Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nda bôte jôé é ne nyiñe meva’a été

 NGABE 5

Kelan ôsu a tabe mvo’é a bebiaé benan

Kelan ôsu a tabe mvo’é a bebiaé benan

“Jaéane . . . mvam, nje’ebane minlem, évôvoé, abui njiban.”Becolossien 3:12

Éyoñe mi lu’uaneya mi nto ngumba nda bôt ôfe. É ne fo’o été na wo yiane ke ôsu a nye’e a semé bebiaé bôé, ve yeme na édiñe jôé é nto môt a dañe mfi e si nyô asu dôé. Bivuvumane bienane biziñe bia ye ke ji’a yebe jamete. Ve miñye’elane ya Kalate Zambe mii liti mia aval avé mi ne bo na môt ase a tebe été jé, nté mia jeñe na mi yemete mfefé nda bôte wônan.

 1 KELAN ÔSU A YENE BEBIAÉ BENAN AVALE DA YIANE

JÔME KALATE ZAMBE A JÔ: “Semé’é éso ba nyua.” (Beéphésien 6:2, Mfefé nkôñelan) Ja’a ô mbili mimbu tañeya, wo yiane ke ôsu a wumulu bebiaé bôé a semé be. Yeme fe na môt ô nga luk nye’ fe a yiane ve bebiaé bé ésemé a nyoñe be ngap. Mbôle “nye’an ô ne te bo mesengan,” te bo aban nge môt ô nga luk ba bebiaé bé ba kui.1 Becorinthien 13:4; Begalate 5:26.

JÔM Ô NE BO:

  • Te bo anye’e, a te boo ô jô’ô na “Bebiaé bôé be ne kom ve biasé ma” nge na, “Nyua a ne étyi te nye’e jôme ma bo”

  • Jeñe na ô yene mam a mise me minga wôé nge ke a mise me nnôme wôé

 2 ÉYOÑ JA YIANE, YEME’E JÔ NA: TEKÉ’É

JÔME KALATE ZAMBE A JÔ: “Ajô te fam j’aye li’ ésa ba nyia, ba ngale b’aye tabe nlatan: a b’aye bo nsône wua.” (Metata’a 2:24) Ja’a éyoñ ô lu’uya, bebiaé bôé be ne ke ôsu a buni na ô nga’an éjôé jape si, nalé a ne bo na be ke ôsu a kobô mame ma fombô alu’u dôé.

Mia môt ô nga luk mia yiane kui tyiñ: ‘Mame mevé ya nda alu’u jangane bi ne kate bebiaé bangan?’ Nye’an été, bo’ané na be yeme ntyi’ane ôte. Mi ne be de kate a mbamba nlem, teke balé môt éziñ. (Minkana 15:1) Nje’ebane nlem, évôvoé a ôjibi, mefulu mete mé volô na mia bebiaé benane mi kui a na mi ke ôsu a liti “nye’an.”Beéphésien 4:2.

JÔM Ô NE BO:

  • Nge mia yene na bebiaé benan ba dañe futi anyu mejô menan, kobané de mia bebaé e mbamba éyoñ

  • Mia bese tyi’ané aval avé mia ye kôm ajô te