Kele vôm ô ne lañe de

Kele sous-menu

Kele tep

Bengaa be Yéhôva

Bulu

Jé Kalate Zambe a ne ye’ele bia?

 KABETÔLÔ AWÔM A MUAMÔ

Ye ma ye ve mamiene ngumba be Zambe, a ke nyoñe mbaptizô?

Ye ma ye ve mamiene ngumba be Zambe, a ke nyoñe mbaptizô?

1. Ôsimesan ôvé ô ne bi, éyoñ ô kômeya mane yé’é kalate nyi?

NTÉ ôse wo te yé’é kalate nyi, wo te yem abui benya mejô ya Kalate Zambe aval ane: ngaka’a Zambe ya nyiñe nnôm éto, vôme môt a wu a ke, a ndi nleme ya ñwômelane miñwuan. (Ecclésiaste 9:5; Luc 23:43; Jean 5:28, 29; Nlitan 21:3, 4) Éko éziñ ô tatéya na, wo tabe bisulane Bengaa be Yéhôva, a buni na, ba bo mame ya nya ékaña’a. (Jean 13:35) Ô yaneya fe taté na wo bi mbamba élat a Yéhôva, éko éziñ ô tyi’iya fe  na, wo bo mbo ésaé wé. Nde ô ne simesane na, ‘Jé ma yiane bo éyoñe ji, asu na me kañe Zambe?’

2. Amu jé mone Éthiopien a nga kôme duban?

2 Mone Éthiopien a mbe a nyiñi éyoñe Yésus, nye fe a nga bili aval ôsimesane te. Mvuse ñwômelane Yésus, Philippe ñyé’é Yésus, a nga ke kañete môt ate. Philippe a nga liti nye na, Yésus a mbe Messie. Mam mone Éthiopien a nga yé’é, me nga nambe nye nlem, ane a nga jô avôl avô na: “Mendime ma, jé ja kamane ma na me duuban?”​—Mam Minlôman 8:26-36, Mfefé Nkôñelan.

3. (a) Atiñ avé Yésus a nga ve beyé’é bé? (b) Aval avé môt a yiane duban?

3 Kalate Zambe a ye’ele ne sañesañe na, nge wo kômbô bo mbo ésaé Yéhôva wo yiane duban. Yésus a nga jô beyé’é bé na: “Mi bo meyoñe mese beyé’é a baptizô be.” (Matthieu 28:19) Yésus a nga li’i fe bia éve’ela éyoñ émien a nga duban. Be nga du nye mendim été a nyôl ése, sa ke tolé nye bone metoé mendime nlô. (Matthieu 3:16) Melu ma, éyoñe ba du Kristen, ba yiane du nye mendim été a nyôl ése, nge bo na a nyine mendime si a nlô ôse.

4. Jé mbaptizô wôé wo liti bôte bevok?

4 Éyoñe wo dubane wo liti bôte bevo’o na, wo kômbô fo’o bo mvôé Zambe a mbo ésaé wé. (Besam 40:7, 8) Nde ô ne sili womiene na, ‘Amu jé ma yiane duban?’

ÑYEMAN A MBUNAN

5. (a) Jé wo yiane taté bo ôsusua na wo duban? (b) Amu jé bisulane Bekristene bi ne mfi?

5 Ôsusua na wo duban, wo yiane taté yeme  Yéhôva ba Yésus. Ô nga taté na wo bo de, éyoñ ô nga taté na wo yé’é Kalate Zambe. (Lañe Jean 17:3.) Ve ô nji yiane su’u valé. Kalate Zambe a jô na wo yiane “jaé ne lut a ñyemane” ya nkômbane Yéhôva. (Becolossien 1:9) Bisulane Bengaa be Yéhôva bi aye volô wo na, ô yemete amvôé mia Yéhôva. Jôme te nje wo yiane bo mbane bisulane bite.​—Behébreu 10:24, 25.

Ôsusua na wo duban, wo yiane yé’é Kalate Zambe

6. Abime mam avé ya Kalate Zambe wo yiane yem ôsusua na wo duban?

6 Yéhôva a nji yange na ô yeme mam mese ya Kalate Zambe ôsusua na wo duban. A nji yange na mon Éthiopien a mane yeme mam mese ôsusua na a duban. (Mam Minlôman 8:30, 31) Bia ye ke ôsu a yé’é mam a lat a Yéhôva nnôm éto. (Ecclésiaste 3:11) Ve ôsusua na wo duban, wo yiane taté yem, a kañese mimboka’a ya miñye’elane ya Kalate Zambe.​—Behébreu 5:12.

7. Aval avé ayé’é dôé ya Kalate Zambe é nga volô wo?

7 Kalate Zambe a jô na: “A mbunane momo, môt a vo’o bo nya mvo’é mise mé.” (Behébreu 11:6) Nde wo yiane bi mbunan ôsusua na wo duban. Kalate Zambe a kate bia na bôte béziñe ya nnôme tisone ya Corinthe, be nga wô’ô miñye’elane beyé’é be Yésus. Asu’ulane ya été é mbe na: “be nga buni a baptizôban.” (Mam Minlôman 18:8) Avale da fe, ayé’é dôé ya Kalate Zambe é nga volô wo na, ô bi mbunane mfa’a ya bengaka’a be Zambe, a mfa’a ya ngule metuna’a me Yésus, me ne nyii bia abé a awu.​—Josué 23:14; Mam Minlôman 4:12; 2 Timothée 3:16, 17.

 KAÑETE’E BÔTE BEFE BENYA MEJÔ YA KALATE ZAMBE

8. Jé ja ye tindi wo na ô kañete bôte bevo’o mam ô nga yé’é?

8 Nté wo ke ôsu a yé’é abui mame ya Kalate Zambe, wo yene fe aval avé mam mete me avolô wo ényiñe jôé, mbunane wôé wo ye nen. Wo ye kômbô kañete bôte bevo’o mame wo yé’é. (Jérémie 20:9; 2 Becorinthien 4:13) Ve za wo yiane kañete mam mete?

Mbunane wo ye tindi wo na, ô kañete bôte bevo’o mame wo buni

9, 10. (a) Za ô ne taté na wo kañete mam ô nga yé’é? (b) Jé wo yiane bo nge wo kômbô kañete a akônda?

9 Ô ne kômbô kañete bôte ya nda bôte jôé, bemvôé bôé, bôte ba nyiñe wo mefefel, a bôte mia bebe mia saé vôme wua mame wo yé’é. A ne mbamba jam, ve wo yiane de bo évôvoé été a nye’an été. Da ye kui na ô bo ngule ya kañete a bôte ya akônda. Éyoñe wo ye bo ngule ya bo de, wo ye kobô a Ngaa a bo wo ayé’é ya Kalate Zambe, a kate nye na wo kômbô kañete a akônda. Nge môt ate a simesane na ô nto ve bo de, a nge ényiñe jôé ja lu’an a miñye’elane ya Kalate Zambe, éyoñe te mia nye, mia ye ke yene bemvendé bebaé ya akônda nsamba.

10 Jé ja ye boban ékôane te? Bemvendé ba ye laan a wo asu na be yeme nge wo wôk, a buni mimbôka’a ya miñye’elane ya Kalate Zambe, nge wo bo mame Kalate Zambe a jô ényiñe jôé ya môs ôse, a nge wo kômbô fo’o bo Ngaa Yéhôva. Ba’ale ôsimesane na, bemvendé ba nyoñe ngap a môt ase ya akônda, ja’a wo fe, nde te ko woñe ya laan a be. (Mam Minlôman 20:28; 1 Pierre 5:2, 3) Mvus ékôane te, bemvendé ba ye kate wo nge ô nto ngule ya taté na wo kañete a akônda.

11. Amu jé ja dañe mfi na ô tyendé ôsusua na wo kañete a akônda?

 11 Bemvendé be ne kate wo na, abui mintyendane mi asili ôsusua na wo taté na wo kañete a akônda. Amu jé ja dañe mfi na ô bo mintyendane mite? Amu éyoñe bia kañete bôte bevo’o mam a lat a Zambe, a ne ane Yéhôva émien nnye a bo de, nde fe bia yiane nyiñ avale da ve Yéhôva duma.​—1 Becorinthien 6:9,10; Begalate 5:19-21.

NJÔBAN A NKÔÑELANE NLEM

12. Amu jé bôte bese ba yiane jôban?

12 Ôsusua na wo duban, wo yiane beta bo jôm éfe. Nlômane Paul ô nga jô na: “Ajo te [jôba’an, a kôñela’ane minlem, MN], nde mam abé menane me aye bo ngule ya vas.” (Mam Minlôman 3:19) E jôban a tinan aya? A tinane na, e meme fo’o abé bia te bo. Éve’an é ne na, nge ô mbe ô nyiñi ényiñe bisôk, wo yiane jôban. A ja’a ô veya mengule mese ényiñe jôé ése na, wo nyiñ avale da yian, wo yiane ke ôsu a jôban, amu bia bese bi ne bebo mam abé a bia sili Zambe njaman.​—Beromain 3:23; 5:12.

13. E kôñelane nlem a tinan aya?

13 Ye da sili fo’o ve na ô jôbane mam abé môé? Teke’e. Nlômane Pierre ô nga jô na wo yiane fe kôñelane nlem. Nalé a tinane na, wo yiane kandan a mbia abo dulu, a taté na wo bo mbamba be mam. Asu na ô kôme wôk, bia zu nyoñ éve’ane ji: wo ke vôm ô ngenane teke tame kui môs éziñ. Éyoñ ô wuluya ôbe nté, nde wo yene na wo te nyoñe mbia zen. Jé wo ye bo? Teke bisô, wo ye sé’é abo dulu, ô tebe, ô bulan a mvus, a nyoñe mbamba zen. Avale da fe,  éyoñe wo yé’é Kalate Zambe ô ne yene na ô bili mefulu méziñ, nge mame wo yiane tyendé ényiñe jôé. Womiene wo yiane nyoñe ntyi’ane na wo kôñelane nlem. Nkôñelane nlem wo tinane na, e tyendé nge nalé a sili, a taté na wo bo mam me ayian.

VA’A WOMIENE NGUMBA BE YÉHÔVA

Ye ô nga ka’a Yéhôva na wo ye kañe nye?

14. Aval avé wo ve womiene ngumba be Zambe?

14 Beta jame mfe wo yiane bo ôsusua na wo duban a ne na, ô ve womiene ngumba be Yéhôva. Éyoñe wo ve womiene ngumba be Yéhôva, wo ka’a nye meye’elan été na wo ye kañe fo’o ve nnye étam a na, wo ye telé nkômbane Yéhôva ôsu ényiñe jôé.​—Deutéronome 6:15.

15, 16. Jé ja tindi môte na a ve émiene ngumba be Zambe?

15 E ka’a na wo ye kañe fo’o ve Yéhôva, a ne ane wo ka’a na wo ye tabe a môte wo nye’e ényiñe jôé ése. Tame fase na fame ba minga ba laane bone minlañ. Avale fam ja ke ja yeme minga, nde a taté na a nye’e nye a kômbô lu’u nye. Ja’a a ne beta ntyi’an, fam ja ye kañese mbe’e te, amu a nye’e minga.

16 Nté wo yé’é mam a lat a Yéhôva, wo taté na wo nye’e nye a wo kômbô ve mengule mese na wo kañe nye. Jame te nje ja ye tindi wo na, ô ka’a nye meye’elan été na wo ye kañe nye. Kalate Zambe a jô na môt ase a kômbô tôñe Yésus a yiane ‘nyum émiene mam.’ (Marc 8:34) Nalé a tinan aya? Nalé a tinane na jôme ja yiane tebe ôsu ényiñe jôé, é ne na ô bo Yéhôva mewôk. Jôme Yéhôva a yi nje ja dañe mfi a lôté miñyian a minsôñane miôé.​—Lañe 1 Pierre 4:2.

 TE KO WOÑE YA BO ÉKOP

17. Amu jé bôte béziñe be nji ve bebiene ngumba be Yéhôva?

17 Bôte béziñe be nji ve bebiene ngumba be Yéhôva amu, ba ko woñe na ba vo’o toé ngaka’a be nga bo Yéhôva na ba ye kañe nye. Be nji kômbô samele Yéhôva, nge na, be ne jô na nge be nji ve bebiene ngumba be Yéhôva, a ye ke sili be jôm éziñ é fombô’ô mimboane miap.

18. Jé ja ye volô wo na ô dañe woñe ya samele Yéhôva?

18 Nye’ane wo nye’e Yéhôva wo aye volô wo na, ô dañe woñe ya samele nye. Wo ye ve mengule mese na ô tôé ngaka’a ô nga bo nye, mbôle wo nye’e nye. (Ecclésiaste 5:4; Becolossien 1:10) Wo ye ke yen ayaé ya bo nkômbane Yéhôva. Nlômane Jean ô nga tili na: “Amu jame dina nde é ne nye’ane Zambe ane bi aba’ale metiñe mé: a metiñe mé me nji bo adit.”​—1 Jean 5:3.

19. Amu jé ô nji yiane ko woñe ya ve womiene ngumba be Yéhôva?

19 É nji sili na ô bo teke nsem asu na ô ve womiene ngumba be Yéhôva. A nji yange na bi bo mam a lôté abime bi ne ngule ya bo. (Besam 103:14) A ye volô wo na ô bo mam me ne mvo’é. (Ésaïe 41:10) Tabe Yéhôva ndi a nlem ôse ndemben “a ye sôane mezene môé.”​—Minkana 3:5, 6.

MMEMANE WO ATOTEBAN ANYU MENGANA BÔT ÉTÉ MFA’A YA ÉNYIÑ

20. Jam avé da tôé, éyoñ ô veya womiene ngumba be Zambe?

20 Ye wo simesane na, ô nto ngule ya ve womiene ngumba be Yéhôva? Éyoñ ô veya womiene ngumba be Yéhôva, ô nto nkômesan asu jame da tôé valé. Wo yiane duban.

21, 22. Aval avé ô ne bo “mmemane wo atoteban anyu [mengana bôt été]” asu mbunane wôé?

 21 Bo’o na ntebele bemvendé ya akônda dôé, a yeme na ô veya womiene ngumba be Yéhôva, a na wo kômbô duban. A ye yene bemvendé béziñ, ba ye beta zu yene mimboka’a ya miñye’elane ya Kalate Zambe a wo. Nge be yene na ô nto ve duban, ba ye kate wo na ô ne de bo assemblée Bengaa be Yéhôva  a zu. Assemblée ate, ba ye bo nkañete wo ye ve atinane ya mbaptizô. Môt a bo nkañete a ye sili bôte ba ye dubane minsili mibaé mi ne ti’ibi ya yalan. Éyoñe wo ye yalane minsili mite, wo ye bo “mmemane wo atoteban anyu [mengana bôt été]” asu mbunane wôé.​—Beromain 10:10.

22 Mvuse valé nye wo ye ke duban. Ba ye dube wo  mendim été a nyôl ése. Mbaptizô wo ye liti môt ase na ô veya womiene ngumba be Yéhôva a na ô nto Ngaa Yéhôva.

ATINANE YA MBAPTIZÔ WÔÉ

23. Jé ja tinane na e duban e “jôé Ésa, a Mon a mbamba nsisim”?

23 Yésus a nga jô na beyé’é bé ba ye duban e “jôé Ésa, a Mon a mbamba nsisim.” (Lañe Matthieu 28:19.) Nalé a tinan aya? Nalé a tinane na wo yemelan éto Yéhôva, a éto Yésus a bili nsôñane Zambe, a avale Zambe a belane mbamba nsisim asu na a bo nkômbane wé.​—Besam 83:18; Matthieu 28:18; Begalate 5:22, 23; 2 Pierre 1:21.

Éyoñe wo duban, wo liti na wo kômbô bo nkômbane Zambe

24, 25. (a) Mbaptizô ô ne jé? (b) Jé bia ye yene kabetôlô a su’ulan?

24 Mbaptizô ô ne jôm é ne beta mfi. Éyoñe ba dube wo mendim, nalé a tinane na ô wuya, nge na ô jô’ôya aval ényiñ ô nga be ô nyiñi ôsusua. Éyoñe wo ye kui mendim, wo ye taté mfefé ényiñe na, wo bo nkômbane Zambe. Mbaptizô wo liti na ataté éyoñe ji, wo zu kañe Yéhôva. Ba’ale ôsimesane na ô nji ve womiene ngumba be môt éziñ, ékôan éziñ, nge ésaé éziñ. Yéhôva nnye wo te ve ényiñe jôé.

25 Mveane womiene ngumba wo ye volô wo na, ô ba’ale beta amvôé a ne zañe mia Zambe. (Besam 25:14) Nalé a nji tinane na, môt a ye bi ényiñe fo’o ve amu a te duban. Nlômane Paul ô nga tili na: “Sonda’an ésaé ya nyiane wônane miabebien a woñ a mfô’ôban.” (Bephilippien 2:12) Mbaptizô ô ne fo’o ve atata’a ya ényiñe Kristen. Nde aval avé ô ne ke ôsu a subu Yéhôva bebé. Kabetôlô a su’ulan e kalate nyi, aye ve éyalane ya nsili te.