Kele vôm ô ne lañe de

Kele sous-menu

Kele tep

Bengaa be Yéhôva

Bulu

Jé Kalate Zambe a ne ye’ele bia?

 KABETÔLÔ AWÔM A TANE

Aval ékaña’a Zambe a kañese

Aval ékaña’a Zambe a kañese

1. Za a yiane kate bia avale bia yiane kañe Zambe?

ABUI miñyebe da jô na da ye’ele benya mejô me lat a Zambe. Ve é nji bo nalé, amu miñyebe mite mi bili miñye’elane mevale meva mi lat a Zambe, a avale ba yiane nye kañ. Aval avé bi ne kañe Zambe ane da yian? Yéhôva nnye étam a ne kate bia avale bia yiane nye kañ.

2. Aval avé bi ne yem avale bia yiane kañe Zambe?

2 Yéhôva a nga ve bia Kalate Zambe asu na, bi bo ngule ya yem avale bi ne kañe nye. Nde yeké’é Kalate Zambe, a Yéhôva a ye volô wo na, ô nyoñe mfi ya miñye’elane mié amu a tu’a nyoñe wo ngap.​—Ésaïe 48:17.

3. Jé Zambe a yi na bi bo?

3 Bôte béziñe ba jô na, Zambe a kañese miñyebe mise, ve Yésus a nji ye’ele bia nalé. A nga jô na: “Sa môt ase a jô me na, ‘A Tat, A Tat’ a ye ke ayoñe ya yôp; ve nyo a bo ane Tate a ne yôp a nye’e.” Nde é ne mfi asu dangane na, bi yeme nkômbane Zambe a bo wô. Mboane te ô ne beta jam, amu Yésus a nga jô na bôte ba bo Zambe melo be ne fe ane bewôé bôt, ‘bôte ba bo mbia be mam.’​—Matthieu 7:21-23.

4. Jé Yésus a nga jô mfa’a ya ba ba bo nkômbane Zambe?

4 Yésus a nga bemene bia na, éyoñe bia kômbô bo nkômbane Zambe, bia ye tôban abui minjuk. A nga jô na: “Nyi’ane mbé ô ne tyôtyoé: amu mbé ô ne anen, a  zen é ne ndam, je ake vôm bôte be ajañ, a bôte be ake wôé abui. Amu mbé ô ne tyôtyoé, a zen é ne zôsô, je ake vôm bôte be anyiñ, a bôte be ayene je be ne tyôtyoé.” (Matthieu 7:13, 14) Ôfanefane zen, nge nya zene ya kañe Zambe, wo ke bôt ényiñe ya nnôm éto. Zen é ne ndam, nge mbia zene bôte ba belane je na be kañe Zambe ja ke bôt awu. Ve Yéhôva a nji yi na môt éziñ a wu. A ve môt ase fane ya yé’é mam ma lat a nye.​—2 Pierre 3:9.

ÉKAÑA’A JA NYOÑE MIÑYE’ELAN E KALATE ZAMBE

5. Aval avé ô ne yeme bôte ba kañe Zambe avale da yian?

5 Yésus a nga jô na, bi ne ngule ya yeme bôte ba kañe Zambe avale da yian. Bi ne yeme be, éyoñe bia tu’a yemelane mame ba buni a mame ba bo. A nga jô na: “Mi aye yemelane be a bibuma biap” a nga kô’ôlane na: “Élé ése é ne mvaé je awume bibuma bi ne mvaé.” (Matthieu 7:16, 17) Nalé a nji tinane na bôte ba kañe Zambe be ne teke sem. Ve bebo bisaé be Zambe ba ve ngul éyoñ ése na, be bo mbamba be mam. Éyoñe ji bia zu yene mam me aye volô bia na, bi yeme bôte ba kañe Zambe avale da yian.

6, 7. Amu jé miñye’elane ya nya ékaña’a mi aso fo’o ve Kalate Zambe? Éve’ela Yésus ja ye’ele bia jé?

6 Miñye’elane ya nya ékaña’a, mi ayiane so e Kalate Zambe été. Kalate Zambe a jô na: “Ntilan ôse ô ne nsoane be Zambe ô ne fe mvolane mfa’a ya ñye’elan, mfa’a ya nleban, mfa’a ya nsôane bôte zôsô, mfa’a ya yale bôte ñyalan ô ne mame ya zôsô été: nde môte ya Zambe a ye bo ngumba, ngumba nkômesane mfa’a ya mbamba mboan ase.” (2 Timothée 3:16, 17) Nlômane Paul ô nga tili bekristen ô jô’ô na: “Éyoñe mi  nga nyoñe mejô ya mbañete be bia, mme mete me ne mejô me Zambe, mi nga nyoñe me sa ane mejô me bôt, ve, aval ane me ne fo’o été, mejô me Zambe.” (1 Bethessalonicien 2:13) Miñye’elane ya nya ékaña’a mi aso fo’o ve Kalate Zambe. Nya ékaña’a a nji nyoñe miñye’elane mi bôt, metum, nge jôm éziñ éfe.

7 Jôm ése Yésus a nga ye’ele é mbe é so’o Kalate Zambe. (Lañe Jean 17:17.) A mbe a kobô mejô me aso Kalate Zambe. (Matthieu 4:4, 7, 10) Benya bebo bisaé be Zambe ba tôñ éve’ela Yésus, a nyoñe jôm ése ba ye’ele e Kalate Zambe été.

8. Jé Yésus a nga ye’ele bia a lat a nkañane Yéhôva?

8 Bia yiane kañe ve Yéhôva étam. Kalate Besam 83:18 a jô na: “Wo étam, nyô jôé dé é ne Yéhôva, ô ne nyô a dañe bôte bese yôp a jôô si se.” Yésus a mbe a yi na bôte be tu’a yeme za a ne nya Zambe, a nga ye’ele bôt éyôlé Zambe. (Lañe Jean 17:6.) Yésus a nga jô na: “Kañ Éso Zambe wé, ô bo nye bisaé étam.” (Matthieu 4:10) Nde aval ane bebo bisaé be Zambe, bia tôñ éve’ela Yésus. Bia kañe ve Yéhôva étam, bia belan éyôlé jé, bia ye’ele fe bôte bevo’o éyôlé Zambe, a mam a ye bo asu dangan.

9, 10. Aval avé bia liti nye’ane zañe jangan?

9 Bia yiane nye’e bôte nya nye’ane. Yésus a nga ye’ele beyé’é bé na be nye’esan. (Lañe Jean 13:35.) Teke jam éziñe ya mame ma, me ne kandé bia: vôme bia so, metume mangan, nge nté nkôñ ényiñe wongan. Nye’an ô ne zañe jangan, wo yiane late bia ane élat é ne zañe bobenyañ a bekal. (Becolossien 3:14) Nde bi nji ke bita a wôé bôt. Kalate Zambe a jô na: “Bone be Zambe be ayené, a bone be Diable: môt ase  a ne te bo zôsô, nnye a nji bo nyô Zambe, nalé fe nyô a ne te nye’e monyañe wé.” A kô’ôlane na: “Bi nye’esan: sa ane Cain a mbe nyô ya mbia môt ate, a a nga wôé monyañe wé.”​—1 Jean 3:10-12; 4:20, 21.

10 Bia belan éyoñe jangan, ngule jangan, a biôm bi mo asu na, bi volô a veane ngule nyôl. (Behébreu 10:24, 25) Bia ‘bo mam me ne mvaé mfa’a ya bôte bese.’​—Begalate 6:10.

11. Amu jé bia yiane kañese na bi ne bi ényiñe fo’o ve a zene Yésus Krist?

11 Bia yiane bo Yésus mewôk amu, nnye a ne zene ja kee bia be Zambe. Kalate Zambe a jô na: “Môte mfe a se ngule ya nyii bôt: amu a nji bo jôé afe si se be nga kate de bôt, bi ayiane yen ényiñ été.” (Mam Minlôman 4:12) E kabetôlô 5 ya kalate nyi, bi nga yé’é na Yéhôva a nga lôme Yésus na, a zu ve ényiñe jé ane ntañ asu bôte be ne mewôk. (Matthieu 20:28) Yéhôva a nga tobe Yésus na, a jôé ane Njôô ya si se. Jôme te nje Kalate Zambe a kate bia na, bia yiane bo Yésus mewôk, nge bia kômbô nyiñe nnôm éto.​—Lañe Jean 3:36.

12. Amu jé bi nji nyoñe ngap a mam me politik?

12 Bi nji yiane nyoñe ngap a mam me politik. Yésus a nji nyoñe ngap a mam me politik. Éyoñe Yésus a mbe a tele nda mejô, a nga kate Pilate njôô Beromain na: “Ayoñe [Éjôé] dam é nji bo ayoñe [Éjôé] ya si nyô.” (Lañe Jean 18:36.) Aval ane Yésus, bia wulu ba’aba’a a Éjôé Zambe é tele yôp été, jôme te nje ja’a bia nyiñe vé, bi nji nyoñe ngap a mam me politik. Ve Kalate Zambe a jô bia na, bia yiane bo “ba ba jôô” mewôk, nalé a tinane na bia yiane bo bijôé ya émo mewôk. (Beromain 13:1) Bia tôñe metiñe ya nlame bi  to. Ve éyoñ atiñe da selan a metiñe me Zambe, bia vu minlôman, mmie mi nga jô na: “A Zambe a bôt, bia yiane dañe wô’ô Zambe.”​—Mam Minlôman 5:29; Marc 12:17.

13. Jé bia kañete é lat a Éjôé Zambe?

13 Bia buni na, Éjôé Zambe nje étam, ja ye mane vaa minju’u mise mi ne émo ji. Yésus a nga jô na, “Mbamba foé ya ayoñe [Éjôé] Zambe” aye katebane si se. (Lañe Matthieu 24:14.) Teke éjôé môt éziñ é ne bo mam Éjôé Zambe ja ye bo bia. (Besam 146:3) Yésus a nga ye’ele bia na bi ye’elan asu Éjôé Zambe éyoñ a nga jô na: “Ayoñe [Éjôé] dôé é za’ak. Mam wo nye’e me bo’o si nyô, aval ane me abo yôp.” (Matthieu 6:10) Kalate Zambe, a jô na, Éjôé Zambe ja ye tyame bijôé bi bôte bise a na ‘ja ye tebe nnôm éto.’​—Daniel 2:44.

14. Wo buni na beza mbe ba kañe Zambe avale da yian?

14 Éyoñ ô maneya yé’é mam mese ma, sili’i womiene na: ‘Beza ba nyoñe miñye’elane miap Kalate Zambe? Beza ba kate bôte bevo’o éyôlé Zambe? Beza ba liti nye’ane zañe jap a buni na, Zambe a nga lôme Yésus asu na, a zu kôté bia? Beza be nji nyoñe ngap a mam me politik? Beza ba kañete na, Éjôé Zambe nje étam, é ne mane minju’u mise?’ A ne fo’o ve Bengaa be Yéhôva.​—Ésaïe 43:10-12.

JÉ WO YE BO?

15. Jé bia yiane bo nge bia yi na Zambe a kañese ékaña’a jangan?

15 É nji sili fo’o ve na, bi buni na Zambe a ne. Ja’a mimbia minsisime mia buni na Zambe a ne, ve mi nji bo nye mewôk. (Jacques 2:19) Nge bia yi na Zambe a kañese ékaña’a jangan, bi nji yiane buni ve na a ne, bia yiane fe bo nye mewôk.

16. Amu jé bia yiane ben évuse ñyebe?

 16 Asu na Zambe a kañese ékaña’a jangan, bia yiane ben évuse ñyebe. Nkuli mejô Ésaïe a nga tili na: “Kuiane zañe jé; tunane miabebien.” (Ésaïe 52:11; 2 Becorinthien 6:17) Jôme te nje bia yiane bene jôm ése é tii a mbia ékaña’a.

17, 18. Jé é ne “Beta Babylone,” a amu jé wo yiane ji’a kui atan, a kôlô Beta Babylone?

17 Jé é ne évuse ñyebe? A ne ñyebe ôse wo ye’ele bia na, bi kañe Zambe aval é nji lu’an a mejô mé. Kalate Zambe a loone bivuse miñyebe bise na, “Beta Babylone.” (Nlitan 17:5) Amu jé? Mvuse ndône mendime ya melu me Noé, abui miñye’elane ya bivuse miñyebe mi nga bialé e tisone Babylone. Bivuse miñye’elane bite bi nga yametane si se. Éve’an é ne na, bôte be mbe be kañe zambe wua a to bezambe belal. Melu ma fe, abui miñyebe da ye’ele na, Zambe a ne Zambe wua a to bezambe belal, ve Kalate Zambe a ye’ele ne sañesañe na, nya Zambe a ne fo’o ve wuwua, Yéhôva, a na Yésus a ne Mone wé. (Jean 17:3) Bôte be mbe be too Babylone be mbe fe be buni na, éfas éziñe ya nyôle môte ja ke ôsu a nyiñ éyoñ a wu a na, éfase te é ne dik ébé nduan été. Miñye’elane mite mi ne minsos.​—Fombô’ô Meyemé 14, 17, a 18.

18 Zambe a jô na, a mbeme tyame bivuse miñyebe bise. (Nlitan 18:8) Ye wo wô’ô amu jé wo yiane ji’a kui atan, a kôlô évuse ñyebe? Yéhôva Zambe a yi na ô bo de, nté éyoñ é ngenan.​—Nlitan 18:4.

Éyoñe wo ye kañe Yéhôva a bôte bé, wo ye nyine beta nda bôte Yéhôva é ne si se

19. Éyoñe wo nyoñe ntyi’ane ya kañe Yéhôva, aval avé a ye nyoñe ngap a wo?

19 Éyoñe wo nyoñe ntyi’ane ya kôlô évuse ñyebe a kañe Yéhôva, bemvôé bôé béziñe nge nda bôte jôé be  ne bo teke kañese ntyi’ane wé, a be ne tibili wo. Ve Yéhôva a ye ke li’i wo étam. Wo ye nyine beta nda bôt é ne si se, é bili bemillion be bôte ba liti nya nye’ane zañe jap, a wo ye bi ndi nleme ya nyiñe nnôm éto mfefé émo Zambe. (Marc 10:28-30) Éko éziñe bemvôé bôé béziñ, nge nda bôte jôé be nji taté kañese ntyi’an ô nga nyoñe na wo kañe Yéhôva, ba ye su’ulane kañese na ba yé’é Kalate Zambe.

20. Amu jé é ne mfi ya kañe Zambe avale da yian?

20 Ana’ana, Zambe a mbeme va abé ése a Éjôé jé ja ye jôé si se. (2 Pierre 3:9, 13) A ye bo mbamba éyoñ! Môt ase a ye kañe Yéhôva avale Yéhôva a kômbô. Nde é ne mfi asu dôé na, ô nyoñe ntyi’ane ya kañe Zambe avale da yian.