Kele vôm ô ne lañe de

Kele sous-menu

Kele tep

Bengaa be Yéhôva

Bulu

Jé Kalate Zambe a ne ye’ele bia?

 KABETÔLÔ SAMANE

Jé ja boban éyoñe môt a wu?

Jé ja boban éyoñe môt a wu?

1-3. Minsili mivé bôte ba sili a lat a awu, a biyalane bivé miñyebe miziñe mi ave?

KALATE Zambe a ka’a bia na môs éziñ “awu de aye fe bo.” (Nlitan 21:4) E kabetôlô 5, bi nga yé’é na, ntañe wo bo na bi bi ényiñe ya melu mese. Ve bôte ba ke ôsu a wu. (Ecclésiaste 9:5) Nde, beta nsili a ne na, jé ja boban éyoñe môt a wu?

2 Éyalane ya nsili te ja dañe mfi éyoñe bia te jañele môte bia nye’e. Bi ne sili na: ‘A ne vé? Ye a yene bia? Ye a ne volô bia? Ye bia ye fo’o beta yene nye?’

3 Biyalane miñyebe mi ave mfa’a ya minsili mite bi aselan. Miñyebe miziñe mi aye’ele na nge ô ne mbamba môt, wo ke yôp, ve nge ô ne mbia môt, wo di’i ébé nduan. Mivo’o mi ajô na, éyoñe môt a wu a bo nsisim, a ke fe nyiñ a bibu’a ya nda bôte jé bi maneya wu. Mi mivo’o mi ajô na, éyoñe môt a wuya a éyoñe be tyi’iya nye mejô, a beta bialé, nge beta nyiñ a nyule fe, éko éziñ ane môte mfe nge tit.

4. Ôsimesan ôvé miñyebe mi aye’ele a lat a awu?

4 Miñye’elane ya miñyebe mfa’a ôte mi aselan. Ve mise mi bili ôsimesane wua. Ôsimesan ôte ô ne na, éyoñe môt a wu jôm éziñe ya nyule jé ja ke ôsu a nyiñ. Ye jame te é ne fo’o été?

 JÉ JA BOBAN ÉYOÑE MÔT A WU?

5, 6. Jé ja boban éyoñe môt a wu?

5 Yéhôva a yeme jé ja boban éyoñe môt a wu, a nga kate fe bia na éyoñe môt a wu ényiñe jé ja tebe. Awu da selan a ényiñ. Nde éyoñe môt a wu, asimesane dé é nji ke ôsu a nyiñe vôm éziñ. * Éyoñe bia wu, bi se ngule ya yen, nge wôk, nge simesane jôm éziñ.

6 Njô bôte Salomon a nga tili na, “miñwuane mi ne te yeme jôm.” Bewu be se ngule ya nye’e nge vini, a “te ke ésaé, nge mboane jam, nge fek, nge ñyemane mam, bi ne sheol.” (Lañ Ecclésiaste 9:5, 6, 10.) Kalate Zambe a jô fe e kalate Besam 146:4 na, éyoñe môt a wu “asimesane dé” fe da wu.

JÔME YÉSUS A NGA JÔ A LAT A AWU

Yéhôva a nga té bôt asu na be nyiñe nnôm éto e si

7. Jé Yésus a nga jô a lat a awu?

7 Éyoñe mvôé jé Lazare é nga wu, Yésus a nga jô beyé’é bé na: “Mvôé jangane Lazare a ne ôyo.” Yésus a nji be a kômbô’ô jô na Lazare a wo’on. Ajô te Yésus a nga beta jô na: “Lazare a wuya.” (Jean 11:11-14) Nde Yésus a nga liti na awu é ne ane awo’on. A nji jô na Lazare a mbe yôp, nge na a mbe a bibu’a ya nda bôte jé bi maneya wu. Nalé fe a nji jô na Lazare a mbe a di’i ébé nduan, nge na a nga beta bialé ane môte mfe nge ane tit. A mbe ve ane nge Lazare a ne ôyo melom. Bifuse bife ya Kalate Zambe bi aliti na awu é ne ane ôyo melom. (Besam 13:2, 3) Nlômane Paul ô nga tili fe na, bekristene béziñe “be maneya ke ôyo.”​—1 Becorinthien 15:6.

8. Aval avé bia yeme na Zambe a nji té bôt asu na be wu?

 8 Ye Zambe a nga té Adam ba Ève na ba ye wu môs éziñ? Momo! Yéhôva a nga té be asu na be nyiñe nnôm éto meva’a été, be to mvo’é minsôn. Éyoñe Yéhôva a nga té bôt, a nga té be a nkômbane ya nyiñe nnôm éto. (Ecclésiaste 3:11) Bebiaé be nji kômbô na bone bap be yômbô a wu, Yéhôva fe a bili aval ôsimesane da mfa’a wongan. Ve nge Zambe a nga té bia asu na bi nyiñe nnôm éto, amu jé bia wu?

 AMU JÉ BIA WU?

9. Amu jé atiñe Yéhôva a nga ve Adam ba Ève é nji be ayaé ya tôñ?

9 Afup Éden, Yéhôva a nga jô Adam na: “Ô ne ngule ya di bibuma ya bilé bise bi ne afup été ane wo nye’e: ve ébuma ya élé ya yeme mame me ne mvaé a abé, wo aye bo te di: amu môse wo aye di je, wo aye fo’o wu.” (Metata’a 2:9, 16, 17) Atiñe te é nji be ayaé ya tôñ, a Yéhôva a mbe a bili ngule ya kate Adam ba Ève jôm é ne mvaé a jôm é ne abé. Nge be nga ye bo Yéhôva mewôk, be nga ye liti na ba semé éjôé jé. A mbe fe zene ya liti na ba ve Yéhôva akéva amu mame mese a nga bo be.

10, 11. (a) Aval avé Satan a nga du’u Adam ba Ève? (b) Amu jé jam Adam ba Ève be nga bo é nji be jame ya jamé?

10 Ve éngôngole jam é ne na, Adam ba Ève be nga tobe na ba bo Yéhôva melo. Satan a nga jô Ève na: “Ye Zambe a nga jô fo’o na, te diane bibuma ya bilé bise ya afup?” Ane Ève a nga yalane na: “Bi ne ngule ya di bibuma ya bilé ya afup, ve ébuma ya élé é ne zañ afup, Zambe a nga jô na ‘te diane je, nalé fe te nambane je, mi za wu.’”​—Metata’a 3:1-3.

11 Ane Satan a nga jô na: “Mia ye ke tu’a wu: amu Zambe a yeme na, môse mi aye di je, môs ôte mise menane me aye kuiban, nalé mi aye bo ane Zambe, a yeme mvaé a abé.” (Metata’a 3:4-6) Satan a mbe a yi na Ève a simesane na, émien a ne ngule ya nyoñe ntyi’ane ya jé é ne mvaé a jé é ne abé. Éyoñe te fe a nga laane minsose mfa’a ya jame da ye kui nge Ève a bo melo. Satan a nga jô na Ève a ye ke tu’a wu, jôme te nje Ève a nga di ébuma, a ve fe nnôme wé. Adam  ba Ève be mbe be yeme na Yéhôva a nga jô na be nji yiane di ébuma. Éyoñe be nga di je, be nga tobe na ba biasé atiñ é mbe tyi’ibi ya tôñ. Be nga liti fe na, be nji semé Ésa wop ya yôp été a nye’e be. Jame be nga bo é nji be jame ya jamé!

12. Amu jé é mbe jame ya ôsame na Adam ba Ève be biasé Yéhôva?

12 Aval ôsame Adam ba Ève be nga samele Nté wop! Wo simesane aya? Nge ô nga ve mengule mese na ô yalé monafam, nge mona minga, éyoñe te ba bo wo ébiasé, a tebe wo ngame yat? Ye wo ye ke wô’ô nleme mintaé?

Adam a nga so metek, a nga bulane fe metek

13. Mejô Yéhôva a nga jô na “Wo aye timane fe metek,” me atinan aya?

13 Éyoñ Adam ba Ève be nga bo Zambe melo, be nga jañele mbamba jame be nga bili, ényiñe ya nnôm éto. Yéhôva a nga jô Adam na: “Amu ô ne metek, wo aye timane fe metek.” (Lañe Metata’a 3:19.) Nalé ate a tinane na Adam a nga ye beta bulane metek, ane a nji nyiñe môs éziñ. (Metata’a 2:7) Éyoñ Adam a bo ya abé, ane a nga wu. A nji ke ôsu a nyiñ.

14. Amu jé bia wu?

14 Nge Adam ba Ève be nga ye bo Zambe mewôk, ve be ngenane be vee a kui den. Ve éyoñe be nga  bo nye melo, be nga bo nsem, a su’ulane wu. Nsem, ô ne ane beta ôkone bi nga nyoñe be bebiaé bangan. Bia bese bia bialé abé été, jôme te nje bia wu. (Beromain 5:12) Ve sa ke jame Yéhôva a sôñ asu bôte nde le. Zambe a nji yi na bôte be wu, a Kalate Zambe a jô na awu é ne “nsiñ.”​—1 Becorinthien 15:26.

BENYA MEJÔ BA KÔTÉ BIA

15. Aval avé benya mejô a lat a awu ba kôté bia?

15 Benya mejô a lat a awu ba kôté bia mfa’a ya bivuse miñye’elan. Kalate Zambe a ye’ele bia na, bewu be nji wô’ô mintaé nge ôlun. Bi se ngule ya kobô a be, a be se ngule ya kobô a bia. Bi se ngule ya volô bewu a be se ngule ya volô bia. Be se ngule ya bo bia abé, nde bi nji yiane ko bewu woñ. Ve abui miñyebe da ye’ele na, bewu ba nyiñe vôm éziñ a na, bi ne volô be éyoñe bia ve betebe ôsu moné, a ba bôte ba nyoñ ane minfufup. Ve éyoñe bia yeme benya mejô a lat a awu bia ye ke du’uban.

16. Minsose mivé abui miñyebe da ye’ele a lat a bewu?

16 Satan a belan évuse ñyebe asu na a du’u bia, a asu na bi buni na bewu ba ke ôsu a nyiñe vôm éziñ. Éve’an é ne na, miñyebe miziñe mi aye’ele na éyoñe bia wu, jôm éziñe ya nyule jangane ja ke ôsu a nyiñe vôm éziñ. Ye ñyebe wôé wo aye’ele wo nalé, ye wo aye’ele wo jôme Kalate Zambe a jô a lat a bewu? Ane é nga bobane be Ève, Satan a ke ôsu a belane minsos asu na a tindi bôte na be lume Yéhôva mvus.

17. Amu jé ñye’elane wo jô na, bôte ba di’i ébé ndu’ane wo ta Yéhôva?

 17 Mam abui miñyebe mi aye’ele me ne angôndô. Éve’an é ne na, miñyebe miziñe mi aye’ele na, mbia be bôte ba di’i nnôm éto ébé nduan. Minsose mite mia ta Yéhôva. A se ngule ya foñôsô bôt avale te! (Lañe 1 Jean 4:8.) Ô ne yene mbiaé a futi mone wé mo ndu’an, na a fôñôsô nye aya? Wo ye vini avale môte te. Wo ye ke kômbô yeme nye. Avale te nde Satan a yi na bi yene Yéhôva!

18. Amu jé bi nji yiane ko bewu woñ?

18 Miñyebe miziñe mi ajô na, éyoñe bôte ba wu ba bo minsisim. Miñyebe mite, mi aye’ele na bia yiane semé a ko minsisime woñ, amu mi ne ngule ya bo bemvôé nge besiñe bangan. Abui bôte da buni minsose mite. Ba ko bewu woñ, jôme te nje ba kañe be, be li’i kañe Yéhôva. Te vuane na, bewu be se ngule ya simesane nge wô’ô jôm éziñ, nde bi nji yiane ko be woñ. Yéhôva a ne Nté wongan. A ne nya Zambe a nnye étam bia yiane kañ.​—Nlitan 4:11.

19. Aval avé bia yeme na benya mejôô alat a awu ba volô bia?

19 Éyoñe bia yeme benya mejôô alat a awu, bi vo’o beta du’uban. Benya mejôô bete ba volô bia na, bi tu’a wô’ô mbamba ngaka’a Yéhôva a nga bo mfa’a ya ényiñe jangan a mfa’a ya melu ma zu.

20. Jé bia ye yene kabetôlô a tôñe nyi?

20 Den a nto abui mimbu, mbo ésaé Yéhôva Job a nga sili na: “Nge môt a wu, ye a ye beta vee?” (Job 14:14) Ye môt a wuya a ne fo’o beta nyiñ? Zambe a ve bia angôndô ya mbamba éyalan e Kalate Zambe été. Bia ye yen éyalane te e kabetôlô a tôñe nyi.

^ É.N. 5 Bôte béziñe ba buni na nsisime wo ke ôsu a nyiñ éyoñe môt a wuya. Nge wo kombô yeme mame mefe, fombô’ô Meyemé 17 a 18.