Kele vôm ô ne lañe de

Kele sous-menu

Kele tep

Bengaa be Yéhôva

Bulu

Jé Kalate Zambe a ne ye’ele bia?

 KABETÔLÔ LALE

Nsôñane Zambe asu bôt ô ne ôvé?

Nsôñane Zambe asu bôt ô ne ôvé?

1. Nsôñane Zambe asu bôt ô ne ôvé?

ZAMBE a bili mbamba nsôñan asu bôt. A nga té Adam ba Ève asu na be nyiñ afup Éden, angôndô ya abeñe vôm. Nsôñane wé mfa’a wop ô mbe na, be biaé bon a bo na si ése é bo paradis, a be nyoñe fe betite ngap.​—Metata’a 1:28; 2:8, 9, 15; fombô’ô Ayemé 6.

2. (a) Aval avé bia yeme na Yéhôva a ye bo jam a nga sôñ? (b) Jé Kalate Zambe a ye’ele mfa’a ya ényiñe ya nnôm éto?

2 Ye wo simesane na bia ye beta nyiñe paradis môs éziñ? Yéhôva a jô bia na: “Me tyi’iya de nlem, me aye fe bo de.” (Ésaïe 46:9-11; 55:11) Yaa! A ye bo jam a nga sôñ a jôm éziñ, ja ye ke télé nye. Yéhôva a yem amu jé a nga té si. A “nji té je na é bo ne sangañ.” (Ésaïe 45:18) A yi na si ése é jaé a bôt. Avale bôt avé Zambe a yi na é nyiñe si, a nté ôvé? Kalate Zambe a jô na: “Bôte be ne zôsôô [nge mewôk] be aye nyoñe si a tabe été nnôm éto.”​—Besam 37:29; Nlitan 21:3, 4.

3. Minsili mivé bi ne ngule ya sili, éyoñe bia yene bôte ba kon a wu?

3 Ve den, bôt ba ke ôsu a kon, a wu. Abui bevôm, bôt ba wosan a wôan. A nji bo nsôñane Zambe le. Jé é nga boban? Amu jé nsôñane Zambe ô nji tôéban? Kalate Zambe étam, nnye a ne kate bia de.

 NSIÑE ZAMBE

4, 5. (a) Za a nga belane nyo asu na a kobô Ève afup Éden? (b) Aval avé zôsô môt a ne tyendé a bo ñwuwup?

4 Kalate Zambe a jô na, Zambe a bili nsiñ a “lobane na, Diable a Satan.” Satan a nga belane nyo asu na a kobô Ève afup Éden. (Nlitan 12:9; Metata’a 3:1) A nga bo na Ève a buni na nyo nje é mbe é kobô’ô.​—Fombô’ô Ayemé 7.

5 Nde, ye Zambe nnye a nga té Satan Diable? Teké’é! Éngele ate a mbe yôp éyoñe Zambe a nga kôme si asu Adam ba Ève; a nga tyendé, ane a nga bo Diable. (Job 38:4, 7) Jame te é ne boban aya? Aval avé zôsô môt a ne tyendé a bo ñwuwup? A nji bialé ñwuwup. Ve a nyamete, nge kômbô nyoñe jôm é nji bo énjé. A simesane jôme te éyoñ ése; a mbia nkômbane ya nleme wé a yaé. Nge a yene fan, a ye wup. Avale te nde a tyendé a bo ñwuwup.​​—Lañe Jacques 1:13-15; fombô’ô Ayemé 8.

6. Aval avé éngele éziñ a nga bo nsiñe Zambe?

6 Jame te nde é nga kui be éngele ate. Éyoñe Yéhôva a téya Adam ba Ève, ane a nga jô be na be biaé bon, a fôé a “yiane si nyô.” (Metata’a 1:27, 28) Éngele ate a nga yiane bi ôsimesane wu: ‘Bôte ba bese be ne kañe ma a lôte na be kañe Yéhôva!’ Aval a mbe a kele ôsu a simesane jame te, nde fe mbia nkômbane wé a mbe a yaé. Éngele ate a mbe a yi na bôt be kañe nye. Nde a nga ke laan Ève minsos a du’u nye. (Lañe Metata’a 3:1-5.) Mboan ôte ô nga bo na a bo Satan Diable, nsiñe Zambe.

7. (a) Amu jé Adam ba Ève be nga wu? (b) Amu jé bia yômbô a wu?

7 Adam ba Ève be nga bo Zambe melo a di ébuma.  (Metata’a 2:17; 3:6) Be nga bo nsem e mise mé, ane be nga su’ulane wu avale Yéhôva a nga jô. (Metata’a 3:17-19) Bone be Adam ba Ève bese ba wu amu, bese be ne bebo mam abé. (Lañe Beromain 5:12.) Asu na bi kôme wô’ô amu jé bone be Adam bese be ne bebo abé, bi tame nyoñ éve’ane ji. Môt a yame belet ésua. Ésua éte é bili mfitan. Belet ése ja ye kui été ja ye bi mfitan ôte. Éyoñ Adam a nga bo Zambe melo, a nga sem. Bia bese bi ne bebo mam abé, nge na, bi bili “mfitan” amu bi ne bone bé. Bia yômbô a wu amu bia bese bi ne bebo mam abé.​—Beromain 3:23; fombô’ô Ayemé 9.

8, 9. (a) Jé Satan a nga yi na Adam ba Ève be buni? (b) Amu jé Yéhôva a nji wôé bebo éngana’a été été?

8 Satan a nga taté na a bo Yéhôva éngana’a éyoñ a nga bo na, Adam ba Ève be bo Zambe melo. A mbe a yi na Adam ba Ève be buni na Yéhôva a ne nlaane minsos a mbia njôô, nyô a nji yi mvo’é jap. Satan a nga jô na, é nji bo mfi na Zambe a kate môt jôm a yiane bo. Adam ba Ève bebiene ba yiane tobe jôm é ne mvaé a ji é ne abé. Nde jé Yéhôva a nga bo? A mbe ngule ya wôé bebo éngana’a été été. Ve ye nalé a nga ye liti na Satan a ne nlaane minsos? Momo.

9 Yéhôva a nji wôé bebo éngana’a été été. Ve a nga jô’é na éyoñ é lôt asu na, bone be bôt be jôé bebien. É nga kuliban éngeñgeñe na, Satan a ne nlaane minsos a na, Yéhôva nnye a yeme jôm é ne mvo’é asu bôt. Bia ye yé’é abui mam a lat a ajô te e kabetôlô 11. Ve wo simesan aya mfa’a ya ntyi’an Adam ba Ève be  nga nyoñ? Ye jame te é mbe zôsô mfa’a wop na, be buni Satan a bo Zambe melo? Yéhôva a nga ve Adam ba Ève jôm ése. A nga ve be mvo’é ya minsôn, mbamba vôme ya tabe, a ésaé é mbe mvo’é asu dap. Ve Satan a nji ve be jôm éziñ é ne mvo’é asu dap. Nge wo ô nga tele été te, ô nga ye bo aya?

10. Jé môt ase ya be bia a ne top?

 10 Den, môt ase ya bebia a ne tobe jame da ya mam ma, amu ényiñe jé é tii a ntoban a ye bo. Bi ne tobe Yéhôva ane Njôé wongan a bo nye mewôk. Ntobane te wo aye liti na, Satan a ne nlaane minsos. Ve bi ne fe tobe Satan ane njôé wongan. (Besam 73:28; lañe Minkana 27:11.) E si se, bôte ba bo Zambe mewô’ô be ne angôndô ya tyôtyoé. Nya ajô a ne na, sa ke Zambe nnye a jôé émo ji. Ve nge sa ke nnye, za a jôé ñhe?

ZA A JÔÉ ÉMO JI?

Nge meyoñe mete me nji be ma me Satan, ye a nga ye me ka’a Yésus?

11, 12. (a) Ngaka’a Satan a nga bo Yésus a lat a meyoñe ya si, ja ye’ele bia jé? (b) Bifuse ya Kalate Zambe bivé bi aliti na Satan, nnye a jôé émo?

11 Yésus a mbe fo’o a yeme za a jôé émo. Môs éziñe Satan “a nga liti nye meyoñe mese ya si nyi a duma ya été.” Mvuse ya été nde a nga ka’a Yésus na: “Me aye ve wo mam ma mese, nge wo aye kute meboñe si a kañe ma.” (Matthieu 4:8, 9; Luc 4:5, 6) Sili’i womiene nsili wu: ‘Nge meyoñe mete me nji be ma me Satan, ye a nga ye me ka’a Yésus?’ Momo. Bijôé bite bise bi ne bi bi Satan.

12 Ô ne kame na: ‘Nne Satan a ne yeme jôé émo ji aya? Ye sa ke Zambe ya Ngul Ése, nnye a nga té biôm bise?’ (Nlitan 4:11) Ôwé! É ne fo’o nalé, ve Yésus a nga kôme loone Satan na “njô bôte ya si nyô.” (Jean 12:31; 14:30; 16:11) Nlômane Paul ô nga loone Satan na, “zambe ya si nyô.” (2 Becorinthien 4:3, 4) A Nlômane Jean ô nga tili na: “Si nyô ése é jô’ô be mbia môt ate.”​—1 Jean 5:19.

 AVAL AVÉ ÉMO SATAN JA YE JAÑ?

13. Amu jé bia yi mfefé émo?

13 Émo ji é ntoo abé. Bevôme bi too bia yene bita, ébotezel, medu’an a évô. Be kusa ve mengule mese, bôte ba vo’o mane minju’u mise mi ne émo. Ve Zambe a mbeme zu jiane mbia émo nyi e bita ya Harmaguédon, a ye fe tyendé je a mfefé émo ô ne zôsô.​—Nlitan 16:14-16; fombô’ô Ayemé 10.

14. Za a ne Njôô ya Éjôé Zambe? Jé Kalate Zambe a nga jô a lat a Yésus?

14 Yéhôva a nga tobe Yésus Krist na, a bo Njôô ya  Éjôé jé é ne yôp été. E zu koone na mimbu betoyini mi lôteya, Kalate Zambe a nga jô mfa’a Yésus na, a ye jôé ane “Njôô ya mvô’é,” a éjôé te é se ngule ya mane môs éziñ. (Ésaïe 9:6, 7) Yésus a nga jô beyé’é bé na be ye’elan asu éjôé te, éyoñ a nga jô na: “Ayoñe [Éjôé] dôé é za’ak, mam wo anye’e me bo’o si nyô aval ane me abo yôp.” (Matthieu 6:10) E kabetôlô 8, bia ye yé’é aval avé Éjôé Zambe ja ye tyendé bijôé ya émo ji. (Lañe Daniel 2:44.) Mvuse ya été, Éjôé Zambe ja ye bo na si é bo paradis.​—Fombô’ô Ayemé 11.

MFEFÉ ÉMO Ô NTOO BEBÉ!

15. Jé é ne “mfefé si”?

15 Kalate Zambe a ka’a na: “Bia yange mimfefé mi yôp a mfefé si” a na, “nne zôsôô a too été.” (2 Pierre 3:13; Ésaïe 65:17) Biyoñe biziñ, éyoñe Kalate Zambe a belan éfia “si,” a kobô ajô bôte ba nyiñe si. (Metata’a 11:1) Nde “mfefé si” ô ne bôte ba bo Zambe mewôk, a ba be bili bibotane bié.

16. Das avé Zambe a ye ve bôte ba ye nyiñe mfefé émo, a jé bia yiane bo asu na bi bi dase te?

 16 Yésus a nga ka’a na, bôte ba ye nyiñe mfefé émo ba ye bi “ényiñe ya melu mese.” (Marc 10:30) Jé bia yiane bo asu na bi bi dase te? Lañe Jean 3:16 a 17:3, asu na ô bi éyalan. Bi tame zu yen aval avé Kalate Zambe a jô na ényiñe ja ye bo, éyoñe si ja ye bo paradis.

17, 18. Aval avé bia yeme na mvo’é ja ye bo vôm ase si, a na minleme mi aye bômbô bia si?

17 Abé, bita, mewôé me bôt a évô, bi aye man. Teke mbia môt éziñ a ye li’i si. (Besam 37:10, 11) Zambe a ye “mane mewosan akekui susu’a ya si nyô.” (Besam 46:9; Ésaïe 2:4) Si ja ye bo njalan a bôte ba nye’e Zambe a bo nye mewôk. Mvo’é ja ye bo nnôm éto.​—Besam 72:7.

18 Bebo bisaé be Zambe ba ye nyiñe minleme mi bôô be si. Yéhôva a mbe a ba’ale bone be Israël éyoñ ése be mbe be bo’o nye mewôk. (Lévitique 25:18, 19) E paradis bia ye ke ko jôm éziñ, nge môt éziñe woñ. Minleme mi aye bômbô bia si éyoñ ése!​—Lañ Ésaïe 32:18; Michée 4:4.

19. Amu jé bi ne tabe ndi na, bidi bi aye bo abui mfefé émo?

19 Bidi bi aye bo abui. “Abui bidi da ye bo e si nyô mebôbône minkôle yôp.” (Besam 72:16) Yéhôva, ‘Zambe wongan a ye botane bia’ a ‘si ja ye yô bidi bié.’​—Besam 67:6.

20. Aval avé bia yeme na, si ja ye bo paradis?

20 Si se ja ye bo paradis. Bilé a mesam, bi aye bôman abeñe menda bôte ba ye bi e paradis. (Lañ Ésaïe 65:21-24; Nlitan 11:18.) Si se ja ye bo abeñ  ane afup Éden. Yéhôva a ye jalé miñyiane miangan éyoñ ése. Kalate Zambe a jô mfa’a wé na: “Wo kui wo wôé, a jalé nkômbane ya jôm ése é vee.”​—Besam 145:16.

21. Aval avé bia yeme na, mvo’é ja ye bo zañe bôt a betit?

21 Mvo’é ja ye bo zañe bôt a betit. Betite ba ye ke beta bo bôt abé. Bone be bongô ba ye ke beta ko betite be ne ayo’o woñ.​—Lañ Ésaïe 11:6-9; 65:25.

22. Jé Yésus a ye bo asu minkôkon?

22 Teke môt éziñ a ye kon. Yésus a nga saé abui bôt éyoñ a mbe si. (Matthieu 9:35; Marc 1:40-42; Jean 5:5-9) Ve éyoñ a ye bo Njôé ya Éjôé Zambe, Yésus a ye saé môt ase. Teke môt a ye beta jô na: “Ma kon.”​—Ésaïe 33:24; 35:5, 6.

23. Jé Zambe a ye bo asu bewu?

23 Bewu ba ye beta nyiñ. Zambe a ka’a na, a ye wômôlô bizu’u bi bôte bi nga wu. “Bôte ba ye wômô mesoñ, ba be ne zôsôô a ba be ne bikotekot.”​—Lañe Jean 5:28, 29; Mam Minlôman 24:15.

24. Wo simesan aya mfa’a ya ényiñe ya paradis si va?

24 Bia bese bia yiane top. Bi ne tobe na, bia yé’é mame mfa’a Yéhôva a bo nye ésaé, nge bo fo’o ve avale bia yi. Nge bi tobe na bia bo Yéhôva ésaé, bia ye bi mbamba ényiñe melu ma zu. Yésus a nga ka’a môt a nga jô na a simesane nye na: “Bia wo bia ye tabe paradis.” (Luc 23:43) Ñkelan ôsu a yé’é abui mam mefe a lat a Yésus, a yen aval a ye tôé bengaka’a be Zambe bese.