Kele vôm ô ne lañe de

Kele sous-menu

Kele tep

Bengaa be Yéhôva

Bulu

Jé Kalate Zambe a ne ye’ele bia?

 KABETÔLÔ MUAMÔ

Éjôé Zambe é ne jé?

Éjôé Zambe é ne jé?

1. Bia zu kobô ajô meye’elane mevé?

BIZU’U bi bôte bia yeme meye’elane ba loone na, Meye’elane me Tate. Yésus a nga ye’ele beyé’é bé avale ba ye’elan a zene ya meye’elane mete. Mame mevé a nga sili? A amu jé meye’elane mete me ne bia mfi den?

2. Mam melale mevé me ne mfi Yésus a nga ye’ele bia na bi sili?

2 Yésus a nga jô na: “Ajô te, ye’ela’ane Zambe ana: ‘A Tate wongan a ne yôp, jôé dôé é bo’ étyi’i. Ayoñe [Éjôé jôé] dôé é za’ak. Mam wo anye’e me bo’o si nyô, aval ane me abo yôp.’” (Lañe Matthieu 6:9-13.) Amu jé Yésus a nga ye’ele bia na, bi sili mam mete melal?​​—Fombô’ô Ayemé 20.

3. Jé bia kômbô yem, é lat a Éjôé Zambe?

3 Bi yé’éya na éyôlé Zambe é ne Yéhôva. A bi yeneya fe nkômbane Zambe mfa’a bôt a si. Ve jé mejô me Yésus ma me atinan: “Ayoñe [Éjôé jôé] dôé é za’ak”? Bia zu yé’é jé é ne Éjôé Zambe, jé Éjôé te ja ye bo, aval avé ja ye fe fubu jôé Zambe.

ÉJÔÉ ZAMBE É NE JÉ?

4. Jé é ne Éjôé Zambe, a za a ne Njôô ya Éjôé te?

4 Yéhôva a nga telé Éjôé yôp été, a tobe Yésus na a bo Njôô ya Éjôé te. Kalate Zambe a loon éjôé te na Éjôé Zambe. Yésus a ne “Njôô ya bejô bôt, a Tate ya betate.” (1 Timothée 6:15) Nalé a tinane na Yésus  a ne ngule ya bo abui mam a lôt abime njôô bôt ase a ne bo, a bili fe ngul a lôte ngule bejôô bôte bese be bili fufulu.

5. Éjôé Zambe ja ye jôé é tele vé? Ja ye kui vé?

5 Éyoñe Yésus a wômôya mvuse melu mewôme menyin, ane a nga bulane yôp. Ane Yéhôva a nga su’ulane telé nye ane Njôô ya Éjôé. (Mam Minlôman 2:33) Éjôé Zambe ja ye jôé si, é tele yôp. (Nlitan 11:15) Jôme te nje Kalate Zambe a loon Éjôé Zambe na ‘ayoñe [Éjôé] ya yôp.’​—2 Timothée 4:18.

6, 7. Jé ja bo na Yésus a bo beta Njôô a dañe njôô bôt ase?

6 Kalate Zambe a jô na, Yésus a lôte njôô bôt ase amu, “nnye étam a ne te wu.” (1 Timothée 6:16) Bejôô bôte bese ba su’ulane wu, ve Yésus a ye ke wu môs éziñ. Mbamba be mame bese Yésus a ye bo asu dangan, be aye bo nnôm éto.

7 Nkulan ajô ya kalate Zambe wo jô na, Yésus a ye bo Njôô a ne zôsô a ko bôt engôngol: “Nsisime Yéhôva w’ aye tabe be nye, nsisime ya ñyemane mam a fek, nsisime ya mbôndane fek a ngu, nsisime ya ñyeman a woñe ya Yéhôva. A ye yene mvaé ya ko Yéhôva woñ; a ye bo te tyi’i mejô a ñyemane ya mis, nge tyi’i mam a ñwô’ane ya melo; ve aye tyi’i minzôzoé mejô a zôsô.” (Ésaïe 11:2-4) Ye wo yi na ô bi avale njôô bôte te?

8. Aval avé bia yeme na Yésus a ye ke jôé étam?

8 Zambe a nga tobe bôte béziñ asu na ba be Yésus be jôé yôp été. Éve’an é ne na, nlômane Paul ô nga jô Timothée na: “Nge bi ajibi, bi aye fe jôô bia  be nye.” (2 Timothée 2:12) Bôte bambé ba ye jôé a Yésus?

9. Bôte bambé ba ye jôé a Yésus? Éyoñ évé Zambe a nga taté na a tobe be?

9 Avale bi nga yé’é kabetôlô 7, nlômane Jean ô nga bi ñyenane vôm ô nga yene Yésus ane Njôô yôp été a bejôô befe, 144 000. Beza be ne bôte 144 000 ba? Jean a timine na, “be be’e jôé [Yésus] a jôé Ésa wé ntilane mvome mesu jap.” A nga kô’ôlane na: “Bana be ne ba be atôñe Mone Ntômba [a ne Yésus] vôm ase a ke. Bana be nga kusebane be so’o be bôt.” (Lañe Nlitan 14:1, 4.) Bôt 144 000 be ne bezôsô Bekristene Zambe a nga top asu na, ba be Yésus ‘be jôé si.’ Éyoñe ba wu, ba wômô asu ényiñe ya yôp. (Nlitan 5:10) Ataté melu minlôman, Yéhôva a tobe bezôsô bekristen asu na be bo nsamba bejôô bôte 144 000.

10. Amu jé ntobane Yéhôva a nga tobe Yésus a bôte 144 000 wo liti nye’an a bili asu dangan?

10 Yéhôva a nye’e bia amu a nga ta’a na Yésus ba be bôte be jôé. Yésus a ye bo mbamba njôô amu a yeme bia. A yeme minju’u môta binam a tôbane mie. Paul a nga jô na Yésus a wô’ô bia mintaé, a ne “nnamban a ñwô’an ate’e wongan,” a na a “nga yene meve’ele mimfa’a mise, aval ane bia yen.” (Behébreu 4:15; 5:8) Bôte 144 000 be fe ba yeme minju’u môt a binam a tôbane mie. Be nga juane metyi me abé a akon. Nde bi ne tabe ndi na, Yésus a bôte 144 000 ba ye ke yeme fo’o ve asimesane dangan, ve minju’u miangane fe.

 ÉJÔÉ ZAMBE JA YE BO JÉ?

11. Amu jé Yésus a nga ye’ele beyé’é bé na be ye’elan asu na nkômbane Zambe ô bo yôp?

11 Yésus a nga ye’ele beyé’é bé na, be ye’elan asu na nkômbane Zambe ô bo yôp. Amu jé? Bi nga yé’é kabetôlô 3 na, Satan Diable a nga bo Yéhôva engana’a. Éyoñe Satan a boya engana’a, ane Yéhôva a nga jô’é na Satan a mbia minsisime be tabe yôbe nté éziñ. Nde, sa ke bôte bese be mbe yôp, mbe be mbe be bo’o nkômbane Zambe. E kabetôlô 10, bia ye yé’é abui mam é lat a Satan a mbia minsisim.

12. Kalate Nlitan 12:10, a kobô ajô ya mam mevé mebaé me adañe mfi?

12 Kalate Zambe a timine bia na, nane Yésus a nga bo Njôô ya Éjôé Zambe, a nga bo bita a Satan. (Lañe Nlitan 12:7-10.) Éfus 10 ja liti bia mam mebaé me ne mfi me nga boban. Yésus a taté na a jôé Éjôé Zambe, a ba titane satan yôp a wua nye si. Avale bia ye yé’é, mam mete me bobaneya.

13. Jé é nga boban éyoñe be nga titane Satan yôp?

13 Kalate Zambe a liti bia meva’a bezôsô beéngele be nga bi éyoñe be nga titane Satan a mbia minsisime yôp. Bia lañe na: “A yôp ése, va’ak, a mia bôte mi to de été!” (Nlitan 12:12) Éyoñe ji mvo’é a élat, bi nto vôm ase e yôp été amu bôte bese be nga bo nkômbane Zambe.

Nté ane be nga titane Satan a mbia minsisime yôp, minju’u mi jaéya si. Minju’u mite mi mbeme man

14. Jé é nga bobane si éyoñe be nga titane Satan yôp?

14 Ve ényiñe ya si ja selan. Bitua bi mame bia kui bôt “amu Diable a maneya sise si a zu be mia” a “a bili beta ayaa, a yeme na a bili ve ôyôme nté.” (Nlitan 12:12) Satan a wô’ô mbia ôlun. Be nga  titane nye yôp, a yeme fe na a mbeme wu. A bo mame mese a ne ngule ya bo asu na, si é bo ne zameta zametan. A na mintaé, a minju’u mi bobane si ése.

15. Nkômbane Zambe asu si ô ne ôvé?

15 Ve nkômbane Zambe asu si ô nji tyendé. A ke ôsu a yi na bôte be ne teke nsem, be nyiñe nnôm éto paradis e si va. (Besam 37:29) Nde aval avé Éjôé Zambe ja ye tôé jame te?

16, 17. Jé Kalate Daniel 2:44 a ye’ele bia mfa’a ya Éjôé Zambe?

16 Nkulane mejô ya Daniel 2:44 wo jô na: “Melu ya bejô bôte bete, Zambe ya yôp a ye telé ayoñe d’aye bo te jañ nnôm éto, nalé fe njôane ya été w’aye bo te li’i mo me ayoñe bôte afe; ve ayoñ éte d’aye bu’u meyoñe mete mese bitun a di me, a d’aye tebe nnôm éto.” Jé nje nkulane mejô wu, wo aye’ele bia mfa’a ya Éjôé Zambe?

17 Jam ôsu, nkulane mejô wo akate bia na, Éjôé Zambe ja ye taté na ja jôé “melu ya bejô bôte bete.” Nalé a tinane na bijôé bivo’o bi aye ke ôsu a jôé si éyoñ Éjôé Zambe ja ye taté na ja jôé. Jame baa, nkulane mejô wo kate bia na Éjôé Zambe ja ye tabe nnôm éto a teke éjôé éfe ja ye zu tyendé je. Jame lale, bita bi aye bobane zañ Éjôé Zambe a bijôé ya émo ji. Éjôé Zambe ja ye dañe bita a bo susu’a Éjôé ja ye jôé si se. Nde, bôte ba ye bo betabe ya mbamba éjôé be ngenane teke tame tabe môs éziñ.

18. Ba loone bita bi asu’ulane zañ Éjôé Zambe a bijôé ya émo ji aya?

18 Aval avé Éjôé Zambe ja ye jôé si se? Ôsusu’a na bita bi asu’ulan, ba loene na, bita ya Harmaguédon  bi ataté, mbia minsisime ba ye du’u “bejô bôte ya si se, a kôane be mfa’a ya mewosane ya beta môse ya Zambe, nyô a ne Ngul Ése.” Yaa, bijôé bi bôte bi aye tôkan a bo bita a Éjôé Zambe.​—Nlitan 16:14, 16; fombô’ô Ayemé 10.

19, 20. Amu jé bia yange na Éjôé Zambe é zu jôé si se?

19 Amu jé bia yange Éjôé Zambe? Bi bili beamu belal. Amu ôsu, bi ne be bo mam abé, jôme te nje bia kon a wu. Ve Kalate Zambe a jô na bia ye nyiñe nnôm éto Éjôé Zambe si. Jean 3:16 a jô na: ‘Amu beta nye’ane Zambe a nga nye’e bôte ya si nyô, a nga lôm atyi’i Mone dé, ajô te bôte bese môt a buni nye, a ye jañ, ve bi ényiñe ya melu mese.’

20 Amu baa bia yange nye Éjôé Zambe a ne na, mbia be bôte ba bômane bia. Abui da laane minsos, da wup a bo mame me ne te yian. Bi se ngule ya bo jôm éziñ asu na bi va mame mete, ve Zambe a ne de bo. Mbia be bôte ba ye wu Harmaguédon. (Lañe Besam 37:10.) Amu lale bia yange nye Éjôé Zambe a ne na, bijôé bi bôte bi ne atek, njet a ékotekot. Bi nji volô bôte na be bo Zambe mewôk. Kalate Zambe a jô na, “môte wua a jôô môte mfe njôane ya ndamane nye.”​—Ecclésiaste 8:9.

21. Aval avé Éjôé Zambe ja ye bo na nkômbane Zambe ô bobane si se?

21 Mvuse Harmaguédon, Éjôé Zambe ja ye bo na nkômbane Zambe ô bobane si se. Éve’an é ne na, ja ye jiane Satan a mbia minsisim. (Nlitan 20:1-3) Teke môt éziñ a ye beta kone nge wu. A zene ya ntañ, bezôsô be bôte ba ye bo ngule ya nyiñe nnôm  éto e Paradis. Nalé a tinan aya? Nalé a tinane na, éyoñ Éjôé Zambe ja ye jôé  si, bôte bese ba ye ve éyôlé Zambe duma.​—Fombô’ô Ayemé 21.

YÉSUS A NGA BO NJÔÔ ÉYOÑ ÉVÉ?

22. Aval avé bia yeme na yésus a nji be Njôô bôt éyoñ a mbe si, nge nane a nga wômô?

22 Yésus a nga ye’ele beyé’é bé na be ye’elane na: “Ayoñe [Éjôé] dôé é za’ak.” É mbe fo’o é yené’é ne sañesañe na, Éjôé Zambe ja ye so melu ma zu. Yéhôva a nga taté telé Éjôé jé, a bo na Yésus a bo Njôô. Ye Yésus a nga bo Njôô nane a nga bulane yôp? Teké’é, a nga yange. Mvuse ñwômane Yésus, Pierre ba Paul be nga timine de éyoñe be nga jô na nkulane mejô ya kalate Besam 110:1 ô nga tôébane be Yésus. Yéhôva a jô nkulane mejô te na: “Tabe’e si mbo nnôme wom, akekui éyoñe me aye bo bôte be asiñe wo jôme ya telé mebo môé.” (Mam Minlôman 2:32-35; Behébreu 10:12, 13) Yésus a nga yange mimbu bambé ôsusu’a na Yéhôva a telé nye Njôô bôt?

Éjôé Zambe ja ye bo na nkômbane Zambe ô bobane si se

23. (a) Éyoñ évé Yésus a nga taté na a jôé ane Njôô ya Éjôé Zambe? (b) Jé bia ye yé’é kabetôlô a tôñe nyi?

 23 Abui mimbu ôsusua na mbu 1914 wo kui, mone nsamba bezôsô bekristen a nga tu’a yeme na mbu ôte ô ne beta mbu ya nkulane mejô ya Kalate Zambe. E mam me alôtan émo ji ane mbu te ô nga kui, me aliti na Bekristene bete be nga jô benya mejôô. Yésus a nga taté na a jôé mbu te. (Besam 110:2) Nane a nga taté na a jôé, Yésus a nga wua Satan si. Éyoñe ji, Satan “a bili ve ôyôme nté.” (Nlitan 12:12) E kabetôlô a tôñe nyi, bia ye yene ne sañesañe na, bi nga nyiñ éyoñe te. Bia ye fe yé’é na Éjôé Zambe é mbeme zu bo na nkômbane Zambe ô bobane si se.​—Fombô’ô Ayemé 22.