:7) Yéhôva a belane fe Kalate Zambe asu na a yalane meye’elane mangan, a volô fe bia na bi nyoñe mbamba mintyi’an. Éyoñe bia lañe Kalate Zambe, bi ne yen éfuse ja ye volô bia. Yéhôva a ne fe tindi môt éziñe na, a ve éyalane bia kômbô wô’ô ésulan, nge na mvendé ya akônda é zu fas a bia éfus éziñe ya Kalate Zambe.​—Begalate 6:1.

19. Amu jé bi ne yene ve ane nge Yéhôva a nji yalane meye’elane mangan?

19 Biyoñe biziñe bi ne sili na, ‘Amu jé Yéhôva a nji ji’a yalane meye’elane mam?’ Ba’ale ôsimesane na, a yem éyoñ a aval avé a yiane yalane meye’elane mangan. A yeme jôme bia yi. Bi ne ke ôsu a ye’elan asu na bi liti na bia simesane fo’o mam bia sili nye, a na bi too fo’o nye ndi. (Luc 11:5-10) Biyoñe biziñe Yéhôva a yalane meye’elane mangan avale bi nji be bi bunan. Éve’an é na, bi ne ye’elane nye mfa’a ya nju’u éziñ, a ne bo te va nju’u ôte, ve jame da a ve bia ngule ya jibi wô.​—Lañe Bephilippien 4:13.

20. Amu jé bia yiane bo mbane ya ye’elane Yéhôva?

20 Angôndô ya mbamba jame bi bili na bia ye’elane Yéhôva. Bi ne tabe ndi na a ye vô’ôlô bia. (Besam 145:18) Éyoñe bi ne mbane ya ye’elane Yéhôva, meye’elane mete me so’o bia nlem, amvôé é ne zañe Yéhôva a bia da wôn.